اسكەريلەر ماقتاارالدا قىزمەت ەتىپ ءجۇر

قۇتقارۋشى باتالون كومەككە كەلدى

قازىرگى ۋاقىتتا ۇلاندىقتار توتەنشە جاعداي ورنىندا ەكى باعىت بويىنشا قىزمەت اتقا­رۋ­دا. ءبىرىنشىسى – توتەنشە وقي­عا­نىڭ سالدارىن جويۋ بولسا, ەكىن­شى­سى وقيعا ورنىندا قۇ­قىق­­تىق ءتارتىپتى, كارانتيندىك رەجىم­دى قام­تاماسىز ەتۋ. بۇگىنگى كۇنى وسى مىن­دەتتەردى اتقارۋعا 500-دەن اسا اس­كەري قىزمەتشى وقيعا ور­نىنا تار­تىلدى.

ۇلتتىق ۇلان توتەنشە جاعداي سالدارىن جويۋ باسقارماسىنىڭ باستىعى پولكوۆنيك ارلەن بۇر­كىت­بايدىڭ ايتۋىنشا, ماق­تا­ار­ال اۋدانىندا بەس ەلدى مەكەن ءالى كۇنگە دەيىن سۋ استىندا. 1 مىڭ­نان اسا ءۇيدى سۋ باسقان. 10 ەۆاكۋا­تسيا­لىق پۋنكت ورناتىلعان. وندا 3 مىڭنان اسا تۇرعىن تۇرىپ جاتىر. قۇتقارۋ قىزمەتىنىڭ ما­مان­دارىمەن بىرگە ۇلاندىق جاۋىن­گەرلەر 15 مىڭنان اسا ءۇي جانۋارلارىن قاۋىپسىز جەرگە كو­شىردى. ورگەباس, جانتاقساي, فەرداۋسي, ىرىستى, نۇرلىجول اۋىلدارىنىڭ اۋماعىندا 22 شاقىرىم ۋاقىتشا بوگەتتەر سا­لىنىپ, قۇم تولتىرىلعان 10 مىڭعا جۋىق قاپ قويىلدى. 6122599 تەكشە مەتر سۋ سىرتقا شى­عارىلدى. مۇنىڭ بارلىعى ۇلان­دىق قۇتقارۋشىلاردىڭ وسى ۋاقىتقا دەيىن جاساعان ەرەن ەڭبەكتەرى. وقيعا ورنىنا ۇلتتىق ۇلاننىڭ 28237 اسكە­ري ءبولىمىنىڭ قۇتقارۋشى باتال­و­نى بارعان بولاتىن. 160-تان اسا جەكە قۇرام, 15 دانا قۇت­قارۋ تەحنيكاسى مەن 4 ءجۇزۋ قۇرالى بار باتالون سۋ تارتىل­عان اۋىل­داردا توتەنشە وقيعانىڭ سالدارىمەن كۇرەسۋدە. ءۇش توپقا بولىنگەن ۇلاندىق قۇتقا­رۋ­شى­لار: سۋ استىندا قالعان ءتورت ت ۇلىك جانۋارلاردىڭ دەنەسىن شى­عارۋ; ونى ءارى قاراي قاۋىپسىز جەرلەرگە كومۋ; توپىراق پەن ساز بالشىقتان ەلدى مەكەندى تازا­لاۋ; اعىن سۋدى شەتكە شىعا­رۋ جۇ­مىستارىن اتقارۋدا. قۇت­قا­رۋشىلاردىڭ سوزىنە سەنسەك, الدا­عى ءبىر اپتادا وقيعا سالدارىن جويۋ جۇمىستارى اياقتالماق.

سونداي-اق تۇرعىندارعا پسي­حو­­لوگيالىق كومەك كورسەتۋ مەن قوعامدىق ءتارتىپتى قامتا­ماسىز ەتۋ جۇمىستارى جال­عا­سۋدا. وسى ۋاقىتقا دەيىن قو­عام­دىق ءتارتىپ پەن قاۋىپ­سىز­دىك­تى قامتاماسىز ەتۋ جونىندەگى جاۋىنگەرلىك قىز­مەت بويىنشا 21 تاپسىرما ورىندالدى. بۇگىندە ەلدى مەكەن­دەر­دىڭ جانىندا ءتورت بلوك-بە­كەت­تە ۇلاندىق جاۋىنگەرلەر قى­راعى قىزمەت اتقارۋدا. كۇنىنە 270-تەن اسا اسكەري قىزمەتشى پات­رۋلدىك-بەكەتتىك قىزمەتكە جۇ­مىلدىرىلادى.

