سونداي-اق تۇركىستان قالاسىندا سيتۋاتسيالىق ورتالىق اشىلىپ, تۇرعىنداردىڭ ەركىن ءجۇرىپ-تۇرۋىنا شەكتەۋلەر قويىلدى. بۇل تۋرالى جەدەل شتاب جيىنى كەزىندە قالا اكىمى راشيد ايۋپوۆ مالىمدەدى. «بۇل قالا كارانتينگە جابىلادى دەگەن ءسوز ەمەس. شەكتەۋلەر عانا. دۇيسەنبى سيتۋاتسيالىق ورتالىق جۇمىسىن باستاپ, وعان پوليتسيا, توتەنشە جاعداي, تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ, دارىگەرلەر جانە اكىمدىكتىڭ ءار سالا ماماندارى تارتىلادى. بەينەكامەرا ورناتىلىپ, ديسپەتچەرلىك بايلانىس ءنومىر قاراستىرىلادى», دەدى راشيد ابات ۇلى. قالا اكىمىنىڭ تاپسىرماسىنا سايكەس, ەندىگى جەردە قوعامدىق كولىكتىڭ قوزعالىسىنا دا شەكتەۋ قويىلادى. تۇرعىندارعا «التىن بۇلاق» كوتەرمە ساۋدا بازارىنان دۇكەندەرگە جونەلتىلگەن ازىق-ت ۇلىك جەتكىزىلەدى. ودان بولەك, تاپسىرىس ارقىلى قىزمەت كورسەتۋگە 22 كولىك دايىن. الدىمەن, كۇرىش, ماكارون, كارتوپ, ءسابىز, ورامجاپىراق, پياز, تۇز, كۇنباعىس مايىنا تاپسىرىس قابىلدانسا, سۇرانىس بويىنشا ءتىزىم ۇلعاياتىن بولادى. جەتكىزۋ قىزمەتىنە ءدارىحانا, ءدامحانالار مەن مەيرامحانالار دا قوسىلادى.
قالا اكىمدىگىنىڭ 6 ءموبيلدى توبى مەن پوليتسيا قىزمەتكەرلەرى جۇرتشىلىقتى قاجەتسىز سىرتقا شىقپاۋ بويىنشا ءتۇسىندىرۋدى باستاپ كەتتى. سونداي-اق, بلوك بەكەتتەردەگى باقىلاۋ جۇمىسى قاتاڭ قاداعالاۋعا الىنعان.
تۇركىستان وبلىسى
