«بۇگىندە بۇكىل الەم دامۋدىڭ جاڭا كەزەڭىنە قادام باستى. بۇل, اسىرەسە, وسى پاندەميادان كەيىن انىق بايقالادى دەپ ويلايمىن. وسىنداي سىن ساعاتتا ءار مەملەكەت, ەڭ الدىمەن, ءوز ازاماتتارىنىڭ قاۋىپسىزدىگىن ويلايدى. بۇل – زاڭدى نارسە. بىراق مۇنداي كۇردەلى كەزەڭ حالىقارالىق ىنتىماقتاستىققا سىزات تۇسىرمەۋى كەرەك. سوڭعى اپتالاردا مەن بىرقاتار ەلدەردىڭ جانە حالىقارالىق ۇيىمداردىڭ باسشىلارىمەن تەلەفون ارقىلى سويلەستىم. تۇركى تىلدەس مەملەكەتتەردىڭ ىنتىماقتاستىق كەڭەسىنىڭ بەينەسامميتىنە جانە جوعارى ەۋرازيالىق ەكونوميكالىق كەڭەس مۇشەلەرىنىڭ ونلاين فورماتىنداعى جۇمىس كەزدەسۋىنە قاتىستىم»,- دەدى ق.توقاەۆ.
ەل پرەزيدەنتى ىندەتكە قارسى تۇرۋدىڭ نەگىزگى جولى – سەرىكتەس ەلدەرمەن بىرگە كۇش جۇمىلدىرۋ ەكەنىن اتاپ ءوتتى.
«قازىر پاندەميامەن كۇرەس جۇرگىزۋ باعىتىنداعى حالىقارالىق ىنتىماقتاستىقتى كۇشەيتۋ قاجەت. وسىعان وراي ءبىز سەرىكتەس ەلدەرمەن بىرگە كۇش جۇمىلدىرىپ وتىرمىز. بۇل – ىندەتكە قارسى تۇرۋدىڭ نەگىزگى جولى. جالپى, سىرتقى ساياساتىمىزدىڭ ساباقتاستىعى ساقتالاتىن بولادى. ءوزىمىزدىڭ ءداستۇرلى جانە جاڭا سەرىكتەستەرىمىزبەن ءوزارا ءتيىمدى قارىم-قاتىناستاردى دامىتا بەرەمىز»,- دەدى مەملەكەت باسشىسى.
پرەزيدەنت ودان بولەك ينۆەستيتسيا تارتۋ ماسەلەسىنە توقتالدى.
«سونىمەن قاتار كەز كەلگەن مەملەكەت ءۇشىن باسقا ەلدەردەن ينۆەستيتسيا تارتۋدىڭ ماڭىزى زور. سوندىقتان ءبىز دە سىرتقى ساياساتتا ەكونوميكالىق ديپلوماتياعا باسا ءمان بەرەمىز. بۇل – قازاقستاننىڭ ۇزاق مەرزىمگە ارنالعان ستراتەگياسىنداعى باسىم باعىتتىڭ ءبىرى. الداعى كەزەڭدە دە سولاي بولىپ قالا بەرەدى. سىرتقى ساياسات ءسوز جۇزىندە ەمەس, ءىس جۇزىندە سىندارلى بولۋعا ءتيىس. ديپلوماتيا سالاسى دا ىندەتتىڭ سالدارىنان ساباق العانى ءجون»,- دەپ اتاپ ءوتتى ق.توقاەۆ.