ءتارتىپ بۇزعانداردى ۇستاپ, ءورتتى اۋىزدىقتادى

ۇلاندىقتار قىزمەت بارى­سىن­دا تۇرعىندارعا كومەك كورسەتۋ كەزىندە 9 مارتە ەرەك­شە­لەنىپ, كوزگە ءتۇستى. وعان 6 ما­مىر­دا ساعات تۇنگى ساعات 01.30 شا­ماسىندا تۇركىستان وبلىسى, ماق­تاارال اۋدانى, ورگەباس اۋى­لىن­دا ورىن العان قىراعىلىق ۇلگىسى سوزىمىزگە دالەل.

وسى ءتۇنى ورگەباس اۋىلىنىڭ قاسىنداعى شەپ-بەكەتتەردە قۇ­قىق­تىق ءتارتىپ كۇزەتىندەگى ۇلت­تىق ۇلان جاۋىنگەرلەرى زاڭ­سىز بالىق ۇستاعانداردى قولعا تۇ­سىرگەن.

اۋىل ماڭىندا توسقاۋىل قىزمەتىندە تۇرعان اسكەري جاساق باستىعى قاتارداعى قۋانىش دۇيسەنبى جانە پاترۋلدەۋشى قا­تارداعى باقداۋلەت جال­ما­عان­بەتوۆ قاستارىنا كەلگەن كو­لىك­تى توقتاتادى. وسىعان دەيىن ورگە­باس اۋىلىندا زاڭسىز بالىق اۋلاۋشىلار ءجۇرۋى مۇمكىن دەگەن اقپارات تۇسكەن بولاتىن. ۇلاندىق جاۋىنگەرلەر «OPEL» ماركىلى اۆتوكولىكتى توقتاتادى. تەكسەرۋ بارىسىندا كولىكتەگىلەر ء«بىز ۆولونتەرلەرمىز» دەپ سوزدەن جالتارماقشى بولىپتى. كەيىن جۇرگىزۋشى اشۋلانىپ, ايقايعا باسادى. ۇلاندىق جاۋىنگەرلەر كولىكتىڭ جۇك قويماسىن اشقى­زا­دى. سول كەزدە تۇندەلەتىپ جۇرگەن جولاۋشىلاردىڭ قيتۇر­قى ويى انىقتالادى.

تەكسەرۋ ناتيجەسىندە كولىك­تەن قىزىل كىتاپقا ەنگى­زىل­گەن ەكى قاپ بالىق, رەزەڭكە قايىق, ۇزىن­دى­عى 50 مەتردى قۇرايتىن اۋ تابىلادى. اسكەري جاساق قولعا تۇس­كەن براكونەرلەردى پوليتسيا قىز­مەتكەرلەرىنە تاپسىردى.

ۇلتتىق ۇلان جاۋىنگەرلەرى سۋ باسقان اۋىلداردا قوعامدىق ءتارتىپ پەن قاۋىپسىزدىكتى قام­تا­ما­سىز ەتۋ بويىنشا قىزمەتتى ءۇش اۋىسىم بويىنشا جۇرگىزىپ كەلە­دى. ول تۋرالى جەدەل اسكەري توپ باسشىسىنىڭ تاربيە جانە الەۋ­مەتتىك-قۇقىقتىق جۇمىستار جونىندەگى ورىنباسارى كاپيتان سايات ساينوۆ باياندادى.

