پرەزيدەنت • 05 مامىر، 2020

قاسىم-جومارت توقاەۆ: ساياسي رەفورمالار جالعاسادى

297 رەت كورسەتىلدى

مەملەكەت باسشىسى قاسىم-جومارت توقاەۆ  «Egemen Qazaqstan» گازەتىنە بەرگەن سۇحباتىندا پرەزيدەنت قىزمەتىنە كىرىسكەن ءبىر جىلدان استام ۋاقىت ارالىعىنداعى باستامالارىنا باعا بەردى.

«قازاقتا «ەل قۋاتتى بولماي، باق تۇراقتى بولمايدى» دەگەن ناقىل ءسوز بار. وسى ورايدا مەملەكەتتىلىكتى نىعايتىپ، حالقىمىزدىڭ ءال-اۋقاتىن ارتتىرۋ ءۇشىن ماڭىزدى باستامالار قولعا الىندى. ەڭ الدىمەن، قوعامنىڭ بەرەكە-بىرلىگى بەكەم بولۋى كەرەك. بۇعان بيلىك پەن حالىق اراسىندا تۇراقتى ديالوگ ورناتۋ ارقىلى قول جەتكىزۋگە بولادى. وسىعان وراي ۇلتتىق قوعامدىق سەنىم كەڭەسى قۇرىلدى. ونىڭ نەگىزگى ماقساتى – قوعامدىق سانانى جاڭعىرتۋعا ارنالعان اۋقىمدى شارالار ۇيىمداستىرۋ، وزەكتى ماسەلەلەردى تالقىلاپ، ءتيىمدى ۇسىنىستار ازىرلەۋ. بۇگىنگە دەيىن كەڭەستىڭ ەكى وتىرىسى وتكىزىلدى. ساياسي، ەكونوميكالىق جانە الەۋمەتتىك جاڭعىرۋ باعىتتارى بويىنشا كوپتەگەن ۇسىنىس جاسالدى. قوعامدى الاڭداتقان ءتۇرلى ماسەلەلەر قىزۋ تالقىعا ءتۇستى» ،- دەپ اتاپ ءوتتى ق.توقاەۆ.

پرەزيدەنت ساياسي رەفورمالارعا دا توقتالدى.

«زامان تالابىنا ساي ساياسي رەفورمالار جۇرگىزىلۋدە. قازىر مەنىڭ باستاماممەن پارلامەنتتە بىرقاتار ماڭىزدى زاڭنامالىق وزگەرىستەر تالقىلانۋدا. «بەيبىت جيىنداردى ۇيىمداستىرۋ جانە وتكىزۋ ءتارتىبى» تۋرالى زاڭ جوباسى قاراستىرىلىپ جاتىر. بۇل ەلىمىزدىڭ دەموكراتيالىق دامۋىن ايقىندايتىن وتە ماڭىزدى قۇجات بولاتىنىنا كۇمان جوق. ءماجىلىس پەن ءماسليحات دەپۋتاتتارىنىڭ سايلاۋىنا تۇسەتىن ساياسي پارتيالار ايەلدەر مەن جاستار ءۇشىن وتىز پايىزدىق كۆوتا بولەتىن بولادى. وسىعان وراي زاڭعا ءتيىستى تولىقتىرۋلار ەنگىزۋ قاراستىرىلۋدا. سونداي-اق، ساياسي پارتيالاردى تىركەۋدى جەڭىلدەتۋ، پارلامەنتتىك وپپوزيتسيا ينستيتۋتىن قالىپتاستىرۋ ءۇشىن زاڭناماعا ماڭىزدى تۇزەتۋلەر جاسالماق. وسى وزگەرىستەر ساياسي ۇدەرىستەردى ودان ءارى ليبەراليزاتسيالاۋ جولىنداعى ناقتى قادام بولادى دەپ سەنەمىن. جان-جاقتى ساياسي رەفورمالار جالعاسادى. بۇل – ءبىزدىڭ ستراتەگيالىق تاڭداۋىمىز»،-دەدى مەملەكەت باسشىسى.

پرەزيدەنت ءوز سوزىندە بىلتىر «پەداگوگ مارتەبەسى تۋرالى» زاڭ قابىلدانعانىن اتاپ ءوتتى. سوعان وراي الداعى ءتورت جىلدا ۇستازداردىڭ ەڭبەك اقىسىن ەكى ەسە ارتتىرۋ تاپسىرىلدى.

پرەزيدەنت باستامالارىنىڭ بىرەگەيى «حالىق ۇنىنە قۇلاق اساتىن مەملەكەت» تۇجىرىمداماسى ەكەنى بەلگىلى. ودان بولەك ول بيزنەستى دامىتۋ شارالارىن اتاپ ءوتتى.

«وتاندىق بيزنەستى دامىتۋعا ارنالعان بىرقاتار باستاما جۇزەگە استى. مەنىڭ تاپسىرمام بويىنشا شاعىن جانە ميكرو بيزنەس وكىلدەرى ءۇش جىلعا تابىس سالىعىنان بوساتىلدى. ولاردىڭ قىزمەتى الداعى ءۇش جىل بويى تەكسەرىلمەيدى. سول ءۇشىن موراتوري جاريالانعانىن بىلەسىزدەر. قازىرگى توتەنشە جاعداي كەزىندە دە كاسىپكەرلەرگە ۇلكەن قولداۋ كورسەتىلۋدە»،- دەدى ق.توقاەۆ.   

حالىقتىڭ الەۋمەتتىك جاعدايى دا نازاردان تىس قالمادى.

«بيىلدان باستاپ جىل سايىن كوپ بالالى جانە مۇگەدەك بالالارى بار 10 مىڭ وتباسى تۇرعىن ۇيمەن قامتاماسىز ەتىلەدى. از قامتىلعان جانە كوپ بالالى وتباسىلارعا ارنالعان الەۋمەتتىك كومەكتىڭ جاڭا تۇرلەرى ەنگىزىلدى. مىسالى، كوپ بالالى وتباسىلارعا تابىسىنا قاراماي جاردەماقى بەرىلە باستادى. جارتى ميلليوننان استام ازاماتتىڭ 300 مىڭ تەڭگەگە دەيىنگى كەپىلسىز نەسيەسى وتەلدى. بۇل باستامالار حالىقتىڭ تۇرمىس ساپاسىن جاقسارتۋعا باعىتتالعان»،- دەدى ق.توقاەۆ.  

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار