تاۋكە حان داڭعىلى مەن س.ەرۋباەۆ كوشەسى ارالىعى دەمالىس ورنىنا اينالادى. جارتىلاي اركا, جارتى بولىگىنە جاسىل جەلەك, تروتۋار, جارىقشام, ورىندىقتار مەن قورشاۋلار ورناتىلعان كوشەنىڭ ەكى شەتىندە ورنالاسقان شاعىن كاسىپكەرلىك نىساندار كەلبەتى بىرىڭعاي ۇلگىگە كەلتىرىلەدى. دەمالىس ورنىن 9 مامىر - جەڭىس كۇنى مەرەكەسىنە وراي تولىقتاي اياقتاۋ جوسپارلانعان.
سونداي-اق اباتتاندىرۋ جۇمىستارى اياقتالۋعا جاقىن تەمىرجول ۆوكزالى الدىنداعى اللەيا وزگەشە دەمالىس ورنى بولماق. ەرەكشە سۋبۇرقاق ىسكە قوسىلادى, ءتورت اركانىڭ جوعارعى جاعىنان سۋدى بۋ تۇرىندە شاشاتىن قوندىرعى قويىلعان. كەلۋشىلەر اركادان وتكەندە قوڭىرسالقىن لەپ سىيلاپ, كۇننىڭ ىستىعىنان قورعايدى. سونداي-اق جان-جاعى ءتۇرلى تۇسكە ەنىپ, جارىقشامدار شامى جاعىلادى. دەگەنمەن, اتقارىلعان ىستەردىڭ كەم-كەتىكتەرى دە جوق ەمەس. قالا اكىمى قاتاڭ ەسكەرتكەن بەتونداردىڭ بىركەلكى توسەلمەۋىن مەردىگەرلەر ءوز ەسەبىنەن قالىپقا كەلتىرەتىن بولادى. بۇگىنگى تاڭدا اياقجول تاستارى توسەلىپ, اباتتاندىرىلىپ جاتقان اۋماقتاعى جۇمىستاردى 1 مامىرعا دەيىن اياقتاۋ كوزدەلىپ وتىر.
