باياناۋىل ءوڭىرىنىڭ كىزىلتاۋ اۋىلىندا (قازىرگى جۇسىپبەك ايماۋىتوۆ اتىنداعى اۋىل) تۋىپ وسكەن ول, سەمەي مەديتسينالىق ۋنيۆەرسيتەتىنىڭ ەمدەۋ ءىسى فاكۋلتەتىن تامامداعان. بۇل وقۋ ورنىندا ەڭ شىدامدى, توزىمدىلەر عانا وقي الادى. جەتى جىل بويى تاباندىلىق تانىتىپ, وقۋىن بىتىرگەن سوڭ تۋعان جەرىنە كەلىپ, ەڭبەك جولىن باستادى. 2012 جىلدىڭ تامىز ايىنان باستاپ پاۆلودار وبلىستىق جۇقپالى اۋرۋلار اۋرۋحاناسىندا ەڭبەك ەتىپ كەلەدى.
قىمبات تەمىربەكقىزى اتالعان اۋرۋحانادا كوروناۆيرۋسپەن كۇرەس جۇمىستارى جىلدىڭ باسىنان باستالعانىن, كوروناۆيرۋس جۇقتىرۋى مۇمكىن ادامداردى قابىلداۋ مەن زەرتحانالىق تەكسەرۋلەر جۇرگىزىلىپ كەلە جاتقانىن ايتادى.
«27 ناۋرىزدا قالادا ەڭ العاشقى كوروناۆيرۋس جۇقتىرعان ناۋقاس تىركەلدى. ول ناۋقاسپەن قاتىناستا بولعاندىقتان, ءبىز دە كارانتينگە جابىلدىق. ەلىمىزدە ىندەت جۇقتىرعاندار سانى كۇننەن-كۇنگە ارتا ءتۇستى. ءبىزدىڭ قالامىزدا دا وسىنداي جاعداي ورىن الدى. الەمدە ەپيدەميالىق احۋالعا بايلانىستى كارانتينگە جابىلماس بۇرىن, اۋرۋحانا اكىمشىلىگى ءبىزدىڭ كەلىسىمىمىزدى العان بولاتىن. سەبەبى ىندەت وشاعىندا جۇمىس ىستەۋ وتە قاۋىپتى. وتباسىمنىڭ رۇقساتىمەن جانە ءوزىمىنىڭ بورىشىمدى نەگىز ەتىپ, ءوز كەلىسىمىمدى بەردىم», دەگەن دارىگەر ءبىر ايدان بەرى وتباسىن كورمەگەن ەكەن.
«جاڭادان ناۋقاس تىركەلگەن سايىن كوڭىل-كۇيىمىز تۇسەدى. سەبەبى جاڭادان تىركەلگەن ءار ناۋقاس ءبىزدى وتباسىمىزدان, بالالارىمىزان 14 كۇنگە الىستاتادى. بۇل قاشان اياقتالادى, قاشانعا دەيىن سوزىلادى, ەشكىم ناقتىلاپ ايتا المايدى. ءبىز دە بىلمەيمىز. اتا-انام قاتتى الاڭداۋدا, انام قىزىم تەزىرەك ورالسا ەكەن دەپ جىلاپ ءجۇر. ارينە ءبىزدىڭ بۇل باتىلدىعىمىز, توزىمدىلىگىمىز مەملەكەت تاراپىنان باعالانىپ جاتىر. قاۋىپتىلىك ساناتى بويىنشا اقشالاي سىياقىلار بەرىلۋدە. بۇل – دۇرىس قادام. تەك الداعى ۋاقىتتا دا اق جەلەڭدى ابزال جانداردىڭ ەڭبەگى ەسكەرۋسىز قالماسا ەكەن دەيمىز. ماسەلەن, ءبىز ينفەكتسيونيست-دارىگەرلەر ىلعي ءارتۇرلى جۇقپالى اۋرۋلارمەن جۇمىس ىستەيمىز, قاۋىپ-قاتەر وتە جوعارى. سوندىقتان ەڭبەگىمىزدىڭ جەمىسىن كورگىمىز كەلەدى. ءساتىن سالسا, وتباسىما امان-ەسەن ورالىپ, اناشىمدى ۋايىمداتپاي, 4 جاسار بالامدى قۇشاعىما تەزىرەك السام ەكەن», دەيدى قاۋىپ پەن قاتەردىڭ بەل ورتاسىندا جۇرگەن باتىل دارىگەر.
