بۇل شەشىم قىرعىز جانە تاجىك تاراپتارىنىڭ قازاقستانعا رەسمي وتىنىشتەرىنە بايلانىستى قابىلدانعان بولاتىن. بۇل تۋرالى پرەزيدەنت ق.توقاەۆ 10 ساۋىردە وتكەن تۇركىتىلدەس مەملەكەتتەرى ىنتىماقتاستىق كەڭەسىنىڭ توتەنشە بەينەسامميتىندە COVID-19 پاندەمياسى جاعدايىندا ەلىمىز ءۇشىن باۋىرلاس مەملەكەتتەردىڭ ازاماتتارىنا بارىنشا قولعابىس جاساۋدىڭ ماڭىزدىلىعىن ايتا كەلە, ازىق-ت ۇلىك قاۋىپسىزدىگىن قامتاماسىز ەتۋ ءۇشىن قىرعىزستان مەن تاجىكستانعا قولداۋ كورسەتىلەتىنىن ء(ار ەلگە 5 مىڭ توننادان ۇن بەرىلەدى) ايتقان بولاتىن.
وتكەن اپتادا قىرعىز تەمىرجولىنىڭ بىشكەك قالاسىنداعى جۇكتەردى قابىل الاتىن بەكەتىنە قازاقستاننان 12 ۆاگونعا ارتىلعان 800 توننا ۇن كەلدى. بۇل ۇننىڭ ءبىرىنشى پارتياسى, قالعان 4 200 توننا ۇن كەزەڭ-كەزەڭىمەن جەتكىزىلمەك.
قازاقستاننىڭ قىرعىز رەسپۋبليكاسىنداعى ەلشىلىگىنىڭ وكىلدەرى قاتىسقان جۇكتەردى وتكەرىپ بەرۋ راسىمىندە قىرعىزستاننىڭ اۋىل شارۋاشىلىعى, ازىق-ت ۇلىك كاسىپورنى جانە مەليوراتسيا ءمينيسترى ەركينبەك چودۋەۆ قىرعىز تاراپى قازاقستان رەسپۋبليكاسىنىڭ ۇكىمەتى كورسەتىپ وتىرعان جاردەمدى جوعارى باعالايتىنىن ايتىپ, قولداۋ كورسەتكەنى ءۇشىن تۋىسقان قازاق ەلىنە تەرەڭ ريزاشىلىعىن ءبىلدىردى.
ايتا كەتەيىك, قىرعىزستانعا وتكەن ايدا وزبەكستان مەن رەسەي دە قولداۋ كورسەتكەن ەدى. اتاپ ايتقاندا, وزبەكستان گۋمانيتارلىق جاردەم رەتىندە 1000 توننا ۇن جانە ىندەتتەن قورعانۋعا قاجەتتى مەديتسينالىق بۇيىمدار الۋعا قاراجات بەرگەن. ال ەندى, قىرعىز رەسپۋبليكاسىنىڭ ۇكىمەتىنە قاراستى مەملەكەتتىك ماتەريالدىق رەزەرۆ قورى رەسەي فەدەراتسياسىنىڭ ازىق-ت ۇلىك كورپوراتسياسىنان 33 مىڭ توننا بيدايدى ساتىپ الۋ جونىندە كەلىسىمگە قول قويعان. بۇگىنگى كۇندە مۇنىڭ 1800 تونناسى قىرعىزستانعا جەتكىزىلدى.
ال ەندى, قازاقستاننىڭ جاردەمى وزگەشە بولىپ تۇر. ەلباسى نۇرسۇلتان نازارباەۆتىڭ «قازاق پەن قىرعىز الەمدەگى ءبىر-بىرىنە ەڭ جاقىن حالىق» دەگەن ءسوزى ەسىمىزدە. قازاق ەلى بۇل جاقىندىقتى قيىنشىلىق زامان باسقا تۇسكەندە تاعى دا دالەلدەپ وتىر. تاراتىپ ايتقاندا, 5000 توننا ۇن – 100 مىڭ قاپ. دەمەك, جاردەمگە مۇقتاج قىرعىزستاندىق 100 مىڭ وتباسى ءبىر قاپتان تەگىن ۇن الادى.
نازاربەك بايجىگىتوۆ,
ارنايى «Egemen Qazaqstan» ءۇشىن
قىرعىز رەسپۋبليكاسى,
بىشكەك قالاسى
