بۇرناعى كۇنى تۇندە گرەكيانىڭ سالونيكي قالاسىندا جەرگىلىكتى پاوك-پەن ەۋروپا ليگاسىنىڭ توپتىق كەزەڭىندەگى ءبىرىنشى ماتچىن وتكىزگەن قاراعاندىنىڭ «شاحتەرى»1:2 ەسەبىمەن ۇتىلىپ قالدى.
بۇرناعى كۇنى تۇندە گرەكيانىڭ سالونيكي قالاسىندا جەرگىلىكتى پاوك-پەن ەۋروپا ليگاسىنىڭ توپتىق كەزەڭىندەگى ءبىرىنشى ماتچىن وتكىزگەن قاراعاندىنىڭ «شاحتەرى»1:2 ەسەبىمەن ۇتىلىپ قالدى.
جەرلەستەرىمىز تورەشىنىڭ قوسقان سوڭعى ەكى مينۋتتىق قوسىمشاسىندا ءبىر گول جىبەرىپ الىپ, كەزدەسۋدىڭ قورىتىندىسىندا جەڭىلۋگە ءماجبۇر بولدى. ال الاڭداعى ويىن كوپ ۋاقىت ەكى كوماندانىڭ تەڭ دارەجەدەگى تەكەتىرەسى جاعدايىندا ءوتىپ جاتتى. سوعان قاراماستان, قارسىلاستار ۇزىلىسكە وسىلاي ەسەپ اشا الماعان كۇيلەرى شىقتى. ال 49-مينۋتتا گرەكتەر ءوزدەرىنىڭ ايىپ الاڭدارىنا كەلگەن روحەر كانياستى قاعىپ قۇلاتتى. پەنالتي! ونى ءجابىر كورۋشىنىڭ ءوزى جۇزەگە اسىردى.
جاسىراتىنى جوق, قاراعاندىلىقتار وسىدان كەيىن ويناماي قويدى. شاماسى, وسى ەسەپپەن ماتچ سوڭىنا دەيىن جەتەمىز دەپ ويلاسا كەرەك. بىراق ولاي بولماي شىقتى. ءوز الاڭىندا ۇتىلىپ قالۋ قاۋپى تۋعان گرەكتەر ەندى جانتالاسا العا ۇمتىلدى. وسى ۇمتىلىستى ولار ەكى رەت گولعا اينالدىرا ءبىلدى. بۇلاردىڭ ءبىرىنشىسىن 75-مينۋتتا ستەفانوس ءاتاناسياديستىڭ كومەگىمەن ءتۇسىرگەن ولار ويىنعا قوسىلعان ەكىنشى مينۋتتا جەڭىستى دە ءبىرجولا تارتىپ اكەتتى. ونىڭ رەتىن ماتچ بىتۋگە 5 مينۋت قالعاندا الاڭنان كورىنگەن زۆونيمير ۆۋكيچ كەلتىردى.
وسىلايشا «شاحتەر» قوسىمشا قوسىلعان ۋاقىتتا جەڭىلىسكە ۇشىرادى.
توپتىڭ كەلەسى تۋرى ويىندارى 3 قازان كۇنى وينالادى. بۇل كۇنى قاراعاندىلىقتار يزرايلدىڭ حايفا قالاسىنىڭ «ماككابي» كومانداسىن قابىلدايدى.
رۋسلان يگىلىك.
