قوعام الدىندا قارىم-قاتىناس ەتيكەتىن قاتاڭ قاداعالايتىن اعىلشىن حانزاداسى چارلز بەن فرانتسۋز ەلىنىڭ پرەزيدەنتى ەممانۋەل ماكروننىڭ ءوزى جان قىسىلعاندا ۇندىلەر مەن بۋددالار سياقتى ەكى الاقانىن كەۋدە تۇسىنا ءتۇيىستىرىپ تۇرىپ امانداسقانىن بايقاماي قالدى, نيگەريانىڭ مينيسترلەرى لاڭگى وينايتىن ادامشا ەكى اياعىن الماستىرا تەبىستى, سپورتشىلاردىڭ شىنتاقپەن قاعىسقانىن ميلليوندار ءىلىپ الىپ, قۇپتادى. اراسىندا وتكەن عاسىرلارداعى ساراي حانشايىمدارىنىڭ رەۆەرانستارى, اسا ايىرىقشا جاعدايلاردا قولداناتىن ۆاكاندا, ۆۋلكان سالەمدەسۋلەرى بايقالدى. قىسقاسى, ۆيرۋستان ساقتانۋعا بايلانىستى شارالاردىڭ الدىڭعى لەگىندە ءار حالىققا ءتان وزىندىك سالەمدەسۋ سالتىنىڭ عاجاپ ۇلگىلەرى كوز الدىمىزدا قايتا جاندانىپ تۇلەدى.
الەمدىك پاندەميا الەگى قاراپايىم قول جۋ تاسىلىنەن باستاپ اپتانىڭ جەتى كۇنى مەن جيىرما ءتورت ساعاتى بويى ۇيدە وتىرعان ادامدارعا ۋاقىتتى ءتيىمدى پايدالانۋدىڭ ءتۇرلى جولدارىن ۇيرەتىپ جاتىر. قايعىنى دا قاجەتىنە جاراتۋعا ۇندەيتىن قازاققا كارانتين كەزىندە قايتا ۇيرەنۋگە تۋرا كەلەتىن امالدىڭ ۇلكەنى امانداسۋ داعدىسى بولار دەگەن ويعا كەلدىك. سەبەبى سالەمدەسۋ قۇندىلىعى قازاق ءۇشىن و باستان باستى ورىندا تۇرادى. الەۋمەتتىك ورتاداعى جاسى ۇلكەن قاريانىڭ, ەر ادامنىڭ, قىز-كەلىنشەكتەردىڭ, بالالاردىڭ سالەم بەرۋ مادەنيەتىن كەڭىنەن زەرتتەسە, ىزگى تىلەك, ادال نيەتتەن تۋىندايتىن بۇل تاماشا تاربيە ءداستۇرىنىڭ تالاي ۇلگىلەرى جارقىراپ شىعار ەدى.
«سەن بۇگىن تاماق ءىشتىڭ بە؟» دەپ حال سۇرايتىن قىتاي مەن «اۋا رايى تاماشا» دەپ امانداساتىن گرەندلانديالىقتار, ىزەت-قۇرمەتىن دە, ريزاشىلىعىن دا راديۋسپەن بۇرىلىپ بىلدىرەتىن جاپوندار ءدال وسىلاي سالەمدەسۋدى اسپاننان العان جوق. حالىقتىڭ تۇرمىس سالتى, ءدىني سەنىمى, ۇلتتىق تانىمى نەگىزىندە قالىپتاسىپ, ورنىقتى. سالەم بەرۋ سالتىن تۇتاس حالىق بولمىسىنىڭ حابارشىسى دەسەك, تۇرمىسى ءتورت ت ۇلىكپەن بايلانىستى قازاقتىڭ «مال-جان, ەل-جۇرت امان با؟» دەپ باستالاتىن امانداسۋى وركەنيەت ىعىستىرعان قۇندىلىقتار قاتارىندا ءومىر سالتىمىزدان الىستاپ بارا جاتقانىن وزەك ورتەنە تۇرىپ مويىنداۋعا تۋرا كەلەدى. ەن دالادا ەركىن جۋساعان مال كەمىپ, اتا كاسىپپەن اينالىسۋ ارحايزمگە اينالعان سوڭ سالەم سۇرقىنىڭ قاشىپ, وزگەرىسكە ءتۇسۋى