اۋدان كولەمىندە «قاراعۇر» وندىرىستىك كووپەراتيۆى, «تەكەي» شارۋا قوجالىعى جانىنان جانە اۋدان ورتالىعى شولاققورعان اۋىل وكرۋگىندەگى «باعدات» شارۋا قوجالىعى جانىنان تۇيە ءسۇتىن قابىلدايتىن 3 ارنايى بەكەت اشىلعان. ءار بەكەتكە سىيىمدىلىعى 1 توننالىق قوندىرعى قويىلدى.
قازىرگى تاڭدا «تەكەي» جانە «باعدات» شارۋا قوجالىعى جانىنداعى تۇيە ءسۇتىن قابىلداۋ بەكەتتەرى جەكەلەگەن سوزاقتىق شارۋالارىمەن بىرگە اپتاسىنا 2 توننا تۇيە ءسۇتىن وتكىزۋدە. تۇيە تولدەپ, ءسۇتى ساۋىلعاننان بەرگى از ۋاقىتتا 30 توننا ءسۇت تۇركىستان قالاسىنداعى قايتا وڭدەۋ كاسىپورىنىنا جەتكىزىلگەن. الداعى ۋاقىتتا «قاراعۇر» وندىرىستىك كووپەراتيۆى جانىنداعى بەكەت ىسكە قوسىلىپ, تۇيە ءسۇتىنىڭ ءونىم كولەمى ارتا تۇسپەك.
وسىنداي ناتيجەلى جۇمىستاردىڭ باستاۋىندا تۇركىستان وبلىسىنىڭ اكىمى ومىرزاق شوكەەۆتىڭ اۋدان باسشىلىعىنا ويسىل قارا باسىن كوبەيتۋ, تۇيە ءسۇتىن قايتا وڭدەۋ كاسىپورىنىنا وتكىزۋ جونىندەگى تاپسىرماسى تۇر.
وسىعان وراي ءىرىلى-ۇساقتى تۇيە باعاتىن قوجالىقتاردى بىرىكتىرىپ, اسىل تۇقىمدى ءسۇتتى تۇيەلەردى ساتىپ الۋ, ءسۇت قابىلداۋ بەكەتتەرىن ۇيىمداستىرۋ ءىسى قولعا الىندى. ءتيىستى بولىمدەر مەن مەكەمەلەر, اۋىل كەنت وكرۋگتەرىندە شارۋا قوجالىقتارىمەن سەمينارلار وتكىزىپ, ءتۇسىندىرۋ جۇمىستارىن جۇرگىزگەن.
تۇركىستان وبلىسى
