بۇگىن, قىركۇيەكتىڭ 24-ءى كۇنى تاڭەرتەڭ الماتى قالاسىندا كەڭەس وداعىنىڭ باتىرى, «حالىق قاھارمانى», تاۋەلسىز قازاقستاننىڭ تۇڭعىش قورعانىس ءمينيسترى ساعادات نۇرماعامبەتوۆ دۇنيەدەن ءوتتى.
ساعادات قوجاحمەت ۇلى 1924 جىلدىڭ 25 مامىرىندا اقمولا وبلىسىنىڭ ەڭبەك اۋىلىندا تۋعان. 1942 جىلى قىزىل اسكەر قاتارىنا الىنىپ, تۇركىمەنستانداعى اسكەري ۋچيليششەگە ءبىلىم الۋعا جولدامامەن جىبەرىلەدى. وقۋدى اياقتاعان 1943 جىلى ۇلى وتان سوعىسىنا قاتىسىپ, پۋلەمەتشىلەر ۆزۆودىنىڭ كومانديرى رەتىندە جاۋمەن شايقاسادى. سوعىس اياقتالىسىمەن 1946 جىلى م.ي. فرۋنزە اتىنداعى اسكەري اكادەمياعا ءتۇسىپ, ونى 1949 جىلى تامامداعان. ال 1950-1989 جىلدارى ازاماتتىق قورعانىس شتابىنىڭ باستىعى, ورتا ازيا اسكەري وكرۋگى اسكەرلەرى باستىعىنىڭ ورىنباسارى, وڭتۇستىك اسكەر توبى (ۆەنگريا) باستىعىنىڭ ءبىرىنشى ورىنباسارى بولدى. 1990 جىلدان سوعىس, ەڭبەك جانە قارۋلى كۇشتەرى ارداگەرلەرى كەڭەسىنىڭ توراعاسى, 1992-1995 جىلدارى قورعانىس ءمينيسترى, ال 1996 جىلى پرەزيدەنت كەڭەسشىسى قىزمەتىن اتقاردى. 1994 جىلدىڭ 23 مامىرىندا مەملەكەت باسشىسىنىڭ جارلىعىمەن ساعادات قوجاحمەت ۇلىنا «حالىق قاھارمانى» اتاعى بەرىلىپ, ەلىمىزدە العاشقى بولىپ «التىن جۇلدىز» وردەنىن يەلەندى. ال1971-1994 جىلدارى جوعارى كەڭەسكە بىرنەشە مارتە حالىق قالاۋلىسى بولىپ سايلانعان.
ەسىمى تاريحىمىزعا التىن ارىپپەن جازىلعان ساعادات قوجاحمەت ۇلىن بولگاريا, پولشا, چەحيا, مونعوليا سىندى بىرنەشە ەلدەر دە ناگرادامەن ماراپاتتادى.
