قازاقستان • 21 ءساۋىر، 2020

«استانا وپەرا» اباي قۇنانباەۆتىڭ 175 جىلدىعىنا وراي ونلاين جوبانى ىسكە قوستى (ۆيدەو)

111 رەت كورسەتىلدى

«استانا وپەرانىڭ» تانىمال انشىلەرى جاننات باقتاي، جانات شىبىقباەۆ، مەير باينەش، ايزادا قاپونوۆا، ءمادينا يسلاموۆا، بولات ەسىمحانوۆ، اسەم سەمبينا، نازىم ساعىنتاي، «استانا وپەرا» سيمفونيالىق وركەسترىنىڭ مۋزىكانتتارى مەن وپەرا ترۋپپاسىنىڭ باس كونتسەرتمەيستەرى ەلەنا ساحنو اباي قۇنانباەۆتىڭ 175 جىلدىعىنا وراي «جەلسىز تۇندە جارىق اي» ءانىن ورىندادى. 

ارتىستەر ۇلى اقىن، ويشىل، اعارتۋشى، كومپوزيتور ابايدىڭ الەمىنە ءۇڭىلۋ – ولار ءۇشىن زور قۇرمەت ءارى قۋانىش ەكەنىن اتاپ ءوتتى. ولاردىڭ ايتۋىنشا، ادام كارانتين جاعدايىندا، ۇنەمى وقشاۋ كەڭىستىكتە قالعان كەزدە شەكسىز دە جاسامپاز شىعارماشىلىق تەرەڭىنە بويلاۋ – تازا اۋامەن تىنىستاعانمەن پارا-پار. «جەلسىز تۇندە جارىق اي» ءانىن كوپشىلىگى كوز الدىمىزعا اسەم سازدىڭ ۇيلەسىمدى اۋەزدەرىنەن ورىن تاپقان ايلى ءتۇن، بۇلدىراعان ساۋلەلەر ءتارىزدى تىلسىم تابيعات بەينەلەرىن اكەلەتىن تاماشا پوەزيامەن بايلانىستىرادى.

- اباي اندەرى ءماتىنى مەن مۋزىكاسىنىڭ، سوزدەرى مەن اۋەندەرىنىڭ اجىراماس تۇتاستىعىمەن ەرەكشەلەنەدى. اباي قۇنانباەۆ – قازاق حالقىنىڭ  رۋحاني كوشباسشىسى، ۇلى اقىن، سازگەر، فيلوسوف، اعارتۋشى ءارى گۋمانيست. پوەتيكالىق سوزدەردىڭ كۇشىمەن ول ادامداردىڭ ويى مەن جۇرەگىنە اسەر ەتتى. «جەلسىز تۇندە جارىق اي» ءانى تابيعات ليريكاسىنا جاتادى جانە ۇلتتىق مۋزىكالىق ونەردىڭ ناعىز جاۋھار قازىناسى بولىپ تابىلادى، - دەپ ءبولىستى قازاقستاننىڭ ەڭبەك سىڭىرگەن ءارتىسى، «استانا وپەرا» جەتەكشى ءسوليسى جاننات باقتاي.

ابايدىڭ شىعارماشىلىعى حح-ءححى عاسىرداعى كومپوزيتورلاردىڭ ۆوكالدىق، پوەزيالىق ونەرىنىڭ دامۋىنا ەلەۋلى اسەر ەتتى. وسىناۋ اتى اڭىزعا اينالعان ويشىلعا «اباي» وپەراسى ارنالعان. ەلوردالىق تەاتر رەپەرتۋارىندا ول نەگىزگى ورىنعا يە. 2018 جىلى «استانا وپەرا» شىعارماشىلىق ۇجىمى ا.جۇبانوۆ، ل.ءحاميديدىڭ «اباي» وپەراسىنىڭ قويىلىمى ءۇشىن ادەبيەت پەن ونەر سالاسىنداعى قازاقستان رەسپۋبليكاسىنىڭ مەملەكەتتىك سىيلىعىن يەلەندى.

سوڭعى جاڭالىقتار

ۇقساس جاڭالىقتار