رۋحانيات • 06 مامىر، 2020

جاقسىلىق جاساۋ – جۇرەكتىڭ ءىسى

327 رەت كورسەتىلدى

جان بالاسىنا جاقسىلىق جاساۋ ءۇشىن اسىپ-تاسقان دۇنيە بايلىقتىڭ قاجەتى جوق. ءسال عانا مەيىرىم بولسا جەتكىلىكتى. ىنتالى جۇرەكتەن شىققان تيتتەي ىقىلاستى ءىس ۇلكەن تۇيتكىلدەردىڭ ءتۇيىنىن تارقاتۋى بەك مۇمكىن. مەملەكەت باسشىسىنىڭ باستاماسىمەن جاريالانعان بيىلعى ۆولونتەر جىلىنىڭ وزەگىندە دە وسىنداي يگى ماقساتتار جاتىر.

ەرىكتى بولۋ ەرمەك تە، ەرلىك تە ەمەس. قىسىلعانعا قولۇشىن سوزۋ قاشاننان قانىمىزعا ءتان  قاسيەت. ەل باسىنا سىن ساعات تونگەندە ەرىكتىلەر دە قاراپ قالعان جوق. ۆولونتەرلىك جاي عانا ۇر­دا-جىق ۇران ەمەس، شىن كوڭىلدىڭ، ريا­سىز ىقىلاستىڭ ءىسى ەكەنىن كورسەتتى. باس­قا-باسقا تىكەلەي ءوز ومىرىنە قاتەر تون­­دىرەتىن قاۋىپتەن قايمىقپاي، قوعام­دىق قىزمەتكە ەرىك-جىگەرىمەن ەتەنە ءۇن قوسقان الماتىلىقتاردى كورىپ، كوڭىلىمىز قۋانادى. كارانتين جاريالانعان ال­عاش­قى كۇنى-اق 500-گە جۋىق ازامات ال­ماتىداعى ءتارتىپتى قامتاماسىز ەتۋگە جۇ­مىلدىرىلعان ارناۋلى ماماندارعا جار­دەمگە كەلدى. كەيىننەن ىندەت وشا­عىنىڭ ىرگەسى كەڭەيىپ كەتپەس ءۇشىن قالا بيلىگى ولاردىڭ باسىم بولىگىن ۇيدە بولۋعا ۇگىتتەگەندە دە، جۇزگە جۋىق ۆولون­تەر بار­لىق تالاپتاردى ساقتاي وتىرىپ، باس­تاعان ءىستى سوڭىنا دەيىن جەتكىزۋگە رۇقسات الدى.

ماسەلەن، كارانتين كۇشىنە ەنگەن ناۋ­رىز ايىنىڭ ورتا شەنىنەن باستاپ 18 مىڭ الماتىلىق ۆولونتەرلەردىڭ قاتارىندا بولۋعا ىقىلاس تانىتىپ، ءوتىنىش بەرگەن. دەگەنمەن، جوعارىدا ايتىپ وتكەنىمىزدەي، ارنايى دايىندىقتان وتكەن 100 ازامات قانا ىرىكتەلىپ، توتەنشە جاعداي كەزىندە دارىگەرلەر مەن ءتارتىپ ساقشىلارىنا كومەككە كەلدى. ولاردىڭ باسىم بولىگى مۇقتاج جاندارعا ازىق-ت ۇلىك تاراتۋ، قاراۋشىسى جوق قامكوڭىل قاريالاردى تاماقتاندىرۋ سىندى يگى ىستەردىڭ اينالاسىنا توپتاستى. باستاپقى كەزدە كارانتينگە بوي ۇيرەتە الماي كوشە كەزگەن جۇرتتى ىندەتتەن ساقتاندىرۋعا ۇگىتتەگەن جادىنامالار تاراتۋعا دا جاقسى ۇلەس قوستى.

