ايماقتار • 16 مامىر، 2020

ەلوردا: 18 مامىردان باستاپ بالاباقشالار كەزەكشى توپتاردىڭ رەجيمىندە جۇمىس ىستەيدى

61 رەت كورسەتىلدى

بۇل جۇمىس ىستەيتىن، بالامەن ۇيدە وتىرۋعا مۇمكىندىگى جوق اتا-انالارعا كومەك رەتىندە ۇيىمداستىرىلدى، دەپ حابارلايدى ەلوردا اكىمدىگىنىڭ رەسمي سايتى.

18 مامىردان باستاپ نۇر-سۇلتاننىڭ بارلىق مەكتەپكە دەيىنگى ۇيىمدارى مەنشىك تۇرىنە قاراماستان ءبىرىنشى كەزەكتە جۇمىس ىستەيتىن، بالامەن ۇيدە وتىرۋعا مۇمكىندىگى جوق اتا-انالار ءۇشىن  كەزەكشى توپتاردىڭ رەجيمىندە جۇمىسىن باستايدى، دەدى بۇگىن قالالىق اكىمدىكتە وتكەن بريفينگتە ءبىلىم باسقارماسىنىڭ باسشىسى شولپان قادىروۆا.

ء«اربىر مەكتەپكە دەيىنگى ۇيىمدا بالا سانى 15-تەن اسپايتىن كەزەكشى توپتاردى اشۋ جوسپارلانىپ وتىر. ەگەر بالا بالاباقشاعا كەلمەسە، ورنى ساقتالادى. بۇگىنگى كۇنى مەكتەپكە دەيىنگى ۇيىمدارداعى قاجەتتىلىكتى انىقتاۋ ءۇشىن اتا-انالاردىڭ اراسىندا مونيتورينگ جۇرۋدە. ول ءۇشىن اتا-انالار تاربيەشىگە بالانىڭ باقشاعا باراتىنى تۋرالى ءبىر كۇن بۇرىن حابارلاۋى ءتيىس»، - دەدى ش.قادىروۆا.

بۇعان قوسا، بالاباقشاداعى كەزەكشى توپتاردىڭ جۇمىسىنىڭ الگوريتمى ازىرلەندى.

«بارلىق نىساندار سانيتارلىق تالاپتارعا سايكەس دايىندالدى: زالالسىزداندىرۋ، تازارتۋ،  مەكتەپكە دەيىنگى ۇيىمنىڭ اۋماعى مەن عيماراتىن دەزينفەكتسيالاۋ، انتيسەپتيكتەر مەن قاجەتتى جەكە قورعانىش قۇرالدارى – ماسكا مەن قولعاپ ساتىلىپ الىندى»، - دەدى ول. 

بالالار ۋچاسكەلىك پەدياتوردان بالانىڭ دەنساۋلىعى تۋرالى انىقتاما اكەلگەن كەزدە عانا قابىلدانادى. بالانى باقشاعا قابىلداۋ كەزىندە تاربيەشى مەديتسينا قىزمەتكەرى مەن اتا-اناسىنىڭ كوزىنشە تەرمومەتريا ارقىلى مىندەتتى تاڭعى تەكسەرۋ جۇرگىزەدى. 

«اتا-انالاردى تۇسىنىستىك تانىتىپ، بالاباقشادا تاربيەلەنۋشىلەر ءۇشىن قاۋىپسىز جاعداي جاساۋعا كومەكتەسۋلەرىن سۇرايمىز. ال 1 ماۋسىمنان باستاپ مەكتەپكە دەيىنگى ۇيىمداردىڭ جۇمىسى شتاتتىق رەجيمدە جۇمىسىن قايتادان باستايدى دەپ جوسپارلانىپ وتىر»،  - دەدى نۇر-سۇلتان قالاسى ءبىلىم باسقارماسىنىڭ باسشىسى. 

18 مامىردان باستاپ ارنايى ۇيىمدار، پسيحولوگيالىق-مەديتسينالىق جانە پەداگوگيكالىق كونسۋلتاتسيالار (پمپك)، پسيحولوگيالىق-پەداگوگيكالىق تۇزەتۋ بولمەلەرى (قپپك)، وڭالتۋ ورتالىقتارى (قك) سانيتارلىق قاۋىپسىزدىك شارالارىنا ساقتاي وتىرىپ جۇمىسىن جالعاستىرادى. ەرەكشە قاجەتتىلىگى بار بالانىڭ ارقايسىمەن جەكە جۇمىس ىستەلەدى جانە جاڭا وقۋ جىلىنا باراتىن بالالارعا ارنالعان وقۋ باعدارلاماسى انىقتالادى.

قانداي دا ءبىر سۇراقتار بولسا، اتا-انالار 55 68 83، 55 68 73، 1445 ءنومىرى ارقىلى ءبىلىم باسقارماسىنىڭ كولل-ورتالىعىنا حابارلاسا الادى. ش.قادىروۆا تج كەزىندە مەملەكەتتىك كوميسسيانىڭ شەشىمىمەن مەكتەپكە دەيىنگى ۇيىمدار مەنشىك ءتۇرى مەن بالالاردىڭ بارماعانىنا قاراماستان مەملەكەتتىك تاپسىرىسپەن ۇزدىكسىز قامتاماسىز ەتىلىپ وتىرعانىن ايتتى.  2020 جىلدىڭ 1 شىلدەسىنەن باستاپ جەرگىلىكتى بيۋدجەتتەن جەكەمەنشىك باقشالارعا  2 856 ورىنعا مەملەكەتتىك ءبىلىم بەرۋ تاپسىرىسىن ورنالاستىرۋ كوزدەلۋدە.

قازىر ەلوردادا 377 مەكتەپكە دەيىنگى ۇيىم بار، ونىڭ  94-ءى مەملەكەتتىك، ال 237-ءى جەكەمەنشىك. بۇل ۇيىمدارعا بارلىعى 55 708 بالا بارادى.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • 10 شىلدە، 2020

پنەۆمونياعا باسقا اتاۋ بەرىلۋى مۇمكىن

كوروناۆيرۋس • 10 شىلدە، 2020

كوروناۆيرۋس ىندەتى 3 كەزەڭنەن تۇرادى

كوروناۆيرۋس • 10 شىلدە، 2020

ۇقساس جاڭالىقتار