البەتتە بۇرىن وتاندىق ءبىلىم بەرۋ سالاسىنىڭ تاجىريبەسىندە بولماعان جاڭا فورماتقا كوشۋ كىمگە دە بولسىن وڭايعا سوققان جوق. دەسە دە ءبىزدىڭ كوللەدج قاشىقتان وقۋعا ءبىرازدان بەرى بەت بۇرعان بولاتىن. كوللەدج باسشىسى باقىتجان سايلىباەۆتىڭ بۇدان ءبىراز ۋاقىت بۇرىن وقۋ ورنىنىڭ بارلىق قۇجات اينالىمىن تسيفرلاندىرۋعا تۇبەگەيلى كوشىرگەنى كوپ كومەك بولدى. سونىڭ ناتيجەسىندە بۇل جاعدايدا ءبىز اسا قينالمادىق. وقۋلىقتار مەن لەكتسيالار قورىن جاساقتاپ, جۇيەگە ەنگىزدىك. سوندىقتان دا ماتەريالدىڭ نەگىزى دايىن بولدى.
بۇدان بولەك ق.توقاەۆ زاماناۋي قاشىقتان وقىتۋ تەحنولوگيالارىن جىلدامداتىپ ەنگىزۋدى, ءبىلىم بەرۋ باعدارلامالارىنىڭ مازمۇنىن قايتا قاراپ, ولاردى قولجەتىمدى جانە ينتەراكتيۆتى ەتۋدى تاپسىردى. بۇل رەتتە كوللەدجىمىزدىڭ ارنايى ەلەكتروندى جۇيەسى ءبىراز جىلدان بەرى جۇمىس ىستەپ كەلە جاتقانىن ايتا كەتۋ كەرەك. E-college جۇيەسى بىزگە ءار ستۋدەنتتىڭ جۇمىسىن ءجىتى باقىلاۋعا كومەكتەسەدى. سونىمەن قاتار ستۋدەنتتەرگە بەرىلەتىن پراكتيكالىق, تەوريالىق تاپسىرمالاردى جانە ءوزىمىز تۇسىرگەن ۆيدەو لەكتسيالاردى وسى جۇيەگە جۇكتەيمىز. كۋرستىق جۇمىستاردى zoom پلاتفورماسى ارقىلى قابىلداپ وتىرمىز. ال ينتەرنەتى ناشار شالعاي ەلدى مەكەندەردەگى ستۋدەنتتەرگە كۋرستىق جۇمىستارىن WhatsAPP جەلىسى ارقىلى دا قورعاۋعا مۇمكىندىك بەرىپ جاتىرمىز.
شىندىعىندا قاشىقتان وقىتۋ – زامان تالابى, وعان ىلەسۋىمىز كەرەك. جاستار جاعى جاڭالىققا بەيىم كەلەدى عوي, ستۋدەنتتەرىمىز جاڭا فورماتتىڭ وزدەرىنە وتە ىڭعايلى ەكەنىن ايتادى. سەبەبى وتەتىن تاقىرىپتى الدىن الا كورە الادى, ماتەريالدار كوز الدىندا تۇر. بۇدان ءبىلىم الۋشىلاردىڭ ىنتاسى, ىزدەنىسى ارتتى, ۇلگەرىم كورسەتكىشتەرى تومەندەمەدى. ياعني ستۋدەنتتەردىڭ ساپالى ءبىلىم الۋى ءۇشىن بارلىق جاعدايدى جاساپ وتىرمىز.
ۇلجان ەسماحانوۆا,
م.مامەتوۆا اتىنداعى قىزىلوردا پەداگوگيكالىق جوعارى كوللەدجىنىڭ وقىتۋشىسى
قىزىلوردا وبلىسى