ەلباسى نۇرسۇلتان نازارباەۆتىڭ ۇسىنىسى نەگىزىندە  Nur Otan پارتياسىنىڭ باستاماسىمەن قۇرىلعان «بىرگەمىز» قورى  حالىقتىڭ الەۋمەتتىك تۇرعىدان وسال توپتارىن قولداۋعا ارنالعان كە­شەندى شارالار لەگىن جۇزەگە اسىردى. ماسەلەن، «Almaty Birgemiz» قورى اسا مۇقتاج 23 مىڭ 472  الماتىلىققا 50 مىڭ تەڭگە كولەمىندە قارجىلاي كومەك كورسەتكەن.  اتالعان قولداۋ از قامتىلعان كوپ بالالى وتباسىلارعا، مۇگەدەكتەرگە، ەرەكشە قاجەتتىلىگى بار بالالاردى تار­بيەلەپ وتىرعاندارعا، ەڭ تومەنگى نەمەسە بازالىق زەينەتاقى الاتىندار مەن تۇل جەتىمدەرگە ۇلەستىرىلدى. 

التى جىلدان بەرى ۆولونتەرلىكتى جانىنا سەرىك ەتكەندەردىڭ ءبىرى جيىرما بەس جاستاعى ءمادي احمەتوۆ. جۋرناليستيكا ماماندىعى بويىنشا ءبىلىم العان ول بۇگىندە الماتى قالالىق Jاs وtan جاستار قاناتىنىڭ توراعاسى.

– الماتىدا وتەتىن كەز كەلگەن اۋقىم­دى شارادان ۆولونتەرلەر تىس قالىپ جاتقان جوق. توتەنشە جاعداي كەزىندە دە ولار جىگەر كورسەتتى. ولاردى ىنتىماققا ۇيىستىراتىن ءبىر عانا كۇش – قوعامنىڭ ىزگىلەنۋى مەن قايىرىمدىلىق. قالا شەڭبەرىندە 18 مىڭ وتباسىنا ۇلەستىرىلەتىن ازىق-ت ۇلىك سەبەتتەرىن تاراتۋعا ءبىزدىڭ ۆولونتەرلەرىمىز زور ۇلەس قوسىپ جاتىر. سەنبى، جەكسەنبى دەمەي تەگىن قىزمەت كورسەتىپ جاتقان ولار ءوز ەڭبەگىنە ەشقانداي اقى تىلەمەيدى. ۆولونتەرلىك تاريحتا تەپەرىش كورگەن تالاي ۇلتتى باۋىرىنا باسقان ءبىزدىڭ حالقىمىزدىڭ سالت-ساناسىنا سىڭگەن، بۇرىننان بار قۇندىلىق.  جانە بۇل قىزمەت جاس شەكتەمەيدى. ءاربىر ادام ۆولونتەر بولا الادى. بۇل ادامدى رۋحاني بيىكتەتەتىن قۋاتتى كۇش، – دەيدى ءمادي احمەتوۆ.

ءمادي تىلگە تيەك ەتكەندەي، شىنىندا دا ۆولونتەرلىك ادامداردى ساناتقا بولمەيدى. سەبەبى بۇل – ادامگەرشىلىك پەن پاراساتتىلىقتىڭ ايقىن كورىنىسى. مىڭبوياۋلى مەگاپوليستە مۇنى جان جۇرەگىمەن تۇيسىنگەندەر از ەمەس. اسىرەسە ەل ءۇشىن قيىن-قىستاۋ كەزەڭدە قايىرىمدىلىق قانات قاقسا، قانداي جاقسى. قانشاما وتباسى تابىسىنان قاعىلىپ، تالاي جاننىڭ تىرشىلىگى تۇرالاپ تۇرعان تۇستا قارلىعاشتىڭ قاناتىمەن سۋ سەپكەندەي كومەككە كەلگەن جومارت جۇرەكتى جانداردىڭ ءجونى بولەك. تۇرمىسى تومەن وتباسىلارعا تىرەك بولىپ، قارجى­لاي قولداۋ بىلدىرگەن، ازىق-ت ۇلىك تولتى­رىلعان سەبەتتەر مەن جاقسىلىق جاشىك­تەرىن جەتكىزگەن كاسىپكەرلەرگە  جۇرت ءدان ريزا. ەل بىرلىگى سىنالار تۇستا جەكە باسى­نىڭ قامىن كۇيتتەمەي، بارىن جۇرت­پەن بولىسكەن جۇزدەگەن كاسىپكەر شاما-شارقىنىڭ جەتكەنىنشە جاقسىلىق جاساۋدان قالىس قالعان جوق. بۇدان وزگە جەكە­لەگەن ۇيىمدار مەن ۇجىمدار دا كۇش بىرىكتىرىپ، كوپشىلىككە كوركەم ۇلگى كور­سەتتى.

