«بولشايا وپەرا» جوباسىنىڭ جەڭىمپازى سالتانات احمەتوۆا جەكە كونتسەرتىن بەرەدى

اۋقىمدى باعدارلاماعا جيىرمادان استام تۋىندى ەنگەن، ءانشىنىڭ سوزىنشە، ولاردىڭ بارلىعى جانعا جاقىن ءارى سۇيىكتى اندەر. سالتانات احمەتوۆا جەكە كونتسەرتىنىڭ دايىندىعىنا ەكى اپتاداي ۋاقىت كەتكەندىگىن ايتتى.

كەش شىمىلدىعىن قازاقتىڭ حالىق اندەرى «اقبايان»، «دۋداراي»، «دەدىم اي اۋ» اشسا، رومانس سۇيەر قاۋىم ءۇشىن ن.زۋبوۆتىڭ «نە ۋحودي، پوبۋد سو منويۋ»، «جەستوكي رومانس» كينوفيلمىنەن ا.پەتروۆتىڭ «ا ناپوسلەدوك يا سكاجۋ»، «ليۋبوۆ پرەكراسنايا سترانا»، ب.ءفوميننىڭ «تولكو راز» جانە ت.ب. بارشانىڭ سۇيىكتى اندەرى شىرقالادى. شەتەلدىك كومپوزيتورلاردىڭ شىعارماشىلىعى O.Farres-ءتىڭ «Quizas، Quizas، Quizas»، T.Ferro-نىڭ «Mi sono innamorato di te»، A.C.Jobim-ءنىڭ «The girl from Ipanema» جانە ت.ب. كەرەمەت كومپوزيتسيالارمەن ۇسىنىلعان.

اتاقتى ۆوكاليسكە قر مەملەكەتتىك كۇزەت قىزمەتى پرەزيدەنتتىك وركەسترىنىڭ سوليستەرى، اسپاپشى-دوستارى – رەسپۋبليكالىق بايقاۋلاردىڭ لاۋرەاتى جانىبەك ساپاروۆ (گيتارا) پەن قر تۇڭعىش پرەزيدەنتى – ەلباسى قورى سىيلىعىنىڭ لاۋرەاتى، ونەر ماگيسترى، رەسپۋبليكالىق جانە حالىقارالىق بايقاۋلاردىڭ لاۋرەاتى جىبەك ساپارعاليەۆا (فلەيتا) قولداۋ كورسەتپەك. ولاردىڭ ورىنداۋىندا قازاقتىڭ حالىق اندەرى ء«بىر بالا»، «ياپۋراي»، سونىمەن قاتار م.پەترەنكونىڭ «ۆالس»، «بەرەگيس اۆتوموبيليا» كينوفيلمىنەن ا.پەتروۆتىڭ اۋەنى، ا.پياتستسوللانىڭ «ليبەرتانگو» شىعارمالارى جانە ت.ب. شىرقالماق. 

– كارانتين ءبىزدىڭ قالىپتى ءومىر سالتىمىزعا وزگەرىستەر ەنگىزدى. الدىن الا قۇرعان جوسپارلارىمىزدى قايتا قاراستىرۋعا ءماجبۇر ەتتى.  ارينە، باسقا ارتىستەر سياقتى مەن دە ساحنانى قاتتى ساعىندىم. الايدا قازىرگى ۋاقىتتا دا شىعارماشىلىقپەن اينالىسۋدان قول ۇزگەن جوقپىز. سالتاناتپەن، جانىبەكپەن بىرگە جاڭا جوبا ازىرلەدىك. تىڭدارمان قاۋىمنىڭ قىزىعۋشىلىعىن تۋدىرىپ، كارانتيندەگى داعدىلى كەشتەرىنە از دا بولسا ءوڭ بەرەدى دەپ ۇمىتتەنەمىن، - دەدى جىبەك ساپارعاليەۆا.

سالتانات احمەتوۆانىڭ يتالياداعى ۆوكالدىق ونەر اكادەمياسىندا (Accademia d’Arte Lirica، وزيمو ق.، 2009) ماشىقتانۋدان وتكەنىن اتاپ وتكەن ءجون. ءانشى ۆينچەنتسو دە ۆيۆو، سەردجيو سەگاليني، البەرتو دزەددا، دجانني تانگۋچچي، كريستينا مۋتي، راينا كابايۆانسكا، لەللا كۋبەرلي، ۋيليام ماتتەۋتسي، سيلۆيا ساش، انتونيو يۋۆاررا، ستەفانو دەميكەلي، حارريەت لوۋسون، كارلو مورگانتي سىندى اتاقتى ماەسترولاردىڭ شەبەرلىك ساباقتارىنان ءتالىم العان.

ونىڭ ماراپاتتار قورجىنىندا كوپتەگەن رەسپۋبليكالىق جانە حالىقارالىق بايقاۋلارداعى جەڭىستەرى بار. سالتانات احمەتوۆا – «Villa in canto» حالىقارالىق بايقاۋىنىڭ جەڭىمپازى (يتاليا، 2011); Neue Stimmen حالىقارالىق بايقاۋىنىڭ فينالىنا قاتىسۋشى، Klassik-Herbst Forderpreis ارنايى جۇلدەسىنىڭ يەگەرى (گەرمانيا، 2013). «بولشايا وپەرا» تەلەۆيزيالىق جوباسىنىڭ (رەسەي، 2014) جانە ت.ب. جەڭىمپازى.

ەسكە سالار بولساق، قر مادەنيەت جانە سپورت مينيسترلىگى «قازاقتەلەكوم» اق-مەن بىرلەسىپ، Live فورماتىندا «كارانتيندەگى جۇلدىز» جوباسىن ءساتتى جۇزەگە اسىرۋدا. كورەرمەندەر ارتىستەرمەن پىكىر جازۋ ارقىلى سۇحباتتاسادى. كونتسەرتتەر اشىق ءارى بارشاعا قولجەتىمدى تۇردە تەگىن وتكىزىلەدى.