قوڭىرقاي قازاقى اۋىلدىڭ كۇن كورىسى ورىسكە شىعارار مالدىڭ اۋزىندا ەكەنى بەلگىلى. ەرەيمەنتاۋداعى ەركىنشىلىك اۋىلى ەجەلدەن اتاكاسىپتى ارداق تۇتقان جاندار. بىراق, مالىم جانىمنىڭ عانا ەمەس, ارىمنىڭ ساداعاسى دەگەن قاعيدات قاتتى ۇستالۋشى ەدى. تاياۋدا اتادان مۇرا داستۇرگە وڭباي سىزات تۇسكەندەي كۇي كەشتى اۋىل.
قوڭىرقاي قازاقى اۋىلدىڭ كۇن كورىسى ورىسكە شىعارار مالدىڭ اۋزىندا ەكەنى بەلگىلى. ەرەيمەنتاۋداعى ەركىنشىلىك اۋىلى ەجەلدەن اتاكاسىپتى ارداق تۇتقان جاندار. بىراق, مالىم جانىمنىڭ عانا ەمەس, ارىمنىڭ ساداعاسى دەگەن قاعيدات قاتتى ۇستالۋشى ەدى. تاياۋدا اتادان مۇرا داستۇرگە وڭباي سىزات تۇسكەندەي كۇي كەشتى اۋىل.
وبلىستىق توتەنشە جاعدايلار دەپارتامەنتىندەگى حابار وسىنداعى ك.ماركس كوشەسىندەگى 55-ءۇيدىڭ 1-پاتەرىندە تۇراتىن بايات سەرىكبولاتتىڭ اۋلاسىنداعى قىسقا دايىنداعان ءشوبى وتقا ورانعانىن ايتادى. اۋدان ورتالىعىنداعى №10 ءورت ءسوندىرۋ ءبولىمىنىڭ جاۋىنگەرلەرى 57 شاقىرىمدى ارتقا تاستاپ جەتكەنشە جيناعان ازىقتىڭ باسىم بولىگى جانىپ كەتكەن. اۋپىرىمدەپ 5 تونناسىن امان الىپ قالىپتى.
ارادا تۋرا ەكى ساعات وتكەندە سول ءۇيدىڭ ەكىنشى قاپتالىنداعى قالياكپار ارىستاننىڭ ماياسى جالىنعا ورانعان. ءورت 24 توننا ءشوپتى كوزدى اشىپ-جۇمعانشا جالماپ ۇلگەرگەن. ءورت سوندىرۋشىلەر اۋداننان تەحنيكاسىن قايتادان سالدىرلاتىپ جەتكەنشە وسى بولدى.
وسى ءورت سوندىرۋشىلەر سول كۇنى ەركىنشىلىكتەن كەتپەي-اق قويۋى كەرەك ەكەن. بەتى اۋلاق, مۇنى امالسىزدان ايتىپ وتىرمىز. سول كۇنى كەشتە نوۆايا كوشەسىندەگى مىرزاقۇل اڭساعاننىڭ 18 توننا ءشوبى جانىپ كەتتى.
ابدەن ابدىراعان اۋىل تۇرعىندارى پالەكەت وسىمەن بىتكەن شىعار دەۋگە دە شاماسى كەلمەيتىندەي ۋاقىتتا توسىن وقيعا تاعى قايتالانعانىن قايتەرسىز. اراعا جارتى ساعات سالىپ كيروۆ كوشەسىندەگى 15-ءۇيدىڭ يەسى سۆەتلانا ساربەنىڭ اۋلاسىنان قىزىل شوق كورىنگەن. بۇل جولى اناۋ-مىناۋ ەمەس, 25 توننا ءشوپ جانىپ كەتتى.
مۇنداي سۇمدىقتى ەركىنشىلىك اۋىلى كورمەپ ەدى. قۇقىق قورعاۋ ورگاندارى بۇنى الدەكىمدەردىڭ قاساقانا جاساعان قىساستىعى دەپ وتىر.
باقبەرگەن امالبەك,
«ەگەمەن قازاقستان».
اقمولا وبلىسى,
ەرەيمەنتاۋ اۋدانى,
ەركىنشىلىك اۋىلى.