– 5 مامىر ساعات تۇنگى 3.30 شا­ماسىندا اسكەري جاساق باس­تىعى سەرجانت بەكبولات شوي­بە­كوۆ شانوۆ كوشەسىمەن ءوز باعى­تىن­دا پاترۋلدەۋ بارىسىندا 5 ادام جۇرگەنىن بايقاعان. ولار كارانتين رەجىمىن بۇزعانى جانە كۇدىك تۋدىرعانى ءۇشىن اس­كەري جاساق باستىعى داۋىس­تاپ توقتاۋلارىن سۇراعان. ءتارتىپ بۇزۋ­شىلار ول ەسكەرتۋىنە قۇلاق اسپاي قاشا جونەلگەن. اسكە­ري جاساق باستىعى كورشىلەس جاساق­قا راديوستانسا ارقىلى حابار­لاپ قاشۋ باعىتىن باياندايدى. اسكەري جاساق باستىعى سەرجانت ايدوس نۇرمانوۆ ءتارتىپ بۇزۋشىلاردىڭ الدىن بوگەپ, اسكەري جاساق ولاردى قولعا تۇسىرەدى. وقيعا ورنىنا اسكەري جاساقتار بويىنشا كەزەكشى اعا لەيتەنانت سەرىك قۇدايبەرگەنوۆ جانە پوليتسيا قىزمەتكەرى كەلىپ, ءتارتىپ بۇزۋشىلاردى انىقتاۋ ءۇشىن اۋداندىق ءىىب جەتكىزدى. ءتارتىپ بۇزۋشىلار وسى اۋىلدىڭ بوزبالالارى ەكەنى انىقتالدى. ەڭ قىزىعى, ولار بوس ۇيلەردىڭ ماڭىندا نە ءۇشىن جۇرگەندەرىن تۇسىندىرە الماعان. ولارعا كارانتين رەجىمىن بۇزباۋ تۋرالى ەسكەرتۋ جاسالىپ, اتا-انالارىنا تاپسىرىلدى, – دەيدى س.ساينوۆ.

ءدال سول كۇنى ساعات تاڭعى 5 شا­­ماسىندا مايور زافار حايت­مەتوۆ باستاعان جەدەل توپ جا­ۋىن­­گەرلىك قىزمەتتىڭ ۇيىم­داس­تىرىلۋىن تەكسەرۋ بارىسىن­دا ك.ماركس كوشەسىندە ورنالاسقان ۇيلەردىڭ بىرەۋىندە جا­رىلىس بولعانىن ەستيدى. وقي­عا ورنىنا بارعاندا, ورتەنىپ جاتقان ءۇيدى بايقاعان ساردار دەرەۋ اسكەري جاساقتار بويىنشا كەزەكشى اعا لەيتەنانت سەرىك قۇدايبەرگەنوۆتى شاقىرادى. ول ءوز كەزەگىندە ۋچاسكەلىك پوليتسيا پۋنكتىنە جانە ءورت ءسوندىرۋ بولىمىنە حابارلاپ, جاقىن ماڭ­دا­­عى ەكى جاساقتى وقيعا ورنىنا جۇمىلدىرىپ وقشاۋلاۋدى ۇيىم­داستىرعان. ۇلاندىقتار وقيعا ورنىنا كەلگەن پوليتسيا جانە ءورت ءسوندىرۋ ءبولىمىنىڭ قىز­مەتكەرلەرىمەن بىرلەسە وتىرىپ, الاپات ءورتتى اۋىزدىقتاپ, ادامدار مەن باعالى زاتتاردى قاۋىپسىز ورىنعا شىعارعان.

جەدەل جاردەم كورسەتتى

ۇلاندىق جاۋىنگەرلەر كا­ران­تيندىك شارالاردى, قۇ­قىق­­تىق ءتارتىپتى قامتاماسىز ەتۋ­مەن قاتار, تۇرعىندارعا مەدي­تسي­نالىق كومەك كورسەتىپ تە ۇلگەرىپتى. قىزمەت اتقارىپ جۇر­گەن اسكەري جاساق قان قىسىمى كوتەرىلىپ, ەسىنەن تانعان ادامدى ۋاقتىلى بايقاپ, جەدەل مە­ديتسينالىق جاردەم كەلگەنشە العاشقى كومەك كورسەتكەن. لەي­تە­نانت ابىلايحان فازىل­حا­نوۆ, قاتارداعى ەراسىل ايت­باي جانە سانيتارلىق اعا نۇس­قاۋ­شى ەفرەيتور ابىلايحان اقپانبەتوۆتەر اقساقالدىڭ العىسىن الدى.

