مەملەكەت باسشىسى نۇرسۇلتان نازارباەۆ مەملەكەتتىك قىزمەت ىستەرى جونىندەگى اگەنتتىكتىڭ توراعاسى ءاليحان بايمەنوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى نۇرسۇلتان نازارباەۆ مەملەكەتتىك قىزمەت ىستەرى جونىندەگى اگەنتتىكتىڭ توراعاسى ءاليحان بايمەنوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا ءا.بايمەنوۆ مەملەكەت باسشىسىنا اگەنتتىكتىڭ الداعى قىزمەتىنىڭ نەگىزگى باعىتتارى مەن حالىقارالىق ساراپشىلار تاراپىنان جوعارى باعا العان مەملەكەتتىك قىزمەتتىڭ قازاقستاندىق مودەلىنىڭ قالىپتاسقان اسپەكتىلەرى تۋرالى باياندادى.
قازاقستان پرەزيدەنتى مەملەكەتتىك قىزمەتتى رەفورمالاۋدىڭ نەگىزگى كەزەڭدەرىنىڭ ءبىرى «ا» كورپۋسىن جانە ءتيىستى ساپالى كادرلار رەزەرۆىن جاساقتاۋ ەكەنىن اتاپ ءوتتى.
– وسى ورايدا مەملەكەتتىك قىزمەتشىلەردى دايارلاۋ جانە بىلىكتىلىگىن ارتتىرۋ ماسەلەلەرىنە نازار اۋدارۋ قاجەت. وبلىستاردا ونىڭ قىزمەتىنە جەتكىلىكتى قاداعالاۋ جاسامايتىن جەرگىلىكتى اكىمدىكتەرگە باعىنىستاعى مەملەكەتتىك قىزمەتشىلەردى وقىتۋدىڭ وڭىرلىك ورتالىقتارى بار. نازار اۋدارۋدى تالاپ ەتەتىن تاعى ءبىر باعىت – مەملەكەتتىك قىزمەتشىلەردى شەتەلدەردە وقىتۋ جانە بىلىكتىلىگىن ارتتىرۋ. قاجەتتى ءبىلىم قورى, دايىندىقتارى بار ادامداردى جىبەرۋدىڭ ورنىنا ول جاققا كوبىنەسە اعىلشىن ءتىلىن بىلمەيتىندەر جىبەرىلەدى. وسىنىڭ سالدارىنان ولار ماتەريالدى يگەرە المايدى جانە ءتيىستى تاجىريبە جيناقتاي المايدى. بۇل ماقساتتارعا بيۋدجەتتەن 170 ملن. تەڭگە بولىنگەن, ال ناتيجە جوق, – دەدى مەملەكەت باسشىسى.
نۇرسۇلتان نازارباەۆ ءتيىستى ماماندىقتار بويىنشا دايارلاۋدا ساپانىڭ قاجەتتىگىن اتاپ ءوتتى.
– بۇگىندە كوپتەگەن جوعارى وقۋ ورىندارىندا مەملەكەتتىك باسقارۋ جانە مەملەكەتتىك قىزمەتشىلەردى دايارلاۋ فاكۋلتەتتەرى اشىلۋدا. الايدا ولاردا كوبىنەسە ەكونوميكا مەن قۇقىق جونىندەگى پاندەر وقىتىلادى, ال ءىس جۇزىندە مەملەكەتتىك قىزمەت ودان دا اۋقىمدى ماسەلەلەردى ءبىلۋدى قاجەت ەتەدى. بۇل ورايدا اگەنتتىك ءبىلىم جانە عىلىم مينيسترلىگىمەن بىرلەسىپ پىسىقتاپ, جاعدايعا تالداۋ جاساعانى ءجون, – دەدى قازاقستان پرەزيدەنتى.
مەملەكەت باسشىسى ورتالىق پەن جەرگىلىكتى بيلىك اراسىندا مەملەكەتتىك قىزمەتشىلەردى روتاتسيالاۋ جونىندەگى جۇمىستى ءتيىمدى جۇرگىزۋدىڭ ماڭىزدى ەكەنىنە نازار اۋداردى.
– بۇل – وتە ماڭىزدى جانە جاقسى تاجىريبە, ويتكەنى, وڭىرلىك سيپاتتاعى ماسەلەلەردى بىلمەگەن ادام ورتالىقتا قالايشا جۇمىس ىستەي الادى؟ بىراق بيلىك كوبىنەسە جەرگىلىكتى دايىن كادرلاردى تارتۋ ءۇشىن ءتيىستى جاعداي جاساۋعا مۇددەلى ەمەس. بۇل ۇدەرىستى ءجىتى قاداعالاعان ءجون, – دەدى نۇرسۇلتان نازارباەۆ.
بۇعان قوسا, قازاقستان پرەزيدەنتى سوڭعى ۋاقىتتا وڭىرلىك تارتىپتىك كەڭەستەردىڭ ءوز بەلسەندىلىگىن ازايتىپ العانىن, ولاردىڭ جۇمىسىن كۇشەيتۋ جونىندە شارالار قابىلداۋ قاجەتتىگىن اتاپ ءوتتى.
ءوز كەزەگىندە ءا.بايمەنوۆ قازاقستان پرەزيدەنتىن مەملەكەتتىك قىزمەتتى ودان ءارى جاڭعىرتۋ جانە ساياسي قىزمەتشىلەر سانىن ەداۋىر قىسقارتۋ جونىندەگى تاپسىرمالارىنىڭ ورىندالۋى تۋرالى حاباردار ەتتى.
– قازاقستاننىڭ مەملەكەتتىك قىزمەتىنىڭ جاڭا مودەلىن ودان ءارى قالىپتاستىرۋ ماقساتىندا زاڭ, سونداي-اق, 12 جارلىق جانە ۇكىمەت پەن اگەنتتىكتىڭ ءبىرقاتار نورماتيۆتىك-قۇقىقتىق اكتىلەرى قابىلداندى. ءسىزدىڭ نۇسقاۋىڭىزعا سايكەس ءبىز الەمنىڭ جەتەكشى ەلدەرىنىڭ تاجىريبەلەرىنە تالداۋ جاسادىق جانە بۇگىندە حالىقارالىق ساراپشىلاردىڭ ءپىكىرىنشە, قازاقستاندا وزىندىك ءبىرەگەي مەملەكەتتىك قىزمەت مودەلى قالىپتاستى, – دەدى اگەنتتىك توراعاسى.
كەزدەسۋ قورىتىندىسىندا مەملەكەت باسشىسى مەملەكەتتىك قىزمەت كورسەتۋ جانە مەملەكەتتىك اپپارات جۇمىسىنىڭ تيىمدىلىگىن ارتتىرۋ ءۇشىن مەملەكەتتىك قىزمەتشىلەردى وقىتۋ ساپاسىن جاقسارتۋعا بايلانىستى بىرقاتار ناقتى تاپسىرمالار بەردى.
-----------------------------------------
سۋرەتتى تۇسىرگەندەر
س.بوندارەنكو, ب.وتارباەۆ.
