پاۆلودار قالاسىنىڭ اكىمى قايرات نۇكەنوۆ «جۇمىسپەن قامتۋدىڭ جول كارتاسى» اياسىندا 5 مىڭ ادامدى جۇىسپەن قامتۋ جوسپارلانعانىن اتاپ ءوتتى.
-باعدارلاما اياسىندا ءبىزدىڭ اكىمدىككە قاراستى 39 جوبا جۇزەگە اسىرىلادى, - دەدى قايرات نۇكەنوۆ.
–بۇل جوبالارعا 10 ميلليارد تەڭگە بولىنگەن. 5 مىڭنان استام ادامدى جۇمىسپەن قامتۋ جوسپارلانعان.
ەڭ ءىرى جوبا – جەتەكشى اۋىلىنداعى مەكتەپتىڭ جۇمىسىنا 300 ادام تارتىلادى. مويىلدى مەكتەبىنىڭ جۇمىسىندا 100 ورىن بار. سونداي-اق بالاباقشالار جوندەلىپ, جولدارعا اسفالت توسەلەدى. باعدارلاما اياسىندا جۇمىسپەن قامتۋ ورتالىعىنداعى جۇمىسسىز رەتىندە تىركەلگەن ازاماتتار جۇمىسپەن قامتىلادى. جاس ەرەكشەلىكتەرىنە شەكتەۋ جوق. قالا اكىمىنىڭ ايتۋىنشا, «جۇمىسپەن قامتۋدىڭ جول كارتاسى» اياسىندا جۇمىس جاسايتىنداردىڭ ورتاشا جالاقىسى 80-150 مىڭ تەڭگە ارالىعىندا بولادى. سونىمەن قاتار, قايرات نۇكەنوۆ بيىل قالادا 101 ويىن الاڭى ورناتىلىپ, 101 اۋلادا كولىك تۇراقتارى كەڭەيتىلىپ, 101 اۋلا جارىقتاندىرىلاتىنىن ايتتى.
-قالامىزدا 1380 كوپقاباتتى ءۇي, 600 اۋلا بار. بيىل 101 اۋلانى جارىقتاندىرساق, جالپى جارىقتاندىرۋ ماسەلەسى شەشىلىپ قالۋى ءتيىس. جارىقتاندىرىلماعان 10 پايىز اۋلا قالۋى مۇمكىن, - دەدى شاھار باسشىسى. اتالعان جوبالاردىڭ ءبىرى وبلىس ورتالىعىنداعى №39 مەكتەپتىڭ جوندەۋ جۇمىستارى. وعان 146 ملن تەڭگە بولىنگەن. جوندەۋدى جۇزەگە اسىراتىن نەگىزگى مەردىگەر «ۆەرشينا» كومپانياسى بولسا, قوسالقى مەردىگەر – «كوممۋنترانس LTD» جشس.
-باعدارلاما اياسىندا جۇمىسسىز بولعان 16 ادامدى جۇمىسپەن قامتىدىق, - دەدى «كوممۋنترانس LTD» جشس ديرەكتورى ارمان اعىباەۆ.
–ولاردىڭ كوبى جاستار. جالاقىلارى 85 مىڭ تەڭگەدەن كەم بولمايدى. ماماندىقتارىنا قاراي تولەنەدى. بۇل مەكتەپتىڭ جالپى اۋماعى 9 مىڭ شارشى مەتردەن اسادى. ونداعى قۇرىلىس عيماراتتارىنىڭ اۋماعى 3909 شارشى مەتر. وسى 3909 شارشى مەتر اۋماقتا كۇردەلى جوندەۋ جاسالادى.
ونىڭ ىشىندە اتاپ وتەتىن باسسەين بار. باسسەين تولىق جوندەۋدەن وتەدى. ونىڭ شومىلۋ اۋماعى 190 شارشى مەتر. وعان قوسا, مەكتەپتىڭ توبەسى, قاسبەتى, قوس سپورت زالى سياقتى عيماراتتى تولىقتاي جوندەۋدەن وتكىزەمىز.
