ق.توقاەۆ قازاقستاندىقتار بىرتىندەپ قالىپتى ومىرگە ورالادى دەگەن ءۇمىت ءبىلدىردى. توتەنشە جاعداي رەجىمىنىڭ اياقتالۋىن ءبارىمىز اسىعا كۇتكەنىمىزدى ايتۋدىڭ دا قاجەتى جوق شىعار.
فرانتسۋز جازۋشىسى جانە اسكەري ۇشقىش انتۋان دە سەنت-ەكزيۋپەري ءوزىنىڭ «ادامدار جەرى» (1939 ج.) اتتى ەڭبەگىندە: «ناعىز بايلىق, بۇل – ادامدار اراسىنداعى قارىم-قاتىناس», دەپ جازعان. قازاقستانداعى توتەنشە جاعدايدىڭ 50 كۇننەن استام ۋاقىتقا سوزىلۋ كەزەڭىندە, اتاقتى فرانتسۋزدىڭ الگى دايەكسوزىنىڭ دۇرىستىعىنا ءبارىمىزدىڭ كوزىمىز جەتتى... تۋىستارىمىزبەن, دوستارىمىزبەن, كورشىلەرىمىزبەن, ارىپتەستەرىمىزبەن, COVID-19-عا دەيىن كۇندەلىكتى قارىم-قاتىناستا بولعان بارلىق اداممەن كوزبە-كوز جۇزدەسسەك دەگەن تىلەك سانامىزدى جاۋلاپ الدى. ويتكەنى Zoom, سكايپ, تەلەفون بىزگە قاشىقتان, الىستان بايلانىسۋعا مۇمكىندىك بەرگەنمەن, اداممەن تىكەلەي قارىم-قاتىناس جاساۋدى الماستىرا المادى.
وقشاۋلانۋ وتباسىلىق قارىم-قاتىناس بەرىكتىگىنىڭ, سترەسكە قارسى تۇرۋدىڭ, ءوزىڭنىڭ جانە باسقانىڭ ءومىرى ءۇشىن جاۋاپكەرشىلىكتىڭ, ەرەجەلەرگە باعىنۋدىڭ, دۇربەلەڭگە بوي الدىرماۋ جانە ونى تاراتپاۋدىڭ كۇردەلى سىناعىنا اينالدى. ءبىزدىڭ ارقايسىمىزدا كارانتين كەزىندە باستان وتكەرگەن پسيحولوگيالىق سىناقتارىمىزدىڭ, جوعالتقاندارىمىز بەن تابىستارىمىزدىڭ وزىندىك ءتىزىمى, ەرەكشە تاجىريبەسى بار دەپ ويلايمىن.
مەملەكەت باسشىسىنىڭ 19 ناۋرىزداعى توتەنشە جاعدايدى ەنگىزۋ جانە ودان ءارى ۇزارتۋ تۋرالى شەشىمدەرىنىڭ سەبەبىمەن ءبىز الەمدە جاساي الماعان ماڭىزدى ناتيجەگە قول جەتكىزدىك, ياعني قاۋىپتى ۆيرۋستىڭ تارالۋ جىلدامدىعىن ازايتتىق.
قازاقستاندا اۋقىمدى جۇمىس اتقارىلۋىنىڭ, بۇرىن-سوڭدى بولماعان ۇيىمداستىرۋشىلىق, قارجىلىق شارالار قابىلدانۋىنىڭ, ادامي رەسۋرستار مەن ازاماتتاردىڭ قولداۋىنىڭ ارقاسىندا توتەنشە جاعدايدى 11 مامىردا توقتاتۋ جوسپارلانعان ەدى. مىنە, بۇل جۇزەگە اسىرىلدى.
ءبىزدىڭ ازاماتتارىمىزدىڭ, دارىگەرلەرىمىزدىڭ ءومىرى مەن دەنساۋلىعىنىڭ وتەۋىمەن, الاپات كۇش-جىگەردىڭ ارقاسىندا اۋىزدىقتالعان COVID-19-دىڭ بۇدان ءارى تارالۋىنا ەشقانداي مۇمكىندىك بەرىلمەۋى ءۇشىن بارلىعىن جاساۋ كەرەك. ءبىز نە ىستەۋ كەرەكتىگىن جاقسى ۇيرەنىپ الدىق: بەتپەردە كيۋ, جۇمىس ورنىن دەزينفەكتسيالاۋ, قولدى جۋ, الەۋمەتتىك قاشىقتىقتى, اسىرەسە ادام كوپ جينالاتىن جەرلەردە ساقتاۋ, بارلىق تۋىستى ارالاۋدى, كەڭ-بايتاق ەلىمىزدىڭ بارلىق قالالارى مەن اۋىلدارىنان اعايىن-تۋىستى جيناۋدى شەكتەۋ. بىزگە توتەنشە جاعدايدان شىعۋدىڭ توتە جولى كارانتين شارالارىن قاتاڭ ساقتاۋ بولدى.
ارينە, توتەنشە جاعداي كەزىندە تالاپتارعا كۇمانمەن قاراعان جانە ولاردى ءتۇرلى جولدارمەن بۇزعان جاندار كەزدەستى. وسى ورايدا, اكىمشىلىك ماجبۇرلەۋ, الەۋمەتتىك ايىپتاۋ جانە باسقا ادامداردىڭ ءومىرى مەن دەنساۋلىعىنا نەمقۇرايدىلىقپەن قارايتىن ادامدارعا مۇلدەم توزبەۋشىلىك تانىتۋ ءبىزدىڭ جاڭا جاعدايداعى ءومىرىمىزدىڭ ماڭىزدى بولىگى بولۋى كەرەك.
كارانتين ءسوزى باستاپقىدا «قىرىق كۇننەن تۇراتىن ۋاقىت» دەگەندى بىلدىرەتىنىن ەندى كوپشىلىك بىلەدى (يتال. quaranta giorni – «قىرىق كۇن»). الايدا كارانتين كەزەڭدەرى ءارتۇرلى جانە ول بۇدان از نەمەسە الدەقايدا كوپ بولۋى مۇمكىن. ال ز ۇلىم COVID-19 جاعدايىندا, ءالى دە ءبىراز بەلگىسىز مەرزىمدە, دالىرەك ايتساق قانشا قاجەت بولسا, سونشا ۋاقىت بارلىق ساقتىق شارالارىن ورىنداۋىمىز قاجەت.
زارەما شاۋكەنوۆا,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى
