ا.بايتۇرسىنوۆ اتىنداعى مەكتەپتىڭ ىشكى جانە سىرتقى ارلەۋ جۇمىستارىمەن قاتار ەلەكتر جانە دابىل قاعۋ جۇيەسى تولىعىمەن جاڭارتىلادى. سونىمەن قاتار, م.لومونوسوۆ مەكتەپ گيمنازياسىنىڭ كارىز, جەلدەتكىش جۇيەلەرى جاڭارتىلسا, گ. تيتوۆ جالپى ورتا مەكتەبىنە جاڭا جىلۋ جۇيەسى ورناتىلماق. اتالعان مەكتەپتەردەگى كۇردەلى جوندەۋ جۇمىستارى اعىمداعى جىلدىڭ تامىز ايىندا اياقتالىپ, جاڭا وقۋ جىلىندا پايدالانۋعا بەرىلەدى. قۇرىلىس جۇمىستارىنا تارتىلاتىن جۇمىسشىلاردىڭ 50 پايىزىن جەرگىلىكتى تۇرعىندار قۇراعالى وتىر. بۇل ەلىمىزدەگى توتەنشە جاعداي كەزىندە جۇمىسسىز جۇرگەن اۋدان تۇرعىندارىنا ايتارلىقتاي قولعابىس بولماق.
ال تولەبي اۋدانىندا سوڭعى ءۇش جىلدىڭ قورىتىندىسى بويىنشا 5 قاباتتان تۇراتىن 10 تۇرعىن ءۇي بوي كوتەرىپ, باس-اياعى 540 پاتەر پايدالانۋعا بەرىلگەن. بيىل لەنگىر قالاسىنداعى 1-مولتەك اۋدانىندا 5 قاباتتان تۇراتىن ارقايسىسى 20 پاتەرلى 9 ءۇيدىڭ قۇرىلىسىن جۇرگىزۋ جوسپارلانىپ وتىر. ولاردىڭ جالپى اۋماعى - 11 000 شارشى مەتر, 180 پاتەر. بۇگىنگى تاڭدا مەردىگەر مەن ينجينيرينگتىك قىزمەت كورسەتۋشى مەكەمەلەر انىقتالىپ, كەلىسىمشارت جاسالۋدا. ياعني, كەلەسى جىلى اۋداندا 180 وتباسى باسپانالى بولادى.
تۇركىستان وبلىسى
