تەلەكوممۋنيكاتسيا سالاسىنداعى جوسپارلار مەن وزگەرىستەر تۋرالى ەلىمىزدىڭ باستى ينتەرنەت پروۆايدەرىنە بىرقاتار ساۋال قويعان بولاتىنبىز.
– قازىر كوبىمىز «پاندەميا بار پروبلەمانى اشىپ بەردى» دەگەندى كوپ ايتامىز. ءبىر جاعىنان دۇرىس. دەگەنمەن ءبىز بۇل قيىندىقتاردى بىلدىك, پاندەميانىڭ توبەسى كورىنبەي تۇرىپ-اق «قازاقتەلەكوم» ۋاقىتتىڭ ءتۇرلى سىناعىنا دايىندالا باستادى. سونىڭ ارقاسىندا سىن ساعاتتا سۇرىنبەدىك دەپ ايتا الامىن. ءسوز جوق, تەلەكوممۋنيكاتسيا سالاسىندا ايتارلىقتاي وزگەرىستەر بولادى. قازىردىڭ وزىندە ادامداردىڭ قارىم-قاتىناسى, اقپارات الماسۋى, وقۋى نە جۇمىس ىستەۋى, ساۋدا جاساۋى سەكىلدى كۇندەلىكتى تىرشىلىگىنىڭ جاڭا مودەلى قالىپتاسا باستادى. مۇنىڭ ءبارىن ونلاين جاساۋعا بولاتىنىن كوردى. ۇيرەندى. ەندى تىرشىلىكتىڭ بۇل جاڭا قالپى, كارانتين بىتسە دە, ءبىر ساتتە جوعالىپ كەتپەسى انىق.
كوبى بالاسىن قاشىقتان وقىتا بەرگەندى قۇپ كورەرى ءسوزسىز. كاسىپكەر دە كەڭسە جالداماي-اق, بارشا قىزمەتكەرىن ۇيگە جىبەرىپ تە, سول جۇمىس ناتيجەسىن الاتىنىن كوردى. ەندى مۇنداي بيزنەس وكىلدەرى كاسىبىن ونلاين الاڭقايدا جۇرگىزۋدىڭ ءتيىمدى تاسىلدەرىن ىزدەي باستاۋى ابدەن مۇمكىن, – دەدى ق.ەسەكەەۆ
ونىڭ ايتۋىنشا, «قازاقتەلەكوم» مۇنداي الاڭقايدى پاندەميانىڭ اتى تۇگىلى, زاتى جوق كەزدە ويلاستىرىپ, جۇزەگە اسىرىپ قويعان. مىسالى, Ismet.kz پلاتفورماسى بيزنەس ءۇشىن بار شارۋانى ونلاين اتقارۋعا مۇمكىندىك بەرەدى. مۇندا تىركەلگەن كاسىپكەرلەر وزگەلەردىڭ قىزمەتىن ساتىپ الىپ, ءوزىنىڭ تاۋارىن نە قىزمەتىن ونلاين ساۋدالاي الادى.
– ارينە بۇل الاڭدى ىسكە قوساردا ءبىز ونىڭ ءدال وسىلاي قاجەت بولارىن ءتىپتى سەزگەن دە جوقپىز. ءبىز اراداعى قۇجات اينالىمدى قىسقارتىپ, ونى ءتيىستى جەرگە جەتكىزۋگە كەتەر شىعىندى جويىپ, ۋاقىتتى ۇنەمدەۋ ءۇشىن جاساعان ەدىك. سول كەزدىڭ وزىندە جىلىنا 60 ملن تەڭگەنى ۇنەمدەدىك. ال بۇگىندە Ismet.kz ءبىز ءۇشىن سەرىكتەستەر مەن زاڭدى تۇلعالارمەن قارىم-قاتىناستى توقتاتپاۋدىڭ جالعىز عانا امالى بولىپ قالدى.
قازىرگى تاڭدا بۇل الاڭقايدا 14500 كاسىپكەر ونلاين قىزمەت كورەدى. توتەنشە جاعداي ۋاقىتىندا 2500-دەن اسا ادام تىركەلگەن. ءبىر عانا ءساۋىر ايىندا بۇل پورتالدىڭ قىزمەتىن 120 795 ادام كورگەن, – دەدى «قازاقتەلەكوم». اق باسقارما توراعاسى.
قۋانىشبەك ەسەكەەۆ اتاپ وتكەندەي, كومپانيا بۇدان بولەك جۇمىس بارىسىندا ابونەنتكە قولايلى بولۋ ءۇشىن جانە جىلدام, ساپالى قىزمەت كورسەتۋ ءۇشىن ديستانتسيوندى بايلانىس ارنالارىن ىسكە قوستى. بارشا قىزمەت كورسەتۋ بولىمشەلەرىماجبۇرلى تۇردە جۇمىسىن توقتاتقاندا, بۇل ونلاين ارنالار كومپانيانى قۇتقارىپ قالدى. تۇتىنۋشىلارمەن بايلانىس ءبىر ساتكە دە ۇزىلگەن جوق. كەرىسىنشە, كارانتين ەنگىزىلگەن العاشقى 10 كۇندە ونلاين ارنالارعا حابارلاسقان تۇتىنۋشىلار قاتارى 30 ەسە ءوستى.
