بيىل اقمولا وبلىسىندا جازدىق ەگىس اۋماعى 4,9 ملن گا قۇرايدى, ونىڭ ىشىندە 4,4 ملن گا – ءداندى داقىل. بۇگىنگى تاڭدا 581 مىڭ گا (جوسپاردىڭ 13,1%) ءداندى جانە ءداندى-بۇرشاقتى داقىلدار, 39 مىڭ گا استام مايلى (15,5%) جانە 51 مىڭ گا مال ازىعى (28,4%) داقىلدارى ەگىلگەن.
ەگىس جۇمىستارىنا شامامەن 32 مىڭ بىرلىك اۋىل شارۋاشىلىعى تەحنيكاسى جۇمىلدىرىلعان, اتاپ ايتساق, 14 مىڭنان استام تراكتور, 16 مىڭ تۇقىم سەپكىش, 1 250 ەگىس كەشەنى. وڭىردە كوكتەمگى ەگىس جۇمىستارىن جۇرگىزۋگە 68 مىڭ توننا كەپىلدەندىرىلگەن ديزەل وتىنى ءبولىندى, ونىڭ قۇنى مەملەكەت باسشىسىنىڭ تاپسىرماسى بويىنشا فەرمەرلەر ءۇشىن ءليترى 165 تەڭگەگە دەيىن ارزانداتىلعان.
اۋىل شارۋاشىلىعى داقىلدارىن ەگۋدى وڭتايلى مەرزىمدە – 20-25 جۇمىس كۇنى ىشىندە اياقتاۋ كوزدەلگەن.
ۇكىمەت باسشىسى ساندىقتاۋ جانە اقكول اۋداندارىنىڭ القاپتارىنداعى ەگىس جۇمىستارىمەن, جەرگىلىكتى اۋىل شارۋاشىلىعى كاسىپورىندارىنىڭ ماتەريالدىق-تەحنيكالىق بازاسىمەن, ءداندى جانە جەم-ءشوپ داقىلدارىن وڭدەۋ جانە تازالاۋ, سونداي-اق ەت جانە ءسۇت ونىمدەرىنىڭ ءوندىرىسىن كەڭەيتۋ جوبالارىمەن تانىستى.
«اۋىل – ەل بەسىگى» جوباسىنىڭ ىسكە اسىرىلۋىن باقىلاۋ اياسىندا پرەمەر-مينيستر ساندىقتاۋ اۋدانىنىڭ ماكسيموۆكا جانە بالكاشينو اۋىلدارىندا, سونداي-اق اقكول اۋدانىنىڭ ەڭبەك اۋىلىندا بولىپ, وندا الەۋمەتتىك ينفراقۇرىلىم نىساندارىن — اباتتاندىرىلعان تۇرعىن ۇيلەردى, دەنساۋلىق ساقتاۋ, ءبىلىم بەرۋ جانە سپورت مەكەمەلەرىن ارالاپ كوردى.
اقمولا وبلىسىنىڭ اۋىل شارۋاشىلىعى جالپى ءونىمىنىڭ كولەمى وسى جىلدىڭ ءتورت ايىنىڭ قورىتىندىسى بويىنشا 2019 جىلدىڭ سايكەس كەزەڭىندەگى كورسەتكىشپەن سالىستىرعاندا 3,5%-عا ءوستى. وڭدەلگەن ەت ءوندىرىسى 22,1%-عا (19 مىڭ توننا), ءسۇت ونىمدەرى 0,4%-عا (26 مىڭ توننا), ۇن 29%-عا (122 مىڭ توننا) جانە وسىمدىك مايى 42,1%-عا (8 مىڭ توننا) ءوستى.
اقمولانىڭ اۋىل شارۋاشىلىعى ءونىمىن وندىرۋشىلەرى ەلوردا تۇرعىندارىن ەت جانە ءسۇتتىڭ شامامەن ۇشتەن ءبىر بولىگىمەن (33% جانە 34%-عا), تاعامدىق جۇمىرتقامەن – 94%-عا قامتاماسىز ەتەدى. وڭىردە ەت فەرمالارىن قۇرۋ جوبالارى جۇزەگە اسىرىلا باستادى, بارلىعى 7600 باس اسىل تۇقىمدى ءىرى قارا مال ساتىپ الۋمەن 111 ەت فەرماسى سالىنادى. 2400 باس ءىرى قارا مالعا ارنالعان 18 ءسۇت-تاۋار فەرماسىن اشۋ جىل سايىنعى ءسۇت ءوندىرىسىن كەم دەگەندە 40 مىڭ تونناعا ارتتىرۋعا مۇمكىندىك بەرەدى.
