ءار نىساندا مەديتسينالىق پۋنكتتەر جۇمىس ىستەپ, جۇمىسشىلاردىڭ دەنە قىزۋى ولشەنەدى. سونداي-اق ولار انتيسەپتيكپەن قامتاماسىز ەتىلگەن. جۇمىسشىلارعا اراقاشىقتىق 2 مەتردەن كەم بولماۋى كەرەكتىگى ەسكەرتىلگەن. ودان بولەك قۇرىلىس نىساندارىنىڭ اۋماعىندا COVID-19 ۆيرۋسىنان ساقتانۋ تاسىلدەرى جازىلعان ەسكەرتۋ پلاكاتتارى ىلىنگەن.
ساقتىق شارالارىنا قاتىستى تالاپتاردىڭ ورىندالۋىن باقىلاپ, قۇرىلىس الاڭدارىنداعى جۇمىس بارىسىمەن تانىسقان وبلىس اكىمى ومىرزاق شوكەەۆ مەردىگەرلەرگە بىرقاتار تاپسىرما بەرىپ, قۇرىلىس قارقىنىنىڭ باسەڭدەمەۋىن مىندەتتەدى. شاھارداعى 15 نىساننىڭ قۇرىلىسى بيىل تولىق اياقتالىپ, پايدالانۋعا بەرىلەدى. بۇل ورايدا, جەلىلىك ساياباق, قالالىق ارباتتى قايتا قالپىنا كەلتىرۋ جۇمىستارى قىزۋ جۇرگىزىلۋدە. 11 گەكتار جەردە ورنالاسقان جەلىلىك ساياباقتا اتتراكتسيوندار, سالت-ءداستۇردى دارىپتەيتىن ساۋلەت ونەرىنىڭ تۋىندىلارى ورنالاسقان. بەكزات ساتتارحانوۆ كوشەسىنىڭ بويىنداعى ساياباقتا جۇمىس كەستەسىنە سايكەس سۋارۋ, درەناجدىق جۇيەلەردى جۇرگىزۋ, سۋبۇرقاقتار ورناتۋ, ساندىك سۋ ايدىنى جانە كوشەتتەر وتىرعىزۋ جۇمىستارى جۇرگىزىلۋدە. اشىق اسپان استىندا ورنالاسقان اۋقىمدى باقتا اشىق باسسەين, سۋبۇرقاق سالىنۋدا. ال قالانىڭ رۋحاني-مادەني ورتالىعىندا ورنالاسقان عىلىمي-امبەباپ كىتاپحاناسىندا سىرتقى ارلەۋ جۇمىستارى جۇرگىزىلۋدە. سونداي-اق وبلىس اكىمى اقتوبە ءوڭىرىنىڭ تارتۋى رەتىندە سالىنىپ جاتقان دراما تەاتردىڭ قۇرىلىسىن ارالادى. اتالعان نىسان تۇركىستان مەن اقتوبە وبلىستارىنىڭ بىرىگىپ قارجىلاندىرۋىمەن جۇزەگە اسۋدا. ءتورت قاباتتان تۇراتىن عيماراتتىڭ جالپى كولەمى – 9700 شارشى مەتر, وندا 510 ادامعا ارنالعان كورەرمەن زالى, ارنايى اۆتوتۇراق ورنى بولادى. ق.ا.ياساۋي كەسەنەسىنىڭ اينالاسىن كوگالداندىرۋ, اباتتاندىرۋ جۇمىستارى اياسىندا لاندشافتىق ديزاينعا ەرەكشە نازار بولىنگەن.
اكىمشىلىك-ىسكەرلىك ورتالىعىندا 7 قاباتتى 24 تۇرعىن ءۇيدىڭ قۇرىلىسى جۇرگىزىلۋدە. جاڭا 92,8 مىڭ شارشى مەتر, 1452 پاتەرلى باسپانالار زاماناۋي تالاپتارعا سايكەس بوي كوتەرگەن. سونىمەن قاتار 5157 پاتەرلى 5-7-9-12 قاباتتى 73 تۇرعىن ءۇيدىڭ قۇرىلىسى باستالدى. جەكە سالۋشىلار ارقىلى 5 جانە 12 قاباتتى 54 تۇرعىن ۇيلەردىڭ قۇرىلىسىن جۇرگىزۋ جوسپارلانۋدا. جىل قورىتىندىسىمەن تۇركىستاندا 420 پاتەرلى 9 تۇرعىن ءۇي پايدالانۋعا بەرىلەدى. وبلىس ورتالىعىنداعى بارلىق قۇرىلىس نىساندارىنىڭ ساپاسى قاتاڭ باقىلاۋعا الىنعان. قۇرىلىس الاڭدارىن ارالاپ, جۇمىسشىلارمەن تىلدەسكەن ومىرزاق شوكەەۆ جاۋاپتىلارعا جۇمىستى كۇشەيتۋدى تاپسىردى. مەردىگەرلەرگە قوسىمشا جۇمىس كۇشىن تارتۋدى مىندەتتەدى. «قۇرىلىس بارىسىندا ەشقانداي كەمشىلىككە ورىن جوق. تالاپ كۇشەيتىلەدى. جۇمىسكەرلەر سانى جۇمىسقا تۇساۋ بولماسىن. قاجەت بولعان جاعدايدا ولاردىڭ سانىن ارتتىرۋ كەرەك. قوسىمشا جۇمىس كۇشىن تارتىڭدار. قاۋىپسىزدىك ەرەجەلەرى دۇرىس ساقتالىپ, ساقتىق شارالارى قاتاڭ باقىلانسىن», دەدى وبلىس اكىمى. سونداي-اق وبلىس اكىمى قۇرىلىستىڭ ساپالى اياقتالۋى, مەرزىمىندە تاپسىرىلۋى قاداعالاناتىنىن جەتكىزدى. قازىرگى توتەنشە جاعداي كەزىندە قوسىمشا قيىندىقتار ورىن السا, كەزەك كۇتتىرمەي شەشىلۋىنە ىقپال ەتۋگە ۋادە ەتتى.
تۇركىستان وبلىسى
