ۋنيۆەرسيتەتتءىڭ قازاق فيلولوگياسى كافەدراسىۇيىمداستىرعان ونلاين كونفەرەنتسياعا الماتىدان م.اۋەزوۆ اتىنداعى ادەبيەت جانە ونەر ينستيتۋتى, ا.بايتۇرسىنوۆ اتىنداعى ءتىل ءبىلىمى ينستيتۋتى, اباي اتىنداعى قازاق ۇلتتىق پەداگوگيكالىق ۋنيۆەرسيتەتى, قازاق ۇلتتىق قىزدار پەداگوگيكالىق ۋنيۆەرسيتەتى, اقتوبەدەن ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى, شىمكەنتتەن وڭتۇستىك قازاقستان مەملەكەتتىك پەداگوگيكالىق ينستيتۋتى, ورالدان باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ عالىم-ۇستازدارى, وبلىستىق ءبىلىم جانە تىلدەردى دامىتۋ باسقارمالارى, ورال قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبى جانە وزگە دە ءبىلىم بەرۋ ۇيىمدارىنىڭ وكىلدەرى, جوعارى وقۋ ورنىنىڭ ستۋدەنتتەرى مەن ماگيسترانتتارى قاتىسىپ, ونلاين فورماتتا پلەنارلىق ءماجىلىستى جۇزگە تارتا ادام تىڭداپ وتىردى.
كونفەرەنتسياعا تۇركيانىڭ انكارا قالاسىنان ارنايى قوسىلعان عالىم, جازۋشى, ەۋرازيا جازۋشىلار وداعىنىڭ توراعاسى ياكۋب ومەروگلى تۇركى وركەنيەتىندەگى ابايدىڭ فەنومەندىك تۇلعاسىنا توقتالىپ, ابايدىڭ قازاق جۇرتىنا عانا ەمەس, الەمدىك رۋحاني وركەنيەتتىك تۇلعاعا اينالعانىن اتاپ ءوتتى. ماڭگىلىك ادامزاتتىق ماسەلەلەردىڭ وزەگىن قوزعاعان ۇلى اقىننىڭ شىعارماشىلىعى تۇركى حالىقتارى ءۇشىن دە ماڭىزدى مۇرا دەپ باعا بەردى. اقىننىڭ شىعارماشىلىعىنىڭ شەتەل تىلدەرىنە اۋدارىلۋى, ونىڭ ىشىندە تۇركى تىلىنە اۋدارىلۋدىڭ ماڭىزدىلىعىنا توقتالدى.
م.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, ابايتانۋ ءبولىمىنىڭ مەڭگەرۋشىسى, فيلولوگيا عىلىمدارىنىڭ كانديداتى سەرىكقازى قوراباي اباي پوەزياسىنىڭ رەنەسسانستىق سيپاتى تۋرالى ءسوز قوزعاسا, فيلولوگيا عىلىمدارىنىڭ دوكتورى, پروفەسسور مۇرات سابىر «اباي پوەزياسىنىڭ ورتا تۇركىلىك ادەبيەتپەن ساباقتاستىعى» تاقىرىبىندا بايانداما جاساپ, اباي شىعارماشىلىعىنا اسەر ەتكەن تۇركىلىك وركەنيەت تۋرالى ايتتى. حاكىمنىڭ شىعارماشىلىعىن التىن وردا ءداۋىرى مۇرالارىمەن بايلانىستىرا زەرتتەۋ, ونىڭ تاقىرىپتىق, يدەيالىق ۇندەستىگىن, تىلدىك دەرەكتەردى تەرەڭ تالداۋ قاجەتتىگى جايلى پىكىرلەرىمەن ءبولىستى.
ماحامبەت ۋنيۆەرسيتەتىنىڭ جانىنداعى «رۋحاني جاڭعىرۋ» عىلىمي-زەرتتەۋ ينستيتۋتىنىڭ ديرەكتورى, پەداگوگيكا عىلىمدارىنىڭ دوكتورى, پروفەسسور ابات قىدىرشاەۆ پەن وقۋ ورنىنىڭ قازاق فيلولوگياسى كافەدراسى دوتسەنتى, فيلولوگيا عىلىمدارىنىڭ كانديداتىجانگەلدى شايەكەنوۆ بۇگىنگى جاس ۇرپاق تاربيەسى ءۇشىن اباي ءىلىمى مەن ءبىلىمىنىڭ ماڭىزدىلىعىنا توقتالدى.
- ۇلى ابايدىڭ 175 جىلدىعى قارساڭىندا پرەزيدەنتىمىز قاسىم-جومارت توقاەۆتىڭ «ەگەمەن قازاقستان» گازەتىندە جارىق كورگەن «اباي جانە ءححى عاسىرداعى قازاقستان» اتتى ماقالاسىندا ءحىح عاسىردا ءومىر ءسۇرگەن دانىشپاننىڭ قۇندى ويلارى ءححى عاسىردا دا وزەكتىلىگىن جوعالتپاعانىن, ول وي-تۇجىرىمدار مەن اقىل-كەڭەس بۇگىنگى قوعامعا دا رۋحاني ازىق بولىپ قالاتىنى ايتتى. اقىن ءسوزىنىڭ قاي-قايسىسى دا ءماندى دە ماعىنالى وسيەت. اباي سول زاماننىڭ وزىندە ءبىلىم مەن عىلىم ىلگەرىلەمەي, ەلدىڭ دامۋى بولمايتىنىن انىق ايتقان. ءبىلىم مەن عىلىمدى دامىتۋ ارقىلى عانا وركەنيەتتى دامىعان ەلدەردىڭ كوشىنە ىلەسەتىنىمىز انىق. ءبىز ۇلى ابايدىڭ شىعارمالارىنداعى ادامزاتتىق قۇندىلىق پەن ىزگىلىكتى ءسىڭىرىپ, «تولىق ادام» تۇجىرىمىن كەيىنگى ۇرپاقتىڭ ساناسىنا ءسىڭىرۋءىمىز كەرەك. ابايدىڭ ءىلىمى جاندى دا, اردى دا تازالايدى. ءىلىم مەن ءبىلىمدى مەڭگەرگەن, ارلى دا ىزگى ادام «تولىق ادام» ساناتىندا بولماق, - دەيدى ماحامبەت ۋنيۆەرسيتەتىنىڭ قاۋىمداستىرىلعان پروفەسسورى, فيلولوگيا عىلىمدارىنىڭ كانديداتى ريتا سۇلتانعاليەۆا.
ونلاين كونفەرەنتسيادا اباي شىعارمالارىن ورتا مەكتەپ جۇيەسىندە وقىتۋدىڭ جاڭا ادىستەرى دە ورتاعا سالىندى. ورال قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ ەكسپەرت-مۇعالىمى جانساۋلە ماقسوتوۆا جاڭارتىلعان ءبىلىم بەرۋ باعدارلاماسى بويىنشا اباي شىعارمالارىن وقىلىم ستراتەگيالارى ارقىلى مەڭگەرتۋ جولدارىن كورسەتۋگە ارنالعان ساباق ۇلگىسىن كورسەتتى.
باتىس قازاقستان
