– پاندەميا بۇكىل ادامزاتقا قاۋىپ ءتوندىرىپ تۇر. پرەزيدەنت پەن ۇكىمەت قيىن جاعدايعا تاپ بولعان ادامداردى, كوپبالالى وتباسىلاردى, مۇمكىندىگى شەكتەۋلى جاندار مەن قارتتاردى كومەكپەن قامتاماسىز ەتۋ جونىندە شارالار قابىلدادى. وسى ورايدا پارتياعا مەملەكەتتىك شارالاردى قولداۋ بويىنشا بەلسەندى جۇمىس ىستەۋدى تاپسىردىم, - دەدى قازاقستاننىڭ تۇڭعىش پرەزيدەنتى.
سونداي-اق نۇرسۇلتان نازارباەۆ «Birgemiz» قوعامدىق قورىنىڭ جۇمىسىنا توقتالىپ, بۇل باستامانى قولداعان قازاقستاندىقتارعا العىسىن ءبىلدىردى.
– «Birgemiz» قورىنا ءبىراز قاراجات جينالدى. وسىناۋ قيىن كەزەڭدە مۇقتاجدارعا كومەك ۇيىمداستىرۋ ماقساتىمەن مەنىڭ قور قۇرۋ جونىندەگى باستامامدى قولداعانى ءۇشىن قازاقستاننىڭ بيزنەس قاۋىمداستىعىنا العىس ايتقىم كەلەدى. مەن «ERG» كومپانيالار توبىنىڭ باسشىلىعى ا.ماشكەۆيچكە, ا.يبراگيموۆقا, پ.شوديەۆكە, «قازاقمىس» كورپوراتسياسىنىڭ باسشىلىعى ۆ.كيمگە, و.نوۆاچۋككە, ە.وگايعا, سونداي-اق ت.ق ۇلىباەۆقا, ب.وتەمۇراتوۆقا, ر.سارسەنوۆكە, ا.كلەبانوۆقا, ع.ەسەنوۆكە, ا.راقىمباەۆقا, ا.بەلوۆيچكە, ق.بورانباەۆقا, ق.شارىپباەۆقا جانە تاعى دا باسقا ازاماتتارعا العىس بىلدىرەمىن, - دەدى ەلباسى.
سونىمەن بىرگە قازاقستاننىڭ تۇڭعىش پرەزيدەنتى «Jas Otan» جاستار قاناتىنىڭ بەلسەندىلەرى مەن ەرىكتىلەرىنىڭ جۇمىسىن اتاپ ءوتتى.
– پارتيا بەلسەندىلەرى مەن «Jas Otan» ەرىكتىلەرى قازاقستان بويىنشا 50 مىڭنان استام وتباسىنى ەڭ قاجەتتى تاۋارلارمەن قامتاماسىز ەتتى. جالپى بۇل جۇمىسقا ءۇش مىڭ ەرىكتى جۇمىلدىرىلدى. مەن ولارعا دا العىس ايتامىن, - دەدى نۇرسۇلتان نازارباەۆ.
سونىمەن قاتار, ەلباسى «Birgemiz» قورىنان 152 مىڭنان استام وتباسىنا 50 مىڭ تەڭگە كولەمىندە بىرجولعى كومەك كورسەتىلگەنىن ايتتى.
- ءبىز بۇل جۇمىستى جالعاستىرۋىمىز كەرەك. مامىر ايىنىڭ باسىنان باستاپ حالىققا كومەك كورسەتۋدىڭ ەكىنشى تولقىنىن باستايمىز. بۇل ۇكىمەت ءبولىپ وتىرعان كومەكتەن بولەك قوسىمشا قولداۋ, - دەدى قازاقستاننىڭ تۇڭعىش پرەزيدەنتى.
سونداي-اق «Nur Otan» پارتياسىنىڭ توراعاسى داعدارىستان كەيىنگى كەزەڭدەگى ەكونوميكالىق ءوسىمدى قامتاماسىز ەتۋ ماسەلەلەرىنە توقتالدى.
– پرەزيدەنت تە, ۇكىمەت تە وسى قيىن ۋاقىتتا بارىنە كومەكتەسۋ ءۇشىن بارىنشا جۇمىس ىستەپ جاتىر. كوروناۆيرۋس پاندەمياسى وتەدى, الداعى ۋاقىتتا ءبىزدىڭ الدىمىزدا ەكونوميكانى قايتا قالپىنا كەلتىرۋ ماسەلەسى تۋىندايدى. ءبىراز ادام جۇمىسسىز قالىپ, ەكونوميكا باسەڭدەدى. جاعدايدىڭ جاقسارۋىنا قاراي بيزنەستىڭ كەيبىر تۇرلەرىنە قىزمەتىن جانداندىرۋ ءۇشىن جەڭىلدىك جاساعان ءجون دەپ ويلايمىن. كاسىپكەرلەر ءوزىن جانە اينالاسىن قورعاۋ ءۇشىن بارلىق ءتيىستى شارالاردى قابىلداۋى كەرەك, - دەدى ەلباسى.
ءوز كەزەگىندە ب.بايبەك پارتيانىڭ داعدارىسقا قارسى ءىس-شارالاردى جۇزەگە اسىرۋ جانە حالىققا كومەك كورسەتۋ جۇمىستارى تۋرالى باياندادى.
– قازىرگى تاڭدا «Birgemiz» قورىنا 20 ميلليارد تەڭگەگە جۋىق قاراجات جينالدى. ءبىز ماتەريالدىق كومەكتەن بولەك نۇر-سۇلتان, الماتى جانە شىمكەنت قالالارىنداعى مۇقتاج وتباسىلارعا مەديتسينالىق بەتپەردە تاراتا باستادىق. سونىمەن قاتار, ەلوردا مەن الماتىداعى ەكى مىڭنان استام دارىگەر مەن مەديتسينا قىزمەتكەرىنىڭ ارقايسىسىنا قوردان 50 000 تەڭگەدەن بەرىلدى, - دەدى «Nur Otan» پارتياسى توراعاسىنىڭ ءبىرىنشى ورىنباسارى.
كەزدەسۋ سوڭىندا نۇرسۇلتان نازارباەۆ تاعى ءبىر مارتە بارشا قازاقستاندىقتى جاھاندىق پاندەميامەن كۇرەستە بىرىگۋگە شاقىردى.
– بىرلىگىمىز, ىنتىماعىمىز بەن ءبىر-بىرىمىزگە دەگەن قامقورلىعىمىز ءبىزدى جەتىستىككە جەتەلەيدى. ۇيدە وتىرۋ وڭاي ەمەس ەكەنىن تۇسىنەمىن. شاعىن بيزنەسكە دە اۋىرتپالىق ءتۇسىپ تۇر. الايدا قازىر جەتىستىككە جەتۋ ءۇشىن شىدامدىلىق قاجەت », - دەدى قازاقستاننىڭ تۇڭعىش پرەزيدەنتى.