 – ءوزىم مىرزاكەنتتىڭ تۇر­عى­نى­مىن. كوپ جىلدان بەرى وسىندا تۇرامىن. ازداپ سىرقاتتانىپ قالاتىنىم بار ەدى. بۇل جولى تىپتەن ناشار حالگە ءتۇستىم. اۋى­لى­مىزدى سۋ باسىپ, مۇلكىمىز سۋ اتىندا قالعان ەدى. مال-جاي بار­لىعى جوعالدى. وسىنى ويلاپ ۋايىمداعانىم سونشالىق, قان قىسىمىم كوتەرىلىپ كەتىپتى. قۋانىشىما وراي, ۇلاندىق جاۋىنگەرلەر قاسىمنان تابىلدى. ايتپەسە وسىندا وتىرار-وتىرماسىم ەكىتالاي ەدى. دۇنيە بايلىعى ەمەس, ادام ءومىرى, ەل ىنتىماعى ماڭىزدى ەكەن. ساربازدار ماعان وسىنى ۇعىندىردى. ولارعا العىسىم شەكسىز, – دەيدى اۋىل اقساقالى ەدۋارد كيم.

بۇل تۇرعىدان كەلگەندە 28237 اسكەري ءبولىمىنىڭ جاۋىن­گەرلەرى دە قالىس قالعان جوق. 1-ءشى قۇتقارۋ باتالونى كومان­ديرىنىڭ تەحنيكا جانە ماتەريالدىق قامتاماسىز ەتۋ بويىنشا ورىنباسارى ما­يور باۋىرجان جۇمابەكوۆ جانە 2-ءشى قۇتقارۋ روتاسىنىڭ بولىمشە كومانديرى قاتارداعى باعلان نۇري جەڭىس اۋىلىنىڭ قاسىنان تۇتىندەگەن كولىكتى بايقايدى. شەتەلدىك كولىك يەسى تاس جولمەن كەلە جاتقاندا ويپاتتى جەرگە كولىكتىڭ استى ۇرىلىپ, ماشي­ناسى توقتاپ قالعان ەكەن. تەز ارادا كولىكتەن ءتۇتىن شىعا­دى. وسى ساتتە ۇلاندىق اسكەري قىز­مەتشىلەر كەلىپ, كولىكتىڭ ءورتىن سوندىرەدى. باتالون كومان­ديرىنىڭ تاربيە جانە الەۋ­مەت­تىك-قۇقىقتىق جۇمىستار جو­نىن­دەگى ورىنباسارى كاپيتان ابزال ەلقوندىنىڭ ايتۋىنشا, كولىكتى جالىن ءاپ-ساتتە شارپىعان. ونى ۋاقتىلى توق­تات­پاسا, كولىك شىرپىداي جانىپ كەتەدى ەكەن. ونىڭ ۇستىنە, اتالعان كولىك گاز قون­دىر­عى­لا­رىمەن قامتاماسىز ەتىلگەن. جا­رىلىسقا جول بەرىلسە, ونىڭ سال­دارىن الىسقا بارماي-اق با­عام­داۋعا بولار ەدى.

 مىنە, بايقاپ تۇرساق ۇلتتىق ۇلان اسكەري قىزمەتكەرلەرىنىڭ قىزمەتى قارىمدى, رۋحى ءور, جانارلارى جالىندى. تەك, وتانعا دەگەن رياسىز سۇيىسپەنشىلىك پەن اسكەري انتقا دەگەن شەكسىز ادالدىق ەلىمىزدى سان ءتۇرلى قا­تەر­لەردەن الىپ شىعىپ, بيىك مەجەلەرگە جەتكىزەدى. ەلى­مىز وسىنداي قيىن-قىستاۋ, قى­سىل­­تاياڭ كەزەڭدە تۇرعاندا جۇرە­گىن­دە تۇگى, قولىندا قۋاتى بار ۇلان­دىق­تاردىڭ ۋاقىتىلى كومەگى ەلدى ءولارا ساتتەن جارىققا الىپ شىعا­تىنىنا سەنىمدىمىز.

دارىن سەيىتوۆ,

كاپيتان