كەشە ۇلتتىق قاۋىپسىزدىك كوميتەتىندە تەررورعا قارسى ورتالىق مۇشەلەرىنىڭ ەكىنشى كەڭەيتىلگەن وتىرىسى بولىپ ءوتتى. جيىنعا سالالىق ۆەدومستۆو جانە بەينەجەلى ارقىلى ايماقتارداعى ۇلتتىق قاۋىپسىزدىك كوميتەتى دەپارتامەنتتەرىنىڭ باسشىلارى قاتىستى.
كەشە ۇلتتىق قاۋىپسىزدىك كوميتەتىندە تەررورعا قارسى ورتالىق مۇشەلەرىنىڭ ەكىنشى كەڭەيتىلگەن وتىرىسى بولىپ ءوتتى. جيىنعا سالالىق ۆەدومستۆو جانە بەينەجەلى ارقىلى ايماقتارداعى ۇلتتىق قاۋىپسىزدىك كوميتەتى دەپارتامەنتتەرىنىڭ باسشىلارى قاتىستى.
وتىرىستا ۇلتتىق قاۋىپسىزدىك كوميتەتىنىڭ توراعاسى نۇرتاي ابىقاەۆ كۇن تارتىبىنە قويىلعان تەرروريزم قاۋپىنىڭ تارالۋىنا سەبەپ بولاتىن بىرقاتار فاكتورلاردى اتاپ ءوتتى. بۇدان ءبىرشاما جىل بۇرىن ءبىز تەرروريزمدى جەكەلەگەن ەلدەر ارقىلى بىلەتىن بولساق, قازىر ونىڭ ۇعىمىنىڭ ءوزى بۇكىل الەمگە كەڭ تاراپ ۇلگەردى. ناقتى ايتار بولسام, ەكسترەميستىك جانە قىلمىستىق, سونىڭ قاتارىندا قارۋلى توپتاردى جويۋ بويىنشا ارنايى, ءجيى تۇردە بىرلەسكەن ونداعان وپەراتسيالار الدەنەشە رەت تابىستى وتكىزىلدى. دەگەنمەن, ءدال قازىرگى كەزەڭدە ازاماتتاردىڭ ءدىني ساۋاتىن اشۋ وتە ماڭىزدى بولىپ وتىر. ول ءۇشىن اۋەلى جاس ۇرپاققا ءبىلىم ءدانىن ەگەتىن بالالار باقشاسىنداعى تاربيە ماسەلەسىنە زەيىن قويۋىمىز قاجەت. شەتەلدەن ءدىني ساۋاتىن اشىپ كەلەتىن ماماندارىمىزدىڭ بىلىكتىلىگىنە دە زەرتتەۋ جۇرگىزگەن ارتىقتىق ەتپەيدى. ويتكەنى, ءومىر كورىنىسىنەن انىق اڭعارىلعانداي, باسقا ءدىننىڭ جەتەگىنە ەرىپ كەتىپ جاتقانداردىڭ 80 پايىزى جۇمىسسىز جۇرگەن جاستار. سوندىقتان ءبىز جانە جەرگىلىكتى اتقارۋشى بيلىك بۇل تۇرعىداعى ماسەلەگە سەرگەك قاراۋىمىز ءتيىس, دەدى ن.ابىقاەۆ.
ءوز كەزەگىندە ءسوز العان ءدىن ىستەرى اگەنتتىگى توراعاسىنىڭ ورىنباسارى عالىم شويكين راديكالدى دىنگە بوي الدىرىپ جۇرگەندەردىڭ باسىم بولىگى جۇمىسسىزدار قاتارىنان ەكەنىن جاسىرمادى.
ءارى سىرتتان كەلەتىندەر تەرىس اعىمداردىڭ تارالۋىنا اسەر ەتىپ جاتقان كورىنەدى. شەتەلدەرگە تەولوگيالىق ءبىلىم الۋعا بارعانداردىڭ دا قارىم-قابىلەتىن تەكسەرەتىن كەز كەلىپ جەتتى. ول وسىنداي ماسەلەلەردى كوتەرە كەلە, الداعى ۋاقىتتا شەتەلدە ءدىني ءبىلىم العىسى كەلەتىن تالاپكەرلەردى ءدىن ىستەرى اگەنتتىگىنىڭ رەتتەيتىنىن جەتكىزدى.
وتىرىستا شىعىپ سويلەگەندەردىڭ دەنى ازاماتتاردىڭ ءدىني ساۋاتتىلىعىنا ەرەكشە نازار اۋداردى. ول ءۇشىن الدىمەن يمامداردىڭ ساۋاتىن كوتەرۋ كەرەكتىگى ايتىلدى. ال ەلىمىز بويىنشا وسى ۋاقىت ارالىعىنا دەيىن 800 يمام بىلىكتىلىك كۋرسىنان وتكەن. باستىسى, باعىتى بەيمالىم شەتەلدەردەگى ءدىني وقۋ ورىندارىندا ءبىلىم الىپ جاتقان قازاقستاندىقتاردى كەرى قايتارۋ ماسەلەسى قولعا الىنىپتى. بۇل ورايدا دەرەككە جۇگىنسەك, سوڭعى ەكى جىل ىشىندە سول جەرلەردە ءبىلىم الىپ جاتقان 232 ازاماتىمىز ەلىمىزگە كەرى قايتارىلعان. قالعان 440 ازاماتتى ۋاقىت وزدىرماي ەلگە اكەلۋ ماسەلەسى قاراستىرىلۋى ءتيىس ەكەن.
جيىندا شىعىپ سويلەگەن ءبىلىم جانە عىلىم ۆيتسە-ءمينيسترى مۇرات ابەنوۆ بيىلدان باستاپ ەلىمىز مەكتەپتەرىندە «ءدىنتانۋ» ءپانى وقۋ باعدارلاماسىنا ەنگىزىلگەنىن اتاپ ءوتتى. الايدا, وسى پاننەن ءدارىس بەرەتىن ۇستازدار جەتىسپەيدى ەكەن. ۇلتتىق قاۋىپسىزدىك كوميتەتىنىڭ توراعاسى ن.ابىقاەۆ وسى جانە جوعارىدا كوتەرىلگەن باسقا دا ماسەلەلەردى جەدەل رەتتەۋ كەرەكتىگىن ايتىپ, جيىندى قورىتىندىلادى.
ءامىرحان الماعانبەتوۆ,
«ەگەمەن قازاقستان».
