دەگەنمەن, جاھاندىق ىندەتكە بايلانىستى داعدارىس تولىق اياقتالدى دەۋگە ءالى ەرتەرەك بولار. بۇعان الەم بويىنشا ىندەتتى جۇقتىرعانداردىڭ سانى 4 ميلليوننان, قازاقستان بويىنشا 5 مىڭنان اسىپ وتىرعاندىعى دالەل. سول سەبەپتى كۇندەلىكتى ومىردە, جۇمىس ورنىندا, ادامدارمەن قارىم-قاتىناستا ساقتىق شارالارىن قاتاڭ ۇستانعان ءجون ەكەندىگىن, ءوزىمىزدىڭ امان-ساۋلىعىمىزعا, ەڭ الدىمەن, ءوزىمىز جاۋاپتى بولۋىمىز كەرەك ەكەندىگىن پرەزيدەنت ق.توقاەۆ ەرەكشە اتاپ ءوتتى.
كارانتين تالاپتارىن جۇمسارتقان بىرقاتار ەلدە قايتادان ىندەت تارالۋىنىڭ كۇرت ءورشۋى بۇل ماسەلەدە سالعىرتتىق تانىتۋ مەن جەكە جاۋاپكەرشىلىكتىڭ دەڭگەيىن تومەندەتۋگە بولمايتىنىن كورسەتەدى. مىسالى, گەرمانيادا
6 مامىردان باستاپ كارانتين شارالارىن قىسقارتۋدىڭ ەكىنشى كەزەڭىنە ءوتۋ ارقىلى بارلىق ساۋدا ورتالىقتارىن اشۋعا, بۇقارالىق جانە كاسىبي سپورتقا رۇقسات بەرىلىپ, ءسان سالوندارى, مۋزەي, زووپاركتەر جۇمىستارى جانداندى, مەكتەپتەر بىرتىندەپ ساباقتارىن باستاۋعا كوشتى. الايدا ۆيرۋستى جاڭا جۇقتىرعاندار سانى كوپتەپ تىركەلەتىن جاعدايدا, قايتادان قاتاڭ كارانتين رەجىمى فەدەرالدى ايماقتارعا بايلانىستى ەنگىزىلۋى مۇمكىن ەكەندىگىن بيلىك جوققا شىعارمايدى.
قازاقستانداعى كوروناۆيرۋس ىندەتىنىڭ قازىرگى كۇيىنە, ءالى دە حالىقتىڭ دەنساۋلىعىنا قاۋىپتىڭ ساقتالۋىنا بايلانىستى قابىلدانعان شەشىمدەر قۇپتارلىق. اتاپ ايتساق, وبلىستار اراسىنداعى كولىك قاتىناسىنا شەكتەۋلەر, قوعامدىق كولىكتەردىڭ جارتىلاي جۇكتەمەمەن ءجۇرۋى, جولاۋشىلاردىڭ بەتپەردە تاعۋى تالاپ ەتىلۋى, كوشەدە توپتاسىپ ءجۇرۋ 3 ادامنان اسپاۋى, مەملەكەتتىك قىزمەتشىلەردىڭ 50 پايىزى قاشىقتان جۇمىس ىستەۋى ىندەتتىڭ ەكىنشى كەزەڭىنىڭ باستالماۋىنا توسقاۋىل بولاتىن شارالار.
بۇدان بولەك مەملەكەت باسشىسىنىڭ سوزىندە ەلدەگى ەكونوميكالىق جاعدايدى تۇراقتاندىرۋعا بايلانىستى وتە وزەكتى ماسەلەلەر قاراستىرىلدى. ەندىگى كەزەكتە اتالعان ماسەلەلەر ەكونوميكالىق ءوسىمدى قالپىنا كەلتىرۋ جونىندەگى مەملەكەتتىك كوميسسيا شەڭبەرىندە جۇزەگە اسىرىلاتىن بولادى.
اسەل نازاربەتوۆا,
پرەزيدەنت جانىنداعى قسزي حالىقارالىق زەرتتەۋلەر ءبولىمىنىڭ باسشىسى
