ەڭ اۋەلى «قازمۇنايگازدىڭ» باستى مىندەتى قىزمەتكەرلەردىڭ دەنساۋلىعى مەن ءال-اۋقاتىنا قامقورلىق جاساۋ ەكەنىن اتاپ وتكەن باسقارما توراعاسىنىڭ ورىنباسارى ەپيدەميالىق جاعداي كەزىندەگى جەدەل ىسكە قوسىلعان داعدارىستى باسقارۋ توبىنىڭ ىلكىمدى جۇمىسىنا توقتالدى.
– ءبىرىنشى توقسانداعى نەگىزگى وندىرىستىك كورسەتكىشتەر ورىندالدى. مۇناي جانە گاز كوندەنساتىن ءوندىرۋ دەڭگەيى 5,9 ملن توننانى قۇرادى, بۇل وتكەن جىلدىڭ ءبىرىنشى توقسانىنداعى دەڭگەيگە جۋىق. 4 ملن تونناعا جۋىق نەمەسە ءوزىمىز وندىرگەن مۇنايدىڭ 69%-ى ەكسپورتتالدى, – دەدى داۋرەن قاراباەۆ. الايدا كوروناۆيرۋس ىندەتى مەن مۇناي ءوندىرىسىن ۇجىمدىق قىسقارتۋ تۋرالى وپەك+ كەلىسىمىمەن مۇنايعا الەمدىك سۇرانىستىڭ كۇرت تومەندەۋى وسى جىلدىڭ ەكىنشى توقسانىندا قمگ ءوندىرىسىن شەكتەۋگە اكەلىپ وتىر. ونىڭ ايتۋىنشا, وپەك+ كەلىسىمىنە سايكەس قازاقستان ءوندىرىستى تاۋلىگىنە 390 مىڭ باررەلگە قىسقارتۋعا ءتيىس. وسىعان سايكەس ەنەرگەتيكا مينيسترلىگى مۇناي ءوندىرۋدى شەكتەۋى قاجەت جەكە جەر قويناۋى ۋچاسكەلەرىنىڭ تىزبەسى بار ۇكىمەت قاۋلىسىنىڭ جوباسىن ازىرلەدى.
الايدا مۇناي تاسىمالداۋ مەن گاز ءوندىرۋ سالالارىنىڭ جاعدايى جامان ەمەس. سەبەبى وسى ەكى سەكتورعا مۇناي باعاسىنىڭ قۇبىلۋى قاتتى اسەر ەتىپ وتىرعان جوق. گاز تاسىمالداۋ كولەمى 28,3 ملرد تەكشە مەترگە دەيىن ءوسىپ وتىر. ءوسىم نەگىزىنەن قازاقستان ارقىلى گاز ءترانزيتىنىڭ ۇلعايۋىنا بايلانىستى.
جاھاندىق پاندەميانىڭ قمگ وڭدەۋ سەكتورىنا دا اسەر ەتكەنى اتالدى.
– ءبىرىنشى توقساندا وتاندىق مۇناي وڭدەۋ زاۋىتتارىندا كومىرسۋتەكتى قايتا وڭدەۋ كولەمى 3,3 ملن توننانى قۇرادى جانە وتكەن جىلمەن سالىستىرعاندا ءسال جوعارى بولدى. بىراق 2020 جىلدىڭ ساۋىرىندە قازاقستاننىڭ ءىرى قالالارىندا كارانتيننىڭ ەنگىزىلۋىنە بايلانىستى قازاقستانداعى مۇناي ونىمدەرىنىڭ نەگىزگى تۇرلەرىنە سۇرانىس ەداۋىر تومەندەدى. ءبىز زاۋىتتاردىڭ جۇكتەمەسىن ازايتتىق. 25 ساۋىردەن باستاپ پاۆلودار زاۋىتى جوسپارلى پروفيلاكتيكالىق جوندەۋ جۇمىستارىنا توقتاتىلدى, – دەدى «قازمۇنايگاز» ۇك» اق باسقارما توراعاسىنىڭ ورىنباسارى داۋرەن قاراباەۆ.