زاڭدى. بۇل بىرتە-بىرتە ەركىندىككە بوي ۇرىپ بارا جاتقان جاھان حالىقتارىنىڭ امانداسۋى دا ەرەكشە بولا باستاعانىنىڭ بولماشى كورىنىسى بولعانىمەن, جويىلىپ بارا جاتقان رۋحاني جادىگەر جالعىز بۇل ەمەس. تۇركى تىلدەس حالىقتاردىڭ وتانى ورتالىق ازيادا, ونىڭ ىشىندە ءبىزدىڭ جەرىمىزدە ەر ادامداردىڭ وڭ قولىمەن سول جاق كەۋدەسىن, جۇرەك تۇسىن باسىپ تۇرىپ, باس ءيىپ سالەمدەسۋ سالتى كەڭىنەن تاراعانى بەلگىلى. ارينە, اسىل دىنىمىزبەن بىرگە كەلگەن «اسسالاۋماعالەيكۋم» مەن «ۋاعالەيكۋماسسالام» ادەبى اماندىق-ساۋلىق سۇراسۋدى جاڭاشا الماستىردى, الايدا جەرىمىزدى يەلەنگەن, كۇشتەپ كوشىرىپ اكەلگەن ەتنوستاردىڭ باتىستىق ۇلگىمەن قول بەرىپ امانداسۋ, ول از بولسا, الاقانىن ارقاعا جۇگىرتىپ, جوتادان قاعۋ, بالا-شاعا, جاس-كارى, ايەل-ەر دەمەي جاعالاتا بەتتەن ءسۇيۋ ادامداردى جاقىنداستىرا تۇسەدى, ءوزارا سەنىم ۇيالاتادى دەپ سەندىرگەنىمەن, ەرتەدەن كەلە جاتقان قۇندىلىعىمىزدى قۇلدىراتىپ جىبەردى.
بەلگىلى ەتنوگراف جاعدا بابالىق ۇلى بەتتەن ءسۇيىپ سالەمدەسۋدىڭ وتە قاۋىپتى ەكەنىن, ونىڭ مەديتسينالىق جاعىنان تەرىس, نەبىر جامان دەرتكە باستايتىنىن, قىتايلاردىڭ ءوسىپ-ءونۋىنىڭ سىرت كوزگە ەلەۋسىزدەۋ كورىنەتىن سەبەبىنىڭ ءبىرى, ەشقاشان كىم كورىنگەننىڭ, بىلاي دا كىسىنىڭ بەتىنەن سۇيمەيتىن قاسيەتىمەن بايلانىستىراتىنىن ءباسپاسوز بەتىندە ەگجەي-تەگجەيلى بايانداعان ەدى. باكتەريولوگ عالىمدار ءبىر مارتە قول الىسىپ امانداسۋ كەزىندە تەرىگە قانشا ميلليون ميكروب كەلىپ قوناقتايتىنىن بىلسە, ادامدار الاقانىن الا جۇگىرمەك تۇگىلى, قول جۋدان قولدارى بوساماي قالار ەدى, دەيدى. 50 ميلليون ميكروب! ال اۋىز قۋىسىندا 700-دەن اسا باكتەريا ءتۇرىنىڭ ءومىر سۇرەتىنىن ەسكەرسە, قۋالاپ بارىپ بىرەۋدىڭ بەتىن سۇيەتىندەر كۇن سايىن باسىن قاتەرگە تىگىپ جۇرگەنىن ءوزى-اق ءتۇيسىنىپ, 100 ميلليونعا جۋىق ميكروبتى قابىلداۋعا تىتىركەنىپ, تىكسىنىپ تۇرار ەدى.
ءتاجتاجال تابيعي رەفلەكستى ورىنداۋدا جاتتان جۇققان تۇرپايى ادەت, ارتىق قىلىقتان ارىلۋدىڭ عاجاپ مۇمكىندىگىن سىيلاپ تۇر. كارانتين كەزىندە وزەكتى بولىپ تۇرعاندا, ءوز-وزىنەن سۇرانىپ تۇرعان سالەمدەسۋ سالتىمىزدى ءتىرىلتىپ, ءومىر سىيلاۋ ءوز قولىمىزدا تۇر. ۇرپاقتىڭ مادەنيەتى مەن دەنساۋلىعى ءۇشىن قايتا جاڭعىرتساق, ءدال وسى ماسەلەدە «قوي» دەپ قولىمىزدى ەشكىم قاعا قويماس.
