قوعام • 13 مامىر، 2020

«5-10-20»: باسپانا تۇرعىن ءۇي كەزەگىندە تۇرعاندارعا بەرىلەدى

452 رەت كورسەتىلدى

الداعى ۋاقىتتا تۇرعىن ءۇي قۇرىلىس جيناق بانكى «نۇرلى جەر» باعدارلاماسىنىڭ جاڭا باعىتى رەتىندە «5-10-20» پيلوت جوباسىن ىسكە قوسادى. اتالعان يپوتەكالىق باعدارلاماعا تۇرعىن ۇيگە مۇقتاج رەتىندە جەرگىلىكتى اتقارۋشى ورگانداردا ەسەپتە تۇرعان ازاماتتار قاتىسا الادى.

پرەزيدەنت قاسىم-جومارت توقاەۆتىڭ تاپسىرماسى بويىنشا ىسكە قوسىلاتىن جاڭا جوبانىڭ شارتتارى قولجەتىمدى. نەسيە مولشەرلەمەسى 5%-دى قۇرايتىن، باستاپقى تولەنەتىن جارنا 10% بولاتىن نەسيەلەندىرۋ مەرزىمى 20 جىلعا ارنالعان يپوتەكالىق باعدارلاماعا تۇرعىن ءۇي كەزەگىندە تۇرعان باسپاناعا مۇقتاج ازاماتتار قاتىسا الادى. باسپانانى «نۇرلى جەر» باعدارلاماسىنىڭ اياسىندا سالىنعان جاڭا تۇرعىن ءۇي كەشەندەرىنەن، جەكە قۇرىلىس سالۋشىلاردان دا ساتىپ الۋعا بولادى.

تۇرعىن ءۇي قۇرىلىس جيناق بانكى ءباسپاسوز قىزمەتى تاراتقان مالىمەت بويىنشا قازىرگى ۋاقىتتا اتالعان باعدارلاما دايىندىق ۇستىندە. دەسە دە، الدىن الا مالىمەت بويىنشا باسپانا قۇنى نۇر-سۇلتان، الماتى جانە وسى قالالاردىڭ ماڭىنداعى ايماقتار ءۇشىن 18 ملن اسپايدى. اتىراۋ، اقتاۋ، اقتوبە، تۇركىستان جانە قاراعاندى وبلىستارى، سونداي-اق شىمكەنت قالاسى ءۇشىن 15 ملن تەڭگە بولسا، باسقا ايماقتار ءۇشىن 12 ملن تەڭگەدەن اسپاۋى ءتيىس.

سونىمەن قاتار، اكىمدىك تاراپىنان سالىنعان باسپانالار 1 شارشى مەترى ءۇشىن الماتى قالاسىندا 240 مىڭ تەڭگەگە دەيىن، نۇر-سۇلتاندا جانە وسى قالا ماڭىنداعى ايماقتاردا 220 مىڭ تەڭگەگە دەيىن، شىمكەنت قالاسىندا جانە الماتى ماڭىنداعى ايماقتا 200 مىڭ تەڭگەگە دەيىن، اقتوبە، اتىراۋ، اقتاۋ، تۇركىستان جانە قاراعاندى وبلىستارىندا 180 مىڭ تەڭگەگە دەيىن، باسقا ايتماقتار بويىنشا 160 مىڭ تەڭگەگە دەيىنگى مەجە بەكىتىلگەن.

سونىمەن قاتار، تۇرعىن ۇيگە كەزەكتە تۇرعانداردىڭ ءتىزىمى بۇعان دەيىن اكىمدىكتەردە بولسا، ەندى بۇل قۇزىرەتتى جاڭادان قۇرىلاتىن «وتباسى بانكىنە» بەرۋ جوسپارلانىپ وتىر.

– ءوز كەزەگىندە «وتباسى بانكى» باسپاناسى جوق جانۇيالار ءۇشىن ء«بىر تەرەزە» قاعيداتى بويىنشا قىزمەت ۇسىناتىن بولادى، – دەپ اتاپ ءوتتى تۇرعىن ءۇي قۇرىلىس جيناق بانكى باسقارما ءتورايىمى ءلاززات يبراگيموۆا.

جىل باسىنداعى تىركەلگەن مالىمەت بويىنشا جەرگىلىكتى اتقارۋشى ورگانداردا 540 مىڭنان استام ادام ءۇي كەزەگىندە تۇر. ونىڭ ىشىندە 212،5 مىڭ ادام مەملەكەتتىك قىزمەتكەر، بيۋدجەتتىك ۇيىمداردا جۇمىس ىستەيتىندەر رەتىندە تىركەلگەن. تىزىمدەگى تولىق ەمەس وتباسىلار 120،5 مىڭ ادام، اتا-اناسىز قالعان  60،8 مىڭ بالا، 1 جانە 2-توپتاعى مۇگەدەكتەر 43،5 مىڭ ادام، مۇمكىندىگى شەكتەۋلى بالا تاربيەلەپ وتىرعان وتباسىلار 21،1 مىڭ ادام، زەينەتكەرلەر – 18 مىڭ ادام، باسقا ساناتتار بويىنشا 16 مىڭ ادام تىركەلىپ وتىر.

سوڭعى جاڭالىقتار

ۇقساس جاڭالىقتار