كورپوراتسيانىڭ ءباسپاسوز قىزمەتىنىڭ حابارلاۋىنشا, بۇگىنگى تاڭدا نەسيە تولەۋ مەرزىمىن كەيىنگە شەگەرۋ تۋرالى 81 ءوتىنىش تۇسكەن. ولاردىڭ قارىزىنىڭ جالپى سوماسى 6,3 ملرد تەڭگەدەن اسادى. ءار ءوتىنىم جەكە ءتارتىپ بويىنشا قاراستىرىلۋدا.
– «قازاگرو» حولدينگىنىڭ «اگرارلىق نەسيە كورپوراتسياسى» جالپى سوماسى 4,31 ملرد تەڭگەنى قۇرايتىن 32 كاسىپكەردىڭ قارىزىن تولەۋ بويىنشا مەرزىمدى كەيىنگە شەگەرۋدى ماقۇلدادى. 51 ءوتىنىم قاراستىرىلىپ جاتىر. ايتا كەتەرلىگى, 299 ملن تەڭگە كولەمىندە نەسيە العان ءبىر كاسىپكەردىڭ ءوتىنىشى ماقۇلدانبادى. سەبەبى, بۇل قارىز الۋشىنىڭ قولدانىستاعى تولەمدەرگە قاتىستى جەڭىلدىك كەزەڭى بار. اتالعان كاسىپكەر شارت تالاپتارىنا سايكەس ازىرگە تولەم جاسامايدى, – دەپ حابارلادى كورپوراتسيانىڭ ءباسپاسوز قىزمەتى.
تولەمدەردى كەيىنگە شەگەرۋ ەرەجەسى بويىنشا توتەنشە جاعداي رەجىمىنىڭ سالدارىنان قارجىلىق جاعدايى ناشارلاعان كليەنتتەردىڭ عانا وتىنىشتەرى ماقۇلدانادى. قارجىلىق جاعدايدىڭ ناشارلاۋى ساتىلعان تاۋارلاردىڭ ازايۋى, كورسەتىلگەن قىزمەتتەر كولەمىنىڭ تومەندەۋى, ءونىمدى ساتىپ الۋشىلاردىڭ تولەم مەرزىمىن توقتاتۋى نەمەسە وزگەرتۋى جانە تاعى باسقا دا فاكتورلار ارقىلى انىقتالادى. ەنگىزىلگەن شەكتەۋلەرگە بايلانىستى «اگرارلىق نەسيە كورپوراتسياسى» اق قارىز الۋشىلارىنىڭ ءوسىم مەن ايىپپ ۇلىن ەسەپتەۋدى توقتاتقانىن دا ايتا كەتۋ كەرەك.
پرەزيدەنت مالىمدەمەسىنەن كەيىن ءتيىمدى مىندەتتەمەلەردى جۇزەگە اسىرۋعا تەز ارادا كىرىسىپ كەتكەن «اگرارلىق نەسيە كورپوراتسياسى» اق كليەنتتەرىنىڭ كەز كەلگەن ماسەلە بويىنشا حابارلاسۋى ءۇشىن 5115 جەدەل جەلىسىن ىسكە قوستى. كەيىنگە شەگەرۋ وتىنىمدەرىن كاسىپورىننىڭ قارجىلىق جاعدايى قيىنداعانىن راستايتىن قۇجاتتاردىڭ كوشىرمەسىمەن بىرگە كورپوراتسيانىڭ ەلەكتروندى پوشتاسىنا جىبەرۋگە بولادى. ءباسپاسوز قىزمەتىنىڭ حابارلاۋىنشا, كاسىپكەرلەردەن تۇسكەن ءوتىنىش 10 كۇن ىشىندە قارالادى.
