تۇرعىن ۇيگە مۇقتاج ازاماتتاردىڭ كەزەگىنە تىركەلۋ حالىققا قىزمەت كورسەتۋ ورتالىعى ارقىلى جۇرگىزىلەدى. اشىقتىقتى قامتاماسىز ەتۋ ماقساتىندا, كەزەككە قويۋدى اۆتوماتتاندىرۋ پيلوتتىق جوباسى تۇركىستان قالاسىندا جوسپارلانىپ وتىر. جالپى وڭىردە مەملەكەتتىك قىزمەت كورسەتۋدى تسيفرلىق جۇيەگە كوشىرۋگە ەرەكشە ءمان بەرىلۋدە. وبلىستا مەملەكەتتىك قىزمەت كورسەتۋ سالاسىندا سىبايلاس جەمقورلىق تاۋەكەلدەرى باسىم سالالارىنا ەنگىزىلگەن پيلوتتىق جوبالار ءبىلىم, دەنساۋلىق, جەر جانە تۇرعىن ءۇي سالالارىندا جاقسى جولعا قويىلعان.
مىسالى, ءبىلىم سالاسىندا جۇمىسقا قابىلداۋ شارالارىن اۆتوماتتاندىرۋ قولعا الىنعان. بارلىق 902 مەكتەپتە smart.nation جۇيەسى ەندىرىلىپ, بوس جۇمىس ورىندارعا ءۇمىتتى 2 243 ادام جۇمىسقا قابىلداندى. «Sanaly Urpaq» جوباسى اياسىندا ەمتيحاندار كەزىندە اشىقتىق پەن جاريالىلىق قامتاماسىز ەتىلگەن. دەنساۋلىق ساقتاۋ سالاسىندا دا ەلەۋلى جەتىستىكتەر بار. 40 مەديتسينالىق ۇيىمنىڭ بارلىعى 100% ەلەكتروندى قۇجات اينالىمىنا وتكەن. 233 مەديتسينالىق فورمانىڭ 175 ەلەكتروندى دەنساۋلىق پاسپورتى جاساقتالعان, دارىگەردىڭ قابىلداۋىنا الدىن-الا جازىلۋ 100 % پايىزعا جەتكىزىلدى. بيىل 1 قاڭتاردان باستاپ مەديتسينالىق قۇجاتتامانى قاعازسىز, تسيفرلىق تۇردە جۇرگىزۋگە كوشۋ شارالارى جۇزەگە اسىرىلۋدا. قۇرىلىس سالاسىندا سىبايلاس جەمقورلىقتىڭ جولىن كەسۋ ماقساتىندا مەملەكەتتىك قىزمەتتەر ەلەكتروندى تۇردە كورسەتىلۋىنە بايلانىستى تۇتىنۋشى مەن قىزمەت بەرۋشىنىڭ اراسىنداعى بايلانىس 100% جويىلعان.
تسيفرلىق جۇيەنىڭ تيىمدىلىگى مەن بۇل باعىتتا اتقارىلار جۇمىستار وبلىس اكىمى ومىرزاق شوكەەۆتىڭ توراعالىعىمەن وتكەن تۇركىستان وبلىسى اكىمدىگى جانىنداعى سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ ونلاين وتىرىسىندا ايتىلدى.
