ويتكەنى ءبىز پرەزيدەنتىمىزدىڭ وسى مالىمدەمەسىنەن جاقسى حابار, الداعى كۇندەردە نە ىستەۋ قاجەت دەگەن پارمەندى ۇسىنىستاردى كۇتتىك جانە ىندەتكە قارسى كۇرەستە تاعى دا ءوزىمىزدىڭ تىرشىلىگىمىزبەن, بىلايشا ايتقاندا ءوز ءومىرىمىزدى قالاي ۇيىمداستىرامىز دەگەن وي قورىتىندىسىن جاساۋعا دا ىنتالى ەدىك.
قازىر ءبىز ىندەتكە قارسى كۇرەستە پرەزيدەنتىمىزدىڭ ءار مالىمدەمەسىن باسشىلىققا الاتىن بولدىق. جانە دە حالىق وسى ءبىر سىندارلى دا كۇردەلى ساتتە پرەزيدەنتىمىزدى ءوزىنىڭ سەنىمدى ءبىر قورعانى مەن پاناسى ەسەبىندە سەزىنىپ وتىر. ءتىپتى بالاعا شەيىن «پرەزيدەنت ايتتى عوي», «پرەزيدەنت ۋادە بەردى عوي» دەيتىن بولدى. بۇل پرەزيدەنتكە دەگەن حالىقتىڭ سەنىمى!
قاسىم-جومارت كەمەل ۇلى بۇل جولعى مالىمدەمەسىندە ەلىمىزدە توتەنشە جاعداي جاريالانعان
16 ناۋرىزدان باستاپ ەلىمىزدە قانداي ىستەر اتقارىلعانىن ايتتى. راسىندا كارانتين جاريالانعانى وتە ورىندى بولدى! ويتپەگەندە ىندەت جاپپاي تاراپ, ونىڭ اقىرى دا دۇرىس بولماس ەدى. كارانتين كەزەڭىنىڭ جۇرتشىلىققا وڭاي تيمەگەنىن دە پرەزيدەنت ءبىلىپ, سونى ءوزى ايتىپ وتىر.
ءبىز بۇعان تۇسىنىستىكپەن قارايمىز. ەل باسىنا كۇن تۋماس پا, كۇن تۋعان شاقتا باسقا تۇسكەن ءىستى «كوپپەن كورگەن ۇلى توي» دەيتىن, بارىنە دە بەكەمدەنىپ كونەتىن جانە دە سابىر مەن ءتارتىپ ساقتاپ ءبارىن دە امان-ساۋ جەڭەتىن حالىقتىڭ ۇرپاعى ەمەس پە ەدىك؟!
جانە دە پرەزيدەنت پارمەنىمەن وسى ءبىر كارانتيندىك شەكتەۋ كەزىندە حالىقتىڭ تۇرمىس جاعىنان قينالىپ قالماۋى ءۇشىن بار جاعداي جاسالدى, جاسالىپ تا جاتقاندىعى ەلدىڭ ءوز بيلىگىنە دەگەن سەنىمىن دە نىعايتا ءتۇستى. جالپى, وسى ءبىر ىندەتتى كەزەڭ ءبارىمىزدى دە شيراتىپ, ءتىپتى حالىق پەن بيلىكتىڭ اراسىن جاقىنداتىپ, ءبىر-بىرىنە باۋىر باسۋلارىنا ىقپال ەتتى مە دەيمىن.
پرەزيدەنت ءوز مالىمدەمەسىندە بۇگىنگە دەيىن قازاقستان بويىنشا 4 ملن 250 مىڭ ازاماتقا قارجىلاي كومەك, 570 مىڭنان استام ادامعا ازىق-ت ۇلىك بەرىلگەنىن ايتتى. جۇمىستارى توقتاپ, كۇنكورىستەرىنىڭ ناپاقاسىن تاۋىپ وتىرعاندار ۇيلەرىندە وتىرىپ قالعانداردىڭ ارقايسىسىنا 42 500 تەڭگەدەن بەرىلۋى حالىقتى قۋانتىپ تا, سەنىمدەرىن نىعايتىپ تاستاعانىنىڭ كۋاسىمىز. «ە, ۇكىمەت بار ەكەن عوي»دەپ 42 500 تەڭگەسىن العان اعايىنىمىزدىڭ قۋانا تەلەفون شالعانى دا بولدى. بۇل كومەك الداعى ايدا دا بولادى ەكەن!
پرەزيدەنتىمىزدىڭ مالىمدەمەسىندە ءساۋىر-مامىر ايلارىندا 1,6 ميلليوننان استام ادامعا كوممۋنالدىق تولەم كومەگى كورسەتىلەتىندىگىن ايتىلدى. بۇل دا قولداۋ ەمەس پە؟! بۇل دا كومەك ەمەس پە؟! ارينە. وسى كۇندەرى سول كوممۋنالدىق تولەمدى وتەۋدىڭ ءوزى كەيبىر جاعدايداعى ادامدارعا ۋايىم دا بولىپ وتىرعانى دا انىق ماسەلە. ەندى مىنە, سول ماسەلەنى شەشۋدىڭ دە ورايى كەلدى.
