پرەزيدەنت ق.توقاەۆتىڭ تاپسىرماسىن جۇزەگە اسىرۋ اياسىندا مەملەكەتتىك كوميسسيا 20 ساۋىردەن باستاپ قاتاڭ سانيتارلىق-ەپيدەميالىق شارالاردى ساقتاي وتىرىپ, نۇر-سۇلتان جانە الماتى قالالارىندا جۇمىسىن قايتا باستايتىن كاسىپكەرلىك سۋبەكتىلەرىنىڭ قىزمەت تۇرلەرىنىڭ ءتىزىمىن بەكىتكەن بولاتىن. وسىلايشا, نۇر-سۇلتان مەن الماتى قالالارىندا كارانتيندىك رەجىم جەڭىلدەتىلىپ, سانيتارلىق نورمالاردى قاتاڭ ساقتاي وتىرىپ, ەكونوميكانىڭ بىرقاتار سالاسىنداعى كاسىپورىندار جۇمىسىن باستاپ كەتتى.
ەپيدەميالىق جاعدايدى ەسكەرە وتىرىپ, كارانتيندىك رەجىمگە وزگەرىستەر ەنگىزۋ جانە بىرتىندەپ جەڭىلدەتۋ بويىنشا ءتيىستى شەشىم قابىلداناتىن بولدى. پرەمەر-مينيستر اسقار مامين ەپيدەميالىق جاعدايدى ەسكەرە وتىرىپ, باسقا دا كاسىپورىندار مەن بيزنەس سۋبەكتىلەرىنە جۇمىستى جالعاستىرۋعا رۇقسات بەرىلەتىنىن ايتتى.
– مۇنداي جۇمىس ەلدىڭ باسقا وڭىرلەرىندە دە جۇرگىزىلەدى. دەگەنمەن, بۇل سانيتارلىق-ەپيدەميالىق قاۋىپسىزدىك قاتاڭ ساقتالعان جاعدايدا عانا مۇمكىن بولادى, – دەگەن ۇكىمەت جەتەكشىسى دەنساۋلىق ساقتاۋ ءمينيسترى ەلجان بىرتانوۆقا ماسەلەنى قاتاڭ باقىلاۋدا ۇستاۋدى تاپسىردى.
وسىعان بايلانىستى الماتى قالاسىنىڭ اكىمى باقىتجان ساعىنتاەۆ ىسكەرلىك كەڭەسىنىڭ وتىرىسىن ونلاين رەجىمدە وتكىزىپ, وندا كارانتين جاعدايىندا كاسىپورىنداردىڭ قىزمەتىن قايتا باستاۋ ماسەلەلەرىن تالقىلاپ, كاسىپكەرلەرمەن اقىلداستى. وندا Exit Strategy اياسىندا جۇزەگە اسىرىلاتىن قالانىڭ ەكونوميكالىق بەلسەندىلىگىن قالپىنا كەلتىرۋدىڭ كەزەڭ-كەزەڭىمەن جۇزەگە اسىرىلاتىن جوسپارى تالقىلاندى. سونىمەن قاتار الماتىدا ورنالاسقان وتاندىق تاۋار وندىرۋشىلەردىڭ جەكە قورعانۋ قۇرالدارىن, ونىڭ ىشىندە مەديتسينالىق بەتپەردەلەر مەن قورعانىش كوستيۋمدەرىن دايىنداۋعا قاتىسۋ ماسەلەلەرى كوتەرىلدى.
