ەلىمىزدىڭ بارلىق ايماقتارىنان جۇمىسپەن قامتۋ ورتالىقتارىنىڭ 1500 قىزمەتكەرى ترەنينگتەرگە قاتىسىپ, قاشىقتان وقۋدان ءوتتى. دارىستەردە جۇمىسسىزدارمەن جەكەلەي جۇمىس ىستەۋ ادىستەرى, جۇمىسسىز ازاماتتاردىڭ تۇراقتى جۇمىسقا ورنالاسقانعا دەيىن كومەك كورسەتۋ ماسەلەلەرى قاراستىرىلدى. سونداي-اق جۇمىس ىزدەگەن ازاماتتاردى كاسىبي باعدارلاۋ, كاسىبي اقپاراتتاندىرۋ جانە كەڭەس بەرۋ ادىستەمەلەرىنە ەرەكشە نازار اۋدارىلدى.
جۇمىسپەن قامتۋ ورتالىقتارىنىڭ قىزمەتكەرلەرى جۇمىس بەرۋشىلەرمەن تىعىز ىنتىماقتاستىقتى ورناتۋ جانە قولداۋ تەتىكتەرىن, بوس جۇمىس ورىندارىنىڭ بەيىنىن قالىپتاستىرۋ جانە ۇمىتكەردىڭ جۇمىس بەرۋشىنىڭ تالاپتارىنا سايكەستىگىن باعالاۋ ادىستەرىن زەردەلەدى.
جۇمىسپەن قامتۋ ورتالىقتارى ەڭبەك نارىعىنداعى جاعداي بويىنشا جانە وڭىرلەردە ەڭبەك رەسۋرستارىن بولۋگە قاتىستى اقپارات كوزى بولۋعا ءتيىس. وسى ماقساتتا سەمينارلاردا ەڭبەك نارىعىن قىسقا مەرزىمدى بولجاۋ جانە مونيتورينگ جاساۋ ادىستەرى مەن الگوريتمدەرى كەڭىنەن وقىتىلدى.
«جۇمىسپەن قامتۋ قىزمەتىن رەفورمالاۋ اياسىندا قازىرگى زامانعى جۇمىس ادىستەرىن ءتيىمدى قولدانۋ ءۇشىن باسشىدان باستاپ, قاتارداعى مەنەدجەرلەرگە «جاڭا ءبىلىم مەن داعدى» قاجەت. قىزمەتكەرلەردى كاسىبي دايارلاۋ مەن باعدارلاۋ قاجەتتىلىگى, اسىرەسە قازىر وزگەرمەلى ەڭبەك نارىعى جاعدايىندا ءوستى», دەپ اتاپ ءوتتى «ەڭبەك رەسۋرستارىن دامىتۋ ورتالىعى» اق جۇمىسپەن قامتۋ قىزمەتىن دامىتۋ دەپارتامەنتىنىڭ ديرەكتورى يرينا رۋباشينا.
جۇمىسپەن قامتۋ ورتالىقتارىنىڭ باسشىلارى دا قاشىقتان وقىتۋ فورماتىندا ورتالىقتاعى وزگەرىستەردى ءتيىمدى باسقارۋ جانە ءتۇرلى قيىندىقتاردان شىعۋ جولدارىن تابۋعا كومەكتەسەتىن ءتۇرلى تەحنولوگيالار مەن قۇرالداردى وقىدى. ال ورتالىقتاردىڭ قىزمەتكەرلەرى دەربەس ىزدەۋ, باعالاۋ, ىرىكتەۋ, جوعارىلاتۋ جانە قايتا دايارلاۋ ادىستەرىن زەرتتەدى.
«جۇمىسپەن قامتۋ ورتالىقتارىنىڭ قىزمەتكەرلەرىن دايارلاۋ تۇراقتى نەگىزدە جۇرگىزىلۋى ءتيىس, سوندىقتان وقىتۋدىڭ كەشەندى جۇيەسىن ازىرلەۋ قاجەت. وقىتۋ كاسىبي جانە جەكە داعدىلاردى دامىتۋعا باعىتتالىپ, ءارتۇرلى فورماتتاردا جۇرگىزىلۋى ءتيىس. وسىنداي فورماتتاردىڭ ءبىرى – جۇمىسپەن قامتۋ ورتالىعى بازاسىندا ىشكى وقىتۋلاردى جۇرگىزۋ» دەپ اتاپ ءوتتى يرينا رۋباشينا.
جوبا اياسىندا ىشكى وقىتۋشىلاردى دايارلاۋ ءۇشىن ءار وبلىستان جۇمىسپەن قامتۋ ورتالىعىنىڭ قىزمەتكەرلەرى ىرىكتەلىپ الىندى. بولاشاق جاتتىقتىرۋشىلار ترەنينگتەردى وتكىزۋ جوسپارلارى مەن ادىستەرىن, تىڭداۋشىلار ءۇشىن تاجىريبەلىك تاپسىرمالاردى جانە پرەزەنتاتسيالاردى دايىنداۋ, ترەنينگتەرگە قاتىسۋشىلاردى وقىتۋ ۇدەرىسىنە بەلسەندى تارتۋ ءۇشىن جاعداي جاساۋ تۋرالى جانە تاعى باسقا بازالىق ءبىلىم الدى.
ەڭبەك جانە حالىقتى الەۋمەتتىك قورعاۋ مينيسترلىگى مەن جەرگىلىكتى اتقارۋشى ورگاندارى حالىقتى جۇمىسپەن قامتۋ ورتالىقتارى قىزمەتىنىڭ «جاڭا مودەلىن» كەزەڭ-كەزەڭىمەن ەنگىزۋدى جوسپارلاپ وتىر. جاقىن بولاشاقتا اتالعان ورتالىقتار جۇمىسپەن قامتۋ تاۋەكەلدەرىنە قاتىستى جەدەل جانە بەلسەندى ارەكەت ەتەتىن, ازاماتتاردىڭ كاسىبي الەۋەتىن ىسكە اسىرۋعا جاردەمدەسەتىن جانە جۇمىس بەرۋشىلەردىڭ كادر رەسۋرستارىنا قاجەتتىلىگىن قاناعاتتاندىراتىن زاماناۋي ورتالىقتار بولادى.
ەسكە سالساق, «ەڭبەك داعدىلارىن دامىتۋ جانە جۇمىس ورىندارىن ىنتالاندىرۋ» جوباسىن ەڭبەك جانە حالىقتى الەۋمەتتىك قورعاۋ مينيسترلىگى مەن دۇنيەجۇزىلىك بانك جۇزەگە اسىرادى.