وسى ءبىزدىڭ حالقىمىزدىڭ بويىندا كەڭەستىك تۇستىڭ 20-30-جىلدارىنداعى اشتىقتىڭ ۇرەيى (سيندروم) ءالى دە بار ما دەيمىن. ويتكەنى وسى كارانتين جاريالانعاننان بەرى, «ەلدە ازىق-ت ۇلىككە تاپشىلىق بولادى» دەپ ساۋەگەيلىك تانىتقاندار كوبەيىپ كەتكەن-ءدى. قۇداي بەتىن اۋلاق قىلسىن, ازىرگە ازىق-ت ۇلىكتەن تارىعۋشىلىق بايقالىپ وتىرعان جوق. جەرگىلىكتى جەرلەردە ازىق-ت ۇلىكتىڭ قورى جاسالىپ, كەيبىر اسا قات ازىق-ت ۇلىك باعاسىنا شەكتەۋ قويىلعاندىعى دا ورىندى ەدى.
پرەزيدەنتىمىز كارانتين جاريالانعان العاشقى كۇننەن مەديتسينا قىزمەتكەرلەرىنە قولداۋ كورسەتىپ كەلەدى. راسىندا ىندەتپەن كۇرەستىڭ العى شەبىندە جۇرگەن دارىگەرلەرگە قوسىمشا اقى تولەنۋى ادامدىق ەدى. دارىگەرلەردىڭ ەرلىگى جىرعا ارقاۋ, انگە اۋەن بولىپ شىرقالىپ جاتقانى دا حالىقتىڭ ولارعا دەگەن زور ىقىلاسى مەن قۇرمەتى دەگەن ورىندى. سونىمەن بىرگە شاعىن جانە ورتا بيزنەسكە دە قولداۋ جاقسى ەكەندىگىن پرەزيدەنتىمىزدىڭ وسى مالىمدەمەسىندە انىق ايتىلدى. مىسالى 1,6 ميلليوننان استام ادامعا, 11,5 مىڭ بيزنەس وكىلىنە جالپى سوماسى 360 ميللياردتان استام تەڭگەنى قۇراپ وتىرعان ءوز نەسيەلەرىن كەيىن تولەۋ مۇمكىندىگىنىڭ جاسالۋى دا ەكونوميكانىڭ نەگىزگى ءبىر بۋىنىنىڭ السىرەمەي, نىعايا تۇسۋىنە وڭ اسەر ەتەرى انىق.
كوكتەمگى دالا جۇمىستارىن ويداعىداي وتكىزۋ ءۇشىن جاسالىپ جاتقان شارۋا ءۇشىن شىن قۋانامىن. ويتكەنى «كوكتەمنىڭ ءبىر كۇنى جىلعا ازىق» دەگەن ءسوز بار. ازىق-ت ۇلىك قاۋىپسىزدىگىن قامتاماسىز ەتۋگە جاسالىپ جاتقان وسى قادام ءبىزدىڭ ەلىمىزدىڭ الداعى ۋاقىتتا «نانسىز» قالماۋىنا اسەر ەتەرى دە انىق. كوكتەن ءيىپ, جەردەن بەرسىن دەڭىز.
پرەزيدەنت ءوز پارمەنىمەن كارانتيندى 11 مامىرعا دەيىن سوزىپ وتىر. بۇل دا جاي قابىلدانا سالعان شەشىم ەمەس. ۇيدە وتىرۋدىڭ كۇن جىلىپ, كوك شىققان كەزدە قانشالىقتى قيىن ەكەنىن پرەزيدەنت ءبىلىپ وتىر. الايدا ىندەتتىڭ تارالۋى ءالى دە بولسا الەمدە دە, ءبىزدىڭ ەلدە دە باسەڭدەمەي وتىرعانى انىق ماسەلە. شىدايمىز. جاقسى كۇنىمىز الدا ءالى. ەڭ باستىسى, ىندەت جۇقتىرىپ المايىق, وزگەلەردىڭ دە ءومىرىن قاۋىپكە تىكپەيىك.
مالىمدەمەدە پرەزيدەنت ء«توزىم تىلەككە جەتكىزەدى», سابىر ساقتايىق دەيدى! اتالى ءسوز! وسى سوزگە توقتاعانىمىز ابزال.
قاسىم-جومارت كەمەل ۇلى دارىگەرلەرگە, قۇقىق قورعاۋ ورگاندارىنىڭ وكىلدەرىنە, اسكەري قىزمەتشىلەرگە, ۆولونتەرلەرگە جانە سونىمەن بىرگە جۋرناليستەرگە دە العىسىن ايتىپ, ريزاشىلىعىن بىلدىرگەندىگى قۋانتتى. كاسىبي جۋرناليست جانە گازەت قىزمەتكەرى رەتىندە پرەزيدەنتىمىزدىڭ بۇل العىسى ءبىزدى قاناتتاندىرا ءتۇستى.
جابال ەرعاليەۆ,
قازاقستاننىڭ ەڭبەك سىڭىرگەن قايراتكەرى, سەناتورلار كەڭەسىنىڭ مۇشەسى
