بۇل تۋرالى وبلىس اكىمىنىڭ ورىنباسارى ساكەن قالقامانوۆ وڭىرلىك كوممۋنيكاتسيا قىزمەتىنىڭ الاڭىندا مالىمدەدى. تۇركىستان وبلىستىق توتەنشە جاعداي دەپارتامەنتىنىڭ مالىمەتىنە سايكەس, تولەبي اۋدانىنداعى قاسقاسۋ وزەنىندە سۋ دەڭگەيىنىڭ كوتەرىلۋىنەن 4 ءۇي, 376 اۋلا اۋماعىن سۋ باستى. جەرگىلىكتى ماڭىزى بار ءتورت كوپىردى سۋ شايىپ كەتتى. 8 باس ءىرى قارا جانە ۇساق مال شىعىنى بولدى. ال اۋدان ورتالىعى لەنگىر قالاسىنداعى 20 اۋلا سۋ استىندا قالعان. لەنگىردەگى №5 كاسىبي تەحنيكالىق كوللەدج بازاسىندا زارداپ شەككەن سۇلتان رابات اۋىلىنىڭ 150 تۇرعىنىنا ەۆاكۋاتسيالىق پۋنكت ۇيىمداستىرىلدى. ول جەرگە 70 ادام جايعاستىرىلدى. ونىڭ 32-ءسى بالالار. تاعى 80 ادام جاقىن ماڭداعى تۋىستارىنىڭ ۇيىنە ورنالاسقان. قوسىمشا كوكسايەك ەلدى مەكەنىندە ورنالاسقان №9 كوپسالالى كوللەدجىندە 150 ادامعا ارنالعان ەۆاكۋاتسيالىق پۋنكت دايىندالدى.
قازىعۇرت اۋدانىندا 6 ءۇي اۋلاسى مەن قارجان اۋىلىنداعى "سەمبي" ەمحاناسىنىڭ اۋماعىن سۋ باستى. س. راحىموۆ اۋىلدىق وكرۋگىنىڭ تۇرىندارىن ەۆاكۋاتسيالاۋعا تۇركىستان وبلىسى تجد قىزمەتكەرلەرى جۇمىلدىرىلدى. كوكىبەل اۋىلىنان 133 ادام ەۆاكۋاتسيالاندى. ونىڭ 45-ءى بالالار. بارلىق ەۆاكۋاتسيالانعان تۇرعىندار تۋىستارىنىڭ ۇيلەرىنە جايعاستىرىلدى. قازىرگى تاڭدا سۋ باسقان ايماقتارداعى ارىقتاردى تازالاۋ جۇمىستاردى جۇرگىزىلۋدە.
بايدىبەك اۋدانىنداعى اقباستاۋ اۋىلدىق وكرۋگىنە قاراستى تۇراقتى كانالىنان تاسىعان سۋ سالدارىنان 3 ەلدى مەكەندەگى 13 ءۇي اۋلاسىن سۋ باسقان. سۋ دەڭگەيى 20 سانتيمەترگە دەيىن كوتەرىلگەن. توتەنشە جاعداي قىزمەتكەرلەرىنىڭ كومەگىمەن تۇراقتى اۋىلىنان 55 ادام اقباستاۋ اۋىلىنداعى ش.ءۋاليحانوۆ ورتا مەكتەبىندەگى ەۆاكۋاتسيالىق پۋنكتتە ورنالاستىرىلدى. ونىڭ ىشىندە 18-ءى جاس بالالار.
تۇركىستان وبلىسىنىڭ تجد جانىنان دەپارتامەنت قىزمەتكەرلەرى جەرگىلىكتى اتقارۋشى ورگاندار مەن پوليتسيا قىزمەتكەرلەرىنەن قۇرالعان جەدەل شتاب قۇرىلدى. سۋ تاسقىنى زاردابىن جويۋعا 612 مامان مەن 84 تەحنيكا 47 موتوپومپا جۇمىلدىرىلدى.
تۇركىستان وبلىسى
