«قازاقستاندىقتاردى وتان قورعاۋشى كۇنىمەن قۇتتىقتايمىن!
وتاندى قورعاۋ - ءبىزدىڭ حالقىمىز ءۇشىن قاشان دا قاسيەتتى پارىز, ابىرويلى مىندەت. ءبىزدىڭ باعزىدان جەتكەن سان عاسىرلىق تاريحىمىزدا كوزسىز ەرلىك پەن قاھارماندىقتىڭ, ەلى مەن جەرىن ءسۇيۋدىڭ, شىنايى ءپاتريوتيزمنىڭ جارقىن ۇلگىسى از ەمەس. تۋعان ولكەنىڭ تىنىشتىعىن قورعاپ وتكەن باتىر بابالارىمىزدىڭ جاۋىنگەرلىك ءداستۇرىن بۇگىندە تاۋەلسىز قازاقستاننىڭ قارۋلى كۇشتەرى لايىقتى جالعاستىرىپ كەلەدى.
ءبىزدىڭ اسكەرىمىز توتەنشە جاعداي كەزىندە بلوكپوستتاردىڭ جۇمىسىن قامتاماسىز ەتۋ, شەت مەملەكەتتەردەگى وتانداستارىمىزدى ەلگە جەتكىزۋ, اسكەري دالا گوسپيتالدارىن شۇعىل ورنالاستىرۋ جانە ت.ب. مىندەتتەردى ءتيىمدى شەشە وتىرىپ, اسكەري دايىندىق دەڭگەيىنىڭ جوعارى ەكەنىن كورسەتتى.
سونىمەن قاتار قازىرگىدەي كۇردەلى كەزەڭدە ۇلتتىق گۆارديانىڭ اسكەري قىزمەتشىلەرى, قۇقىق قورعاۋ جانە ارنايى مەملەكەتتىك ورگانداردىڭ قىزمەتكەرلەرى, اسكەري جيىندارعا شاقىرىلعان اسكەري مىندەتتى ازاماتتار جانە ءوزىنىڭ قىزمەتتىك بورىشىن وتەپ جۇرگەن بارلىق قازاقستاندىقتار اۋقىمدى دا ماڭىزدى جۇمىس اتقارۋدا.
بارشاڭىزعا مىقتى دەنساۋلىق, بەيبىت ءومىر مەن يگىلىك تىلەيمىن!
قازاقستان رەسپۋبليكاسىنىڭ پرەمەر-ءمينيسترى اسقار مامين».
