«بۇگىنگى كۇندە جالپى ەل بويىنشا COVID-19 جۇقتىرعان 1852 ناۋقاس تىركەلدى. ولاردىڭ ەڭ كوپ سانى الماتى قالاسىندا - 606, نۇر-سۇلتاندا - 368, قىزىلوردا وبلىسىندا - 149. وتكەندە تاۋلىك بويىنشا 141 جاڭا ناۋقاس تىركەلدى. ءوسىم دەڭگەيى - 8,2 پايىز قۇرادى», - دەدى مينيستر ەلجان ءبىرتانوۆ.
ونىڭ ايتۋىنشا, وتكەن تاۋلىكتە ەڭ كوپ ناۋقاس الماتى مەن شىمكەنتتە تىركەلگەن.
«الماتىدا - 82 ناۋقاس, شىمكەنتتە - 23 ناۋقاس تىركەلدى. الماتى قالاسى بويىنشا 82 ناۋقاستىڭ 78-ءى جوسپارلانعان سكرينينگ-تەستتىڭ نەگىزىندە انىقتالدى. ولاردىڭ 60-ى ورتالىق قالالىق كلينيكالىق اۋرۋحانانىڭ ىشىندەگى ناۋقاستار جانە مەديتسينالىق قىزمەتكەرلەر. شىمكەنت قالاسى بويىنشا 23 ناۋقاستىڭ 16-سى سكرينينگ بويىنشا انىقتالدى. ولار - توتەنشە جاعداي قىزمەتىنىڭ قىزمەتكەرلەرى. قالعانى ەمدەلىپ جاتقان ناۋقاستار مەن كارانتيندە جاتقان ازاماتتار», - دەدى مينيستر.
سونداي-اق ءمينيستردىڭ ايتۋىنشا, قازىرگى ۋاقىتتا 1386 ناۋقاس ەمدەلىپ جاتىر, ولاردىڭ اراسىندا 100 بالا بار. جالپى ورتاشا جاعداي بويىنشا - 258, ناشار جاعداي بويىنشا - 32, قالعان 1096 ناۋقاس جاعدايى - بىرقالىپتى.
