اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ حالىقارالىق بايلانىستارى جىلدان-جىلعا جەدەل قارقىنمەن دامۋ ۇستىندە. يتاليانىڭ بولون قالاسىندا ۋنيۆەرسيتەتتەردىڭ ۇلى حارتياسىنا مۇشە بولعان وقۋ ورنى بۇگىندە الەمنىڭ ونداعان بەدەلدى ۋنيۆەرسيتەتتەرىمەن ارىپتەستىك قاتىناس ورناتىپ ۇلگەردى.
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ حالىقارالىق بايلانىستارى جىلدان-جىلعا جەدەل قارقىنمەن دامۋ ۇستىندە. يتاليانىڭ بولون قالاسىندا ۋنيۆەرسيتەتتەردىڭ ۇلى حارتياسىنا مۇشە بولعان وقۋ ورنى بۇگىندە الەمنىڭ ونداعان بەدەلدى ۋنيۆەرسيتەتتەرىمەن ارىپتەستىك قاتىناس ورناتىپ ۇلگەردى.
بيىل مامىر ايىندا اتالمىش قارا شاڭىراقتىڭ قابىرعاسىندا قازاق-قىتاي يننوۆاتسيالىق ورتالىعى اشىلسا, 17 قىركۇيەكتە وسى وقۋ ورنىندا «قازاقستان – سوربوننا فرانتسۋز ۋنيۆەرسيتەتىن» اشۋ تۋرالى ەكى وقۋ ورنى باسشىلارى مەموراندۋمعا قول قويدى. بۇل راسىمگە فرانتسيانىڭ فرانكوفونيا جونىندەگى ءمينيسترى يامينا بەنگيگي حانىم باستاعان فرانتسيا دەلەگاتسياسى كەلدى. دەلەگاتسيا قۇرامىندا پاريجدەگى سوربوننا ۋنيۆەرسيتەتىنىڭ پرەزيدەنتى جان-فرانسۋا جيرار, اتالعان جوبانىڭ يەسى بەلگىلى جازۋشى, قوعام قايراتكەرى مارەك حالتەر ءجانە سوربوننا ۋنيۆەرسيتەتىنىڭ وقىتۋشى-پروفەسسورلارى, فرانتسيالىق جۋرناليستەر بولدى. قازاق-فرانتسۋز باسقوسۋىنا فرانتسۋز رەسپۋبليكاسىنىڭ قازاقستانداعى ەلشىلىگىنىڭ وكىلدەرى قاتىستى.
قر ۇلتتىق عىلىم اكادەمياسىنىڭ سالتانات زالىندا وتكەن مەموراندۋمعا قول قويۋ ءراسىمىن اباي اتىنداعى قازۇپۋ رەكتورى سەرىك پىراليەۆ اشىپ, فرانتسيالىق قوناقتاردى تانىستىردى.
– اباي اتىنداعى قازاق ۇلتتىق پەداگوگيكالىق ۋنيۆەرسيتەتى بازاسىندا «قازاقستان – سوربوننا فرانتسۋز ۋنيۆەرسيتەتىن» اشۋ تۋرالى ەكىجاقتى كەلىسىمشارتقا قول قويۋعا جينالىپ وتىرمىز. بولاشاقتا بۇل ۋنيۆەرسيتەتتە قازاقستان جاستارى فرانتسۋزشا وقىپ ءبىلىم الادى. مۇندا سوربوننا ۋنيۆەرسيتەتىنىڭ پروفەسسورلارى ءدارىس وقىپ, ءبىزدىڭ جاستارىمىزدىڭ ەۋروپالىق ءبىلىم كەڭىستىگىنە شىعۋىنا, ءبىلىم بەرۋدىڭ فرانتسۋزدىق يننوۆاتسيالىق تەحنولوگيالارىن يگەرۋىنە, عالىمدارىمىزدىڭ بىرلەسكەن عىلىمي جوبالاردى جۇزەگە اسىرۋىنا قول جەتكىزۋىنە, سونداي-اق, فرانتسيا مەن قازاقستان جوعارى وقۋ ورىندارى اراسىنداعى ارىپتەستىكتى نىعايتۋعا مۇمكىندىك بەرەدى. بولاشاقتا «قازاقستان – سوربوننا فرانتسۋز ۋنيۆەرسيتەتىندە» ورتالىق ازيا جاستارىنىڭ دا ءبىلىم الۋىنا كەڭ جول اشىلادى, – دەپ اتاپ ءوتتى س.پىراليەۆ.
الماتى قالاسى اكىمىنىڭ ورىنباسارى زاۋرە امانجولوۆا فرانتسيالىق قوناقتارعا الماتى قالاسىنىڭ ەكونوميكالىق جانە الەۋمەتتىك دامۋى, ءبىلىم بەرۋ سالاسىنداعى جەتىستىكتەرى تۋرالى ايتىپ, قولعا الىنىپ وتىرعان ىسكە ساتتىلىك تىلەدى.
بۇدان كەيىن قر ۇلتتىق عىلىم اكادەمياسىنىڭ ۇلكەن زالىندا ەكىجاقتى پىكىر الماسۋلار بولدى. س.پىراليەۆ فرانتسۋز رەسپۋبليكاسىنىڭ فرانكوفونيا جونىندەگى ءمينيسترى يامينا بەنگيگي حانىمعا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ قۇرمەتتى پروفەسسورى ديپلومىن تاپسىرىپ, پروفەسسور مانتياسىن جاپتى.
الماتىدا سوربوننا ۋنيۆەرسيتەتىندە وقۋ 2014 جىلى باستالادى. وعان دەيىن دايىندىق شارالارى وتكىزىلەدى. فرانتسيادان وقىتۋشىلار توبى كەلىپ, اباي اتىنداعى قازۇپۋ-دا لەكتسيالار تسيكلىن وتكىزەدى, فرانتسۋز تىلىندە ساباق وتكىزۋ قولعا الىنادى. العاشقى جىلدارى ماركەتولوگيا, الەۋمەتتانۋ, ساياساتتانۋ, ارحيتەكتۋرا جانە ديزاين ماماندىقتارى بويىنشا ماماندار دايارلاۋ قولعا الىنباق.
قانات ەسكەندىر,
«ەگەمەن قازاقستان».
الماتى.
