سۋرەتتى تۇسىرگەن ەرلان وماروۆ, EQ
ەكى ايعا جۋىق ۋاقىت وقشاۋلانۋ جاعدايىندا بولدىق. وسىدان نە تۇيدىك؟
بىرىنشىدەن, پرەزيدەنت قاسىم-جومارت توقاەۆ بارلىق قاجەتتى شارالاردى دەر كەزىندە جاسادى. توتەنشە جاعداي رەجىمىن ەنگىزۋ ارقىلى ىندەتتىڭ جاپپاي تارالۋىنىڭ جولى كەسىلدى.
ەكىنشىدەن, توتەنشە جاعداي رەجىمىن قامتاماسىز ەتۋ جونىندەگى مەملەكەتتىك كوميسسيا شىن مانىندە وتە اۋقىمدى جۇمىس اتقاردى. حالىقتىڭ دەنساۋلىعىن قورعاۋ, ولاردىڭ تابىسىن ارتتىرۋ جانە بيزنەسىن قولداۋ ءۇشىن 500-گە جۋىق شەشىم قابىلدانىپ, جۇزەگە اسىرىلدى.
ۇشىنشىدەن, دەنساۋلىق ساقتاۋ سالاسىنىڭ قىزمەتكەرلەرى اۋىر سىناق الاڭىندا ادال قىزمەت اتقاردى. كۇن دەمەي, ءتۇن دەمەي, اسقان جانقيارلىقپەن ىندەتكە قارسى ارپالىستى.
تورتىنشىدەن, حالقىمىز اۋىزبىرشىلىك پەن تۇتاستىق ونەگەسىن كورسەتتى. تارتىپكە ءسوزسىز باعىنىپ, ءتيىستى ساقتىق شارالارىن جاساۋ, وقشاۋ رەجىمدە ءومىر ءسۇرۋ شارتتارىنا كوندىكتى. سابىر مەن سەنىمدى سەرىك ەتتى.
ىندەت تولىعىمەن جويىلماعانىن ەسكەرۋ قاجەت. قاۋىپتىڭ بەتى ءالى تولىق سەيىلمەگەن سياقتى. مەملەكەت باسشىسى «ىندەتتىڭ ەكىنشى كەزەڭى باستالىپ كەتۋى مۇمكىن. سوندىقتان ءوزىمىزدىڭ امان-ساۋلىعىمىزعا, ەڭ الدىمەن, ءوزىمىز جاۋاپتى بولۋىمىز كەرەك. ىندەت قايتا ورشىگەن جاعدايدا ۇكىمەت ناقتى شۇعىل ءىس-قيمىل جوسپارىن دايىندايدى», دەپ مالىمدەدى. سوندىقتان اۋا جايىلماي, ءتارتىپ پەن ساقتىق شارالارىن ساقتاۋ وتە ماڭىزدى.
ەندى توتەنشە جاعداي رەجىمىن قامتاماسىز ەتۋ جونىندەگى كوميسسيا ەكونوميكالىق ءوسىمدى قالپىنا كەلتىرۋ جونىندەگى مەملەكەتتىك كوميسسيا بولىپ قايتا قۇرىلاتىن بولدى. بۇل – دۇرىس شەشىم.
سونىمەن قاتار ەكونوميكانىڭ بىرقاتار سالاسى تۇرالاپ قالعانى شىندىق. ەڭبەككە جارامدى حالىقتىڭ جارتىسىنا جۋىعىنىڭ تابىسى ازايدى. ىندەتتىڭ باستالۋى ناعىز قازاقتىڭ «ۇزىنسارى» – جۋاننىڭ جىڭىشكەرىپ, جىڭىشكەنىڭ ۇزىلەر شاعىنا تاپ كەلدى. ەگىن ەگۋ, مال باعۋ, ءوندىرىس ورىندارىنىڭ جۇمىسىن رەتتەۋ ماسەلەلەرىندە ءبىراز قيىندىق تۋىنداۋى مۇمكىن. پرەزيدەنت: «ازاماتتاردى قولداۋ مەن بيزنەستى دامىتۋعا ارنالعان وسى جانە باسقا دا شارالاردى جۇزەگە اسىرۋ ءۇشىن ەكونوميكالىق ءوسىمدى قايتا قالپىنا كەلتىرۋ جونىندەگى كەشەندى جوسپار ازىرلەنىپ جاتىر. بۇل جوسپار جۋىق ارادا بەكىتىلەدى», دەپ بۇل تاراپتا ءبارى ەسكەرىلەتىنىن جەتكىزدى.
تاعى ءبىر قۋاناتىن ماسەلە – پرەزيدەنت «5-10-20» جاڭا تۇرعىن ءۇي جوباسى قابىلداناتىنىن ايتتى. بۇل باسپاناسىز جۇرگەن تالاي ادامنىڭ كەۋدەسىنە ءۇمىت وتىن ۇيالاتتى.
ءبىر سوزبەن ايتقاندا, جاعداي باقىلاۋدا. مەملەكەت قاجەت شارالاردىڭ ءبارىن جاساپ جاتىر. بىزگە سابىر مەن ءتوزىم قاجەت. سوسىن ءالى دە اباي بولۋ كەرەك.
نۇرتورە ءجۇسىپ,
پارلامەنت سەناتىنىڭ دەپۋتاتى