كەز كەلگەن جاقسىلىققا نەگىزدەلگەن ءىستى ۆولونتەرلىك دەپ اتاۋىمىزعا بولادى. ونىڭ اتى مەن سىرتقى كورىنىسىنەن گورى ىشكى مازمۇنى ماڭىزدى. مۇنى ايتىپ وتىرعانىمىز، سوڭعى كەزدەرى ازاماتتار اراسىندا  ءوزى كومەك كورسەتكەن وتباسىلاردى سۋرەتكە ءتۇسىرىپ جەلىگە جاريالاۋ ءۇردىسى جاپپاي بەلەڭ الىپ كەتكەندەي كورىنەدى. باسقالارعا ۇلگى كورسەتۋ ماقساتىندا، بۇل دا دۇرىس شىعار. دەگەنمەن، ونسىز دا قينالىپ-قاجىپ جۇر­گەن جانداردى سۋرەتكە ءتۇسىرىپ، قارا­داي قىسىلتۋدىڭ قانشالىقتى قاجەتى بار؟  ءبىر جاعىنان بۇل سول شا­ڭىراقتا ءوسىپ كەلە جاتقان ورىمدەي وس­كىندەردىڭ قۇربى-قۇرداستارىنىڭ الدىندا وزدەرىن قولايسىز سەزىنىپ، پسيحولوگياسىنا كەرى اسەرىن تيگىزۋى مۇمكىن ەكەنىن دە ۇمىتپاعانىمىز ءجون سەكىلدى. جاساعان جاردەمىنىڭ بوداۋىن تەك ءبىر جاراتۋشىدان ءۇمىت ەتۋ اسىل ءدىنىمىزدىڭ دە وزەگى ەمەس پە؟!. سوندىقتان تانىمىمىزدا بار بۇل تۇيسىكتىڭ تامىرىن بالتالاۋعا بولماس. ساۋاپتى  امال جالاڭ ناۋقانشىلدىق پەن جالپاق ۇرانعا اينالدىرۋدى سۇيمەيدى. وسىناۋ سىن ساعاتتا يەكتەپ كەلىپ يىرىمىنە تارتقان تاعى ءبىر وي وسى بولاتىن.

ستاتيستيكانى سويلەتسەك، بۇگىندە الەم بويىنشا 100 ميلليونعا جۋىق ادام «ۆولونتەرلىك» دەپ اتالاتىن وسىناۋ ىزگى ىسپەن اينالىسادى ەكەن. ءبىزدىڭ ەلىمىزدە دە بۇل ءداستۇر ءورىسىن كەڭەيتىپ كەلەدى. جىل باسىنان بەرى الماتىنىڭ بىرنەشە جو­عارى وقۋ وشاعىنىڭ قابىرعاسىنان  «ۆولونتەرلەر ورتالىعى» اشىلعانىن بۇعان دەيىن سۇيىنشىلەپ جازعان ەدىك. قوعام­نىڭ ىزگىلەنۋىنە قوماقتى ۇلەس قوس­قان  جانداردىڭ قاتارى ارتىپ، يگى باس­تاما جۇيەلى تۇردە جالعاسا بەرسە دەپ تى­لەيمىز.

 

الماتى

 

سوڭعى جاڭالىقتار

تۇركىستان جاسىل قالاعا اينالۋدا

وڭتۇستىك قازاقستان • كەشە

ۇقساس جاڭالىقتار