سۋ باسقان اۋماقتاردى ۇشىپ ارالاپ شىققاننان كەيىن, تۇركىستان وبلىسىنىڭ اكىمى ءو. شوكەەۆپەن جانە وزبەك ارىپتەستەرمەن بىرلەسىپ, مەملەكەتتىك كوميسسيا سۋ باسقان ورگەباس جانە فيردوۋسي اۋىلدارىنا باردى.
سونىمەن قاتار تۇركىستان وبلىسى ماقتاارال اۋدانىنىڭ اۋماعىنا وزبەكستان تاراپىنان 100-دەن استام ارنايى تەحنيكا (شىنجىر تاباندى جانە دوڭگەلەكتى تراكتورلار, موتوپومپالارمەن جابدىقتالعان ءورت ءسوندىرۋ ماشينالارى) جانە 200 ادام جەتكىزىلدى, ولاردىڭ ىشىندە گيدروتەحنيكا ماماندارى دا بار.
ماقتاارال اۋدانىنداعى جاعدايمەن تانىسۋعا پرەمەر-ءمينيستردىڭ ورىنباسارى رومان سكليار كەلىپ, وبلىس باسشىسى ومىرزاق شوكەەۆپەن بىرگە سۋ باسقان اۋىلداردى ارالاپ, ەلدى مەكەن تۇرعىندارىمەن كەزدەستى. اقساقالدارمەن سويلەسىپ, تۇرعىنداردىڭ مۇڭ-مۇقتاجىن تىڭداعان مەملەكەتتىك كوميسسيا مۇشەلەرى مىرزاكەنت ەلدى مەكەنىندە جينالىس وتكىزدى.
تۇركىستان وبلىسى اكىمىنىڭ ۇسىنىسى بويىنشا مەملەكەتتىك كوميسسيا سۋ باسقان اۋىلداردىڭ ءار تۇرعىنىنا 100 مىڭ تەڭگەدەن وتەماقى تولەۋ تۋرالى شەشىم قابىلدادى.
مىرزاكەنت توڭىرەگىندە دوستىق, جاڭا تۇرمىس جانە جەڭىس اۋىلدارىنىڭ تۇرعىندارى قونىس اۋداراتىن جاڭا شاعىن اۋدان سالىنادى. جاڭا تۇرعىن ءۇي الابىنا بارلىق كوممۋنيكاتسيا جەلىسى جۇرگىزىلىپ, بالاباقشالار مەن مەكتەپتەر سالىنادى.
سۋ استىندا قالعان ەكى اۋىل — فيردوۋسي جانە ورگەباس اۋىلدارىنىڭ ازاماتتارىنا وبلىس اكىمى ءۇش ءتۇرلى ۇسىنىس ايتتى:
-
باسقا ەلدى مەكەندە ۇيلەر سالىپ, سول جاققا كوشۋ;
-
سۋعا كەتكەن اۋىلداعى ۇيلەرىن قالپىنا كەلتىرۋ;
-
تۇرعىن ءۇيىن ءوزى قالپىنا كەلتىرۋگە نيەت بىلدىرسە, ءتيىستى قاراجاتى اۋدارىلادى.
بۇل ءۇش ۇسىنىستىڭ قايسىسىن تاڭداۋ تۇرعىنداردىڭ ءوز ەرىكتەرىندە بولماق, ولار ورتاق جيىندا ءبىر شەشىمگە كەلۋى ءتيىس.
اۋىل شارۋاشىلىعى تاۋارىن وندىرۋشىلەر مەن مال ۇستاۋشىلاردىڭ شىعىندارىن وتەۋ ماسەلەسى دە شەشىلدى. شىعىن تج جويۋ جونىندەگى شۇعىل شتاب كوميسسياسى جۇرگىزگەن رەۆيزيا قورىتىندىسى بويىنشا ۇكىمەتتىك رەزەرۆتەن وتەلەتىن بولادى.
اۋىل شارۋاشىلىعى نەسيەلەرى بويىنشا فەرمەرلەرگە تولەمدەردى كەيىنگە قالدىرۋعا مۇمكىندىك بەرىلەدى.
اۋىل شارۋاشىلىعى القاپتارىن قالپىنا كەلتىرۋ ماقساتىندا قر اشم اۋىل شارۋاشىلىعى عزي-مەن بىرگە جەرلەردى قالپىنا كەلتىرەدى جانە بيىل قانداي داقىلداردى وتىرعىزۋعا بولاتىنى تۋرالى ۇسىنىستار بەرىلەدى.
