«قازىرگە دەيىن ەلىمىزدە كوروناۆيرۋس جۇقتىرعان 4298 ناۋقاس تىركەلدى. ناۋقاستاردىڭ جارتىسى الماتى مەن نۇر-سۇلتان قالالارىندا انىقتالدى. جالپى 1279 ناۋقاس جازىلىپ, ۇيلەرىنە شىعارىلسا, ستاتسيوناردا 2897 سىرقات ەم الۋدا. ال ولاردىڭ 85%-نىڭ جاعدايى قالىپتى, 14%-ى ورتاشا قالىپتى بولسا, 25 سىرقات اۋىر حالدە. 6 ناۋقاستىڭ جاعدايى وتە اۋىر, 7 سىرقات جاساندى دەمالۋ اپپاراتىنا قوسىلعان. ۆيرۋس تارالعاننان بەرى قازاقستاندا 30 ناۋقاس كوز جۇمدى. ناۋقاستارمەن بايلانىستا بولعان 59 204 ادام انىقتالىپ, ولاردىڭ 98%-ى وقشاۋلاندى», دەدى تيمۋر سۇلتانعازيەۆ.
كوميتەت توراعاسى ەلىمىزدە ەپيدەميالىق جاعدايدىڭ تۇراقتانىپ, ىندەتتىڭ تارالۋ دەڭگەيى تومەندەگەنىن جەتكىزدى. «وتكەن تاۋلىكتە 156 جاڭا جاعداي تىركەلدى. ءوسۋ دەڭگەيىندە ايتارلىقتاي تومەندەۋ ءۇردىسى بايقالادى. اتاپ ايتقاندا, ءساۋىر ايىندا ورتاشا ءوسىم 15-16% بولسا, سوڭعى ەكى اپتادا ول 7%-دان اسقان جوق. ال سوڭعى 3 كۇندە ىندەتتىڭ تارالۋ دەڭگەيى – 4%. مۇنىڭ بارلىعى مەملەكەتتىك كوميسسيا مەن باس سانيتارلىق دارىگەردىڭ باقىلاۋىندا. كارانتيندى جويۋدىڭ ناقتى ولشەمدەرى بار. بۇعان قول جەتكىزۋ ءۇشىن حالىق دەنساۋلىق ساقتاۋ مينيسترلىگى ۇسىنعان شارالاردى ورىنداۋى كەرەك», دەدى ول.
قازىرگە دەيىن انىقتالعان ناۋقاستاردىڭ جارتىسىنان كوبى ەلىمىزدە جاپپاي تەستىلەۋ جۇرگىزۋدىڭ ناتيجەسىندە انىقتالعان. وسىنى ايتقان تيمۋر سۇلتانعازيەۆ كارانتين ەرەجەلەرى دۇرىس ساقتالماسا ىندەت قايتادان لاپ بەرۋى دە مۇمكىن ەكەنىن ايتتى. «بۇگىنگى كۇنگە دەيىن تىركەلگەن ناۋقاستاردىڭ 57%-ى سكرينينگ كەزىندە, 36%-ى مەديتسينالىق كومەككە جۇگىنۋ بارىسىندا انىقتالسا, ال 7,2%-ى تاسىمالداۋشىلار ارقىلى جۇقتىرعان. بۇل جاڭا ۆيرۋس. ەكىنشى تولقىننىڭ پايدا بولاتىن-بولمايتىنىنا ناقتى جاۋاپ بەرۋ وتە قيىن. ءبىز كەيبىر مەملەكەتتەردە اۋرۋدىڭ قايتا باس كوتەرگەنىن كورىپ وتىرمىز. سوندىقتان كارانتين ەرەجەلەرى قاتاڭ ساقتالۋى كەرەك», دەدى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ توراعاسى.
سوڭعى ۋاقىتتا الەۋمەتتىك جەلىلەردە حالىقتى جاپپاي ۆاكتسيناتسيالاۋ تۋرالى فوتوسۋرەتتەر مەن اۋديو حابارلامالار تاراۋدا. نۇرشاي ازىمباەۆا بۇل اقپاراتتاردىڭ جالعان ەكەنىن ايتتى. «وسىعان بايلانىستى مەن بارلىق ازاماتتى الەۋمەتتىك جەلىلەردەگى بەيرەسمي اقپاراتتارعا سەنبەۋگە جانە تاراتپاۋعا, تەك رەسمي اقپارات كوزدەرىن نەگىز ەتۋگە شاقىرامىن. جالعان اقپارات تاراتقان ادامداردىڭ جاۋاپكەرشىلىككە تارتىلاتىنىن تاعى ءبىر رەت ەسكە سالعىم كەلەدى», دەدى ول.
ۆيرۋس جۇقتىرعان ناۋقاستارعا قانداي ەم-دوم جاسالىپ جاتقانىن حابارلاعان ارنۇر نۇرتاەۆ: «بۇگىندە قازاقستاندا كوروناۆيرۋستى ەمدەۋ پروتوكولىنا سايكەس ەنتەروۆيرۋستى پرەپاراتتاردان باستاپ انتيبيوتيكتەرگە دەيىن بىرقاتار پرەپارات قولدانىلادى. ولار ءوز ناتيجەسىن كورسەتتى. اتالعان ءدارى-دارمەكتەردىڭ بارلىعى دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسىمەن الىنعان. اپتا سايىن جاڭا ءدارى-دارمەك قوسىلىپ, كەيبىرى قولدانىستان الىنىپ جاتادى», دەدى.
ال بەرىك ءشارىپ ءۇندىستاننان الىناتىن ۆاكتسينالاردىڭ ساپاسىنا توقتالدى. ء«ۇندىستاننان مىندەتتى تۇردە قولداناتىن ءۇش ۆاكتسينا الامىز. ونىڭ بىرەۋى ادس-م ۆاكتسيناسى, ەكىنشىسى قىزىلشانىڭ الدىن الۋعا قولدانىلاتىن ۆاكتسينا, ال ءۇشىنشىسى تۋبەركۋلەزگە قارسى ۆاكتسينا. ءۇش ۆاكتسينا دا دۇنيەجۇزىلىك دەنساۋلىق ساقتاۋ ۇيىمىنىڭ الدىن الا تەكسەرىسىنەن وتكەن. ءوزىنىڭ ارنايى سەرتيفيكاتى بار جانە الەمنىڭ 70 مەملەكەتىندە قولدانىلادى. ولاردىڭ ناتيجەلىلىگى مەن قاۋىپسىزدىگى دالەلدەنگەن», دەدى ول.
