قۋارعان جەر بەدەرىن جاڭارتۋ ءۇشىن تۇركىستان اۋماعىندا رەسپۋبليكالىق 2 جوبا ىسكە قوسىلدى. سىيىمدىلىعى 18 ملن تەكشە مەتر بولاتىن «كەڭساي قوسقورعان-2 سۋ قويماسىن سالۋ» جوباسىنا 2 ملرد تەڭگە قارالىپ, جۇمىس باستالدى. جاڭا جوبا قۇنى – 5,9 ملرد تەڭگە. سونىمەن قاتار, «تۇركىستان ماگيسترالدى كانالىن كۇردەلى جوندەۋ» جوباسىنا 4 ملرد تەڭگە كوزدەلىپ, بۇگىنگى كۇنگە 9,6 شاقىرىم كانال بەتوندالعان. ال «شوشقاكول كولدەر جۇيەسىن دامىتۋ» جوباسى تاياۋ كۇندەرى «جۇمىسپەن قامتۋدىڭ جول كارتاسى» اياسىندا جۇزەگە اسا باستايدى. ودان بولەك, «سىرداريا وزەنىنەن ماشينالى ادىسپەن سۋ بەرۋ جوباسى» قولعا الىنىپ, تەحنيكالىق ەكونوميكالىق نەگىزدەمەسى مەن جوبالىق قۇجاتتارى ازىرلەنۋدە. ناتيجەسىندە, اتالعان جوبالار وڭىردەگى اعىن سۋ ماسەلەسىنىڭ شەشىمىن تابۋىنا ىقپال ەتەدى. ال تۇركىستان قالاسى جالپى 196 ملن تەكشە مەتر اعىن سۋمەن قوسىمشا قامتىلاتىن بولادى.
سونداي-اق جەرگىلىكتى بيۋدجەت ەسەبىنەن 16 نىساندا جوندەۋ جۇمىستارى جۇرگىزىلۋدە. ياعني 9,5 مىڭ گەكتار القاپتىڭ سۋارۋ قابىلەتى جاقساراتىن بولادى. وبلىس اكىمى ومىرزاق شوكەەۆتىڭ تىكەلەي تاپسىرماسىمەن, جەرگىلىكتى بيۋدجەت ەسەبىنەن 134 تىك درەناجدى ۇڭعىمالاردىڭ جۇمىس ىستەۋ قابىلەتىن قالپىنا كەلتىرۋ جۇمىستارى دا قولعا الىنعان. جوبا قۇنى – 2,6 ملرد تەڭگە. ازىرگە تۇركىستان اۋماعىندا 40 تىك درەناجدى ۇڭعىما قالپىنا كەلتىرىلدى. وسىلايشا, وڭىردە ەگىس القاپتارىن سۋلاندىرۋ ماسەلەسى شەشىلىپ كەلەدى.
اعىن سۋ بارعان اۋماقتاردى ارالاپ, جەرگىلىكتى شارۋالارمەن كەزدەسكەن وبلىس اكىمى ومىرزاق شوكەەۆ بىرقاتار جۇمىستار «تۇركىستان وبلىسىن الەۋمەتتىك-ەكونوميكالىق دامىتۋدىڭ 2024 جىلعا دەيىنگى كەشەندى جوسپارى» اياسىندا اتقارىلا باستاعانىن ايتىپ ءوتتى. جاۋاپتى باسشىلارعا ءتيىستى نۇسقاۋلار بەردى. تىك درەناجدار مەن كوللەكتورلىق جۇيەلەر تولىقتاي قالپىنا كەلەتىن بولسا, جەردىڭ تۇزدانۋ ماسەلەسى شەشىلىپ, توپىراعىنىڭ قۇنارلىعى بىرنەشە ەسە جوعارىلايتىن بولادى. الا جازداي اتىز جاعالاعان ديقاننىڭ توككەن تەرى اقتالادى.
تۇركىستان وبلىسى
