ينفوگرافيكانى جاساعان امانگەلدى قياس, «ەQ»
پرەزيدەنت پاندەميا قانشاما سالانىڭ جۇمىسىنا تۇساۋ بولعانىن, ىلگەرىندى ىستەر ىركىلىپ قالعانىن ايتا كەلە, داعدارىس كەزىندەگى جانە ودان كەيىنگى دامۋدىڭ باسىم باعىتتارىن اتاپ كورسەتتى. وسىناۋ سىن ساعاتتا حالىقتىڭ اماندىعىمەن قوسا ءال-اۋقاتىنىڭ دا جاقسى بولۋى ءۇشىن ەكونوميكانى دامىتۋعا ەرەكشە سەرپىن بەرۋ ماڭىزدى بولىپ تۇر. سوندىقتان مەملەكەت باسشىسىنىڭ مالىمدەمەسىندە نەگىزىنەن ەل تۇرمىسىن كوتەرۋ ماسەلەسى باسا ايتىلدى.
ۇلتتىق بيزنەستى قولداۋعا باسىمدىق بەرۋ ەرەكشە نازارعا الىنباق. ءبىزدىڭ كاسىپكەرلەر ەۋرازيالىق ەكونوميكالىق كەڭىستىكتە كوپتەگەن كەدەرگىگە تاپ كەلەدى. مىسالى, رەسەي, بەلارۋس سياقتى ەلدەردىڭ كونكۋرستارىنا قاتىسا المايدى. سوندىقتان ءبىز, ەڭ الدىمەن, ءوزىمىزدىڭ بيزنەسكە بارىنشا جاعداي جاساپ, زاڭعا وزگەرىستەر ەنگىزۋىمىز كەرەك. بۇل تۇرعىدا دەپۋتاتتار كەزىندە ءبىراز ۇسىنىس جاسادى. پرەزيدەنتتىڭ پارمەنىمەن وسى باعىتتاعى جۇمىستى كۇشەيتۋدىڭ مۇمكىندىگى تۋىپ تۇر.
مالىمدەمەدە يندۋستريالاندىرۋ ۇدەرىسىنە قاتىستى ۇستانىمدى قايتا قاراۋ نازارعا الىندى. دايىن تاۋارلاردى سىرتتان اكەلگەننەن گورى وتاندىق ءوندىرىستى مىقتاپ قولعا الۋ – قازىرگى كۇننىڭ تالابى. مەملەكەت باسشىسىنىڭ ينفراقۇرىلىمدىق باعدارلامالار بويىنشا جەرگىلىكتى مۇمكىندىكتى پايدالانۋ دەڭگەيىن 40 پايىزدان 60-70 پايىزعا دەيىن جەتكىزۋ كەرەك دەگەنى وتە ورىندى. ايتالىق قۇرىلىس ماتەريالدارىنا قوسا اۋىل شارۋاشىلىعى تەحنيكالارىن دا وزىمىزدە شىعاراتىن بولساق, قولىمىز ءبىراز ۇزارىپ قالاتىن ەدى. سوندىقتان وسىنداي العا باستايتىن جۇمىستى قولعا العان كاسىپكەرلەردى بارىنشا قولداپ, سالىقتان بوساتۋىمىز قاجەت.
بيزنەسكە كەڭىنەن مۇمكىندىك جاساساق, ول ءارى قاراي دامىپ, ءبىراز ماسەلەنىڭ شەشىلۋىنە سەپتىگىن تيگىزەدى. ءوندىرىس كۇشەيىپ, جۇمىس ورىندارى كوپتەپ اشىلىپ, حالىقتىڭ دا ەڭبەكپەن قامتىلۋ كورسەتكىشى جوعارىلايدى. ال بيزنەستىڭ اياقتان نىق تۇرىپ كەتۋى ءۇشىن قارجىلىق قولداۋ قاجەت. سوندىقتان كاسىپكەرلىكتىڭ كوكجيەگىن كەڭەيتۋگە بانكتەردىڭ قولعابىس ەتكەنى ماڭىزدى. ياعني كاسىپكەرلەرگە قاراستىرىلاتىن نەسيەنىڭ پايىزىن تومەندەتۋ كەرەك.
قازىرگى قىسىلتاياڭ شاقتا ازاماتتارعا ءتۇرلى الەۋمەتتىك كومەك بەرىلىپ, ەرەكشە قامقورلىق جاسالىپ جاتىر. ەندىگى جەردە وتانداستارىمىزدىڭ تۇرمىسى جاقسى بولۋى, تابىسىن ارتتىرۋى ءۇشىن ەكونوميكانى دامىتۋعا سەرپىن بەرۋ كۇن تارتىبىندەگى باستى ماسەلە بولماق. بۇل باعىتتا پرەزيدەنتتىڭ تاپسىرمالارى ءتيىمدى جۇزەگە اسادى دەپ سەنەمىن.
ساپار احمەتوۆ,
پارلامەنت ءماجىلىسىنىڭ دەپۋتاتى