بۇعان قوسا ول داعدارىسقا قارسى شارالار رەتىمەن تانىستىرىپ ءوتتى. جەدەل شارا رەتىندە, قازىردىڭ وزىندە 2020 جىلعا جوسپارعا قاراعاندا 87,4 ملرد تەڭگە كۇردەلى شىعىندار الىپ تاستالعان, وسى رەتتە 5 جىل ىشىندە كۇردەلى شىعىنداردىڭ ازايۋى 406,4 ملرد تەڭگەنى قۇرايدى. ال 2020 جىلعا ارنالعان جالپى جانە اكىمشىلىك شىعىندار, ورتالىق اپپاراتتاعى كونسالتينگ قىزمەتتەرى مەن باسشىلىقتىڭ سىياقى قورىنان باس تارتۋدى قوسا العاندا, 15,7 ملرد تەڭگەگە ازايتىلدى. وپەراتسيالىق شىعىندار 24,2 ملرد تەڭگەگە تومەندەتىلگەن. 2020 جىلى قىسقارتىلعان جالپى قاراجات سوماسى 127,3 ملرد تەڭگەنى قۇرايدى.
– ءبىز نەگىزگى وندىرىسكە بايلانىستى ەمەس وپەراتسيالىق, اكىمشىلىك جانە كۇردەلى شىعىنداردان باستادىق. سونىمەن قاتار ماركەتينگ جانە لوگيستيكا سالاسىندا جۇمىس ىستەيمىز. اينالىم كاپيتالى دا وڭتايلاندىرىلعان, – دەيدى داۋرەن قاراباەۆ.
اتقارىلىپ جاتقان ءىس-شارالار كەشەنىنىڭ ۋاقىتشا ەمەس, تۇراقتى نەگىزدە جۇمىس ىستەيتىنىن ايتقان ول, قىسقامەرزىمدى شارالاردان باسقا 2021 جىلدىڭ سوڭىنا دەيىن جۇزەگە اسىرىلاتىن داعدارىسقا قارسى ستراتەگيا دايارلاناتىنىن اتاپ ءوتتى.
– ءبىز باسقارۋ مودەلىن وزگەرتۋ ءۇشىن جۇمىس ىستەپ جاتىرمىز. ناتيجەسىندە قمگ باسقارۋعا يكەمدى, تەز ارەكەت ەتۋگە جانە بيزنەس ءۇشىن ەڭ از شىعىندارمەن داعدارىستىڭ سالدارىن ەڭسەرۋ ءۇشىن ءتيىمدى شەشىمدەر قابىلداۋعا قابىلەتتى كومپانياعا اينالۋى ءتيىس. كوپتەگەن فۋنكتسيادان باس تارتامىز جانە ستراتەگيالىق ماسەلەلەردى شەشۋگە نازار اۋدارۋ ءۇشىن ەنشىلەس كومپانيالارمەن ءوزارا ىقپالداستىقتىڭ تەتىكتەرىن قايتا قاراستىرامىز, – دەدى داۋرەن قاراباەۆ. ونىڭ ايتۋىنشا, بارلىق كۇش كەلەسى جىلعا دەيىن ەكى نەگىزگى ماسەلەنى شەشۋگە جۇمىلدىرىلادى. بىرىنشىدەن, كومپانيا قىزمەتىن نارىقتىڭ جاڭا جاعدايلارىنا بەيىمدەۋ جانە يكەمدى وندىرىستىك جانە كادرلىق الەۋەتتى ساقتاي وتىرىپ, كومپانيانىڭ قارجىلىق جاعدايىنا جاعىمسىز فاكتورلاردىڭ اسەرىن ازايتۋ. ەكىنشىدەن, داعدارىس اياقتالعاننان كەيىن جۇمىسىن قايتا جانداندىرۋ ءۇشىن قور, تەحنولوگيا مەن قۇزىرەتتەردى جيناقتاۋ.
بارلىق مۇناي-گاز سەكتورى سياقتى, قازىرگى احۋال كەزىندە بولاشاق كورسەتكىشتەرگە قاتىستى ناقتى بولجام جاساۋ قيىن. سالانىڭ ەرەكشەلىگىنە قاراي, ەل ەكونوميكاسىن قولداۋ جانە ۇزدىكسىز وندىرىستىك پروتسەستى قامتاماسىز ەتۋ ءۇشىن قمگ وندىرىستىك قىزمەتىن توقتاتپاي, نارىقتاعى جاعدايدى ءجىتى باقىلاي وتىرىپ, مۇددەلى تاراپتارمەن بىرگە قاجەتتى شارالار قابىلدايتىن بولادى.
