بۇگىن, 24 قىركۇيەك كۇنى استانادا قازاقستان كوممۋنيستىك حالىق پارتياسىنىڭ جاڭا رامىزدەرىن تانىستىرۋ ءراسىمى ءوتتى.
قازاقستان كوممۋنيستىك حالىق پارتياسى ۇستىمىزدەگى جىلدىڭ 1 ماۋسىمىندا VIII كەزەكتەن تىس سەزد وتكىزىپ, وندا پارتيانىڭ نورماتيۆتىك قۇقىقتىق قۇجاتتارىن, جاڭا باعدارلاماسى مەن جاڭا جارعىسىن قابىلداعان بولاتىن. سول وزگەرىستەردىڭ اياسىندا, زامان تالابىنا ساي ىلگەرىلەۋ ماقساتىمەن كوممۋنيستىك حالىق پارتياسى رامىزدەرىن جاڭارتۋدى ءجون كوردى. تانىستىرۋ بارىسىندا پارلامەنت ءماجىلىسىنىڭ دەپۋتاتى, الەۋمەتتىك-مادەني دامۋ كوميتەتىنىڭ مۇشەسى, كوممۋنيستىك حالىق پارتياسى ورتالىق كوميتەتىنىڭ حاتشىسى جامبىل احمەتبەكوۆ جاڭا رامىزدەردىڭ ءمان-ماعىناسىن ءتۇسىندىرىپ ءوتتى.
«جاڭا رامىزدە بەينەلەنگەن بەسبۇرىشتى جۇلدىز – پارتيانىڭ ەڭ ناقتى پريوريتەتتەرىن بەلگىلەيدى. ول حالىق بيلىگى, ەڭبەك قۇقىعى, الەۋمەت ادىلەتتىگى, ساياسي تەڭدىك پەن ينتەرناتسيونالدىلىق», – دەدى ول.
«قازاقستان كوممۋنيستىك حالىق پارتياسى» قوعامدىق بىرلەستىگى – كوممۋنيستىك يدەيانى قولدايتىن قازاقستان رەسپۋبليكاسى ازاماتتارىنىڭ بىرىككەن ەرىكتى بىرلەستىگى. ول كوممۋنيستىڭ يدەيالاردى قورعاۋمەن قاتار, جۇمىسشى تاپتىڭ, شارۋالاردىڭ, ينتەلەگەنتسيانىڭ جانە بارلىق ەڭبەك ادامدارىنىڭ مۇددەلەرىن قورعايدى.
قازاقستان كوممۋنيستىك حالىق پارتياسى 2004 جىلدىڭ 21 ماۋسىمىندا قۇرىلدى. بۇگىنگى تاڭدا پارتيا قۇرامىندا 100 مىڭعا جۋىق ادام بار. ولاردىڭ 22 مىڭ 500-ءى جاستار بولىپ تابىلادى. بۇل كوممۋنيستىك حالىق پارتياسىنىڭ يدەياسى جاستار اراسىندا دا قولداۋ تاۋىپ وتىرعاندىعىنىڭ ايقىن بەلگىسى. كوممۋنيستىك حالىق پارتياسى ورتالىق كوميتەتىنىڭ حاتشىسى جامبىل احمەتبەكوۆ ءسوز سوڭىندا پارتيانىڭ رامىزدەرى وزگەرگەنىمەن ونىڭ يدەولوگياسى وزگەرمەيتىنىن العا تارتتى.
ايدار ورىسباەۆ.
