«كوروناۆيرۋس ىندەتى مەديتسينا عىلىمىن دامىتۋدىڭ دا وزەكتى ەكەنىن كورسەتىپ بەردى. قازىر بۇكىل الەم وسى سالاعا ەرەكشە نازار اۋدارىپ, جۇقپالى اۋرۋلارمەن كۇرەستى كۇشەيتۋدە. بۇل – زاڭدى قۇبىلىس. الداعى ۋاقىتتا ەلىمىزدە مەديتسينالىق-بيولوگيالىق زەرتتەۋلەرگە ەرەكشە كوڭىل بولىنەدى. ويتكەنى, ايبىندى اسكەرمەن بىرگە مىقتى مەديتسينا دا – مەملەكەتتىڭ نەگىزگى قالقانى. بۇدان بىلاي ونىڭ وزەكتىلىگى ارتا تۇسەتىنى ءسوزسىز»,- دەدى مەملەكەت باسشىسى.
پرەزيدەنت الداعى ۋاقىتتا دەنساۋلىق مينيسترلىگى اتقاراتىن جۇمىستى اتاپ ءوتتى.
«جاقىندا نۇر-سۇلتان قالاسىندا مودۋلدىك جۇقپالى اۋرۋلار اۋرۋحاناسى اشىلدى. ونىڭ نەبارى ەكى اپتا ىشىندە سالىنعانىن بىلەسىزدەر. اۋرۋحانا حالىقارالىق تالاپتارعا ساي جابدىقتالعان. ونى ارنايى بارىپ ارالاپ كوردىم. سونىمەن قاتار, عالىمدارىمىز دياگنوستيكالىق تەست جۇيەسىن ازىرلەپ شىقتى. مىنە, وسىنداي ناقتى جۇمىستار سالانى جەتىلدىرە تۇسەتىنى ءسوزسىز. دەنساۋلىق ساقتاۋ مينيسترلىگى الداعى ۋاقىتتا دا مەديتسينالىق قىزمەت ساپاسىن ارتتىرۋ ءۇشىن اۋقىمدى ءارى جۇيەلى جۇمىس جۇرگىزۋى كەرەك»,- دەدى ق.توقاەۆ.
