كەشە تاۋەلسىزدىك سارايىندا «الەم – شەبەردىڭ كوزىمەن. يتيكۋ كۋبوتانىڭ كيمونولارى» اتتى بىرىگەي كورمەنىڭ سالتاناتتى اشىلۋ ءراسىمى ءوتتى. كورمەنى ۇيىمداستىرۋشىلار – حالىقارالىق شوديەۆ قورى, استانا قالاسىنىڭ اكىمدىگى مەن جاپونيانىڭ قازاقستان رەسپۋبليكاسىنداعى ەلشىلىگى. كورمە 6-19 قىركۇيەك ارالىعىندا وتەدى.
استانا قالاسىنداعى ونەرسۇيەر قاۋىمعا الەمدىك كوركەمونەر سالاسىنداعى قۇندىلىعى جوعارى, سۋرەتپەن كومكەرىلگەن جاپوندىق كيمونو تۋىندىلارىنىڭ ۇزدىك ۇلگىلەرى ۇسىنىلدى. كورمەنىڭ رەسمي اشىلۋىنا پرەزيدەنت اكىمشىلىگىنىڭ, پارلامەنت پەن ۇكىمەتتىڭ, ديپلوماتيالىق كورپۋستىڭ وكىلدەرى, كاسىپكەرلەر, قوعام جانە ونەر قايراتكەرلەرى قاتىستى.
كاسىپكەر, مەتسەنات جانە حالىقارالىق شوديەۆ قورىنىڭ نەگىزىن قالاۋشى فاتتاح شوديەۆ, جاپونيانىڭ قازاقستان رەسپۋبليكاسىنداعى ەلشىسى يۋدزو حارادا, يتيكۋ كۋبوتا مۇراجايىنىڭ ديرەكتورى مياحارا ساكۋو جانە استانا قالاسى اكىمدىگىنىڭ وكىلى كورمەنىڭ اشىلۋىنا ارناپ ءسوز سويلەدى.
يتيكۋ كۋبوتا (1918-2003) – حح عاسىرداعى جاپون كوركەم ونەرى مەن تەكستيلىنىڭ اتاقتى شەبەرى. ول ۇزاق جىلدار بويى قىلقالام ونەرى مەن ماتالاردى بوياۋدىڭ وزگە دە تاسىلدەرىن, پەيزاج جانە پورترەت سالۋ ونەرىن زەرتتەگەن. جاپوندىق جىبەك ماتانى سۋرەتتەۋدىڭ كونە ونەرىن زەرتتەي وتىرىپ, كۋبوتا ونداعان جىلدار قاتارىنان ونىڭ قۇپياسىن تاۋىپ, مەڭگەرۋگە ۇمتىلعان. وسىلاي, كۋبوتا ءوزىنىڭ سۋرەت سالۋ باعىتىن قالىپتاستىرعان.
فۋدزي تاۋىنىڭ ءتۇرلى راكۋرستاعى سۋرەتتەرى, كۇنشىعىس ەلىنىڭ قايتالانباس تابيعي سۇلۋلىعى ەرەكشە دەكوراتيۆتى لاندشافتقا بىرىگىپ, ءبىر كيمونودان ەكىنشى كيمونوعا اۋىسادى. وسىلاي ءتۇرلى مەزگىلدەر مەن كوڭىل كۇي قالىپتاستىرادى. ەگەر بىرنەشە كيمونونى بىرىكتىرسە, ولار كوز تارتارلىق ەرەكشە سۇلۋ پەيزاج بەينەلەنگەن سۋرەتتى قۇرايدى. وزدەرىنىڭ دەكوراتيۆتىلىگىنە قاراماستان, ءاربىر كيمونو 2,5 مەتر ماتادان جاسالعان قىلقالام ونەرىنىڭ تۋىندىسى بولىپ تابىلادى. ءاربىر كيمونونى جاساۋعا شەبەر ءبىر جىلعا جاۋىق ۋاقىتىن بولگەن. يتيكۋ كۋبوتا 2003 جىلى 85 جاسىندا قايتىس بولعان.
2010 جىلى جاپونياداعى «يتيكۋ كۋبوتا مۇراجايىنا» بانكروت بولۋ قاۋپى ءتوندى. بىرەگەي كوللەكتسيا بولشەكتەلىپ ساتىلىپ, جوعالىپ كەتە جازدادى. الايدا, مۇراجايدى بەلگىلى مەتسەنات فاتتاح شوديەۆ قۇتقارىپ قالدى. ول كوللەكتسيانى الەمدىك مادەنيەت ءۇشىن تولىق كۇيىندە ساقتاپ قالۋ ماقساتىندا جانە ونىڭ ومىرىندە جاپونيانىڭ الاتىن ورنىنا العىس رەتىندە ساتىپ الدى.
حالىقارالىق شوديەۆ قورىنىڭ ارقاسىندا استانانىڭ ءاربىر تۇرعىنى بىرەگەي كوللەكتسيانى تاماشالاي الادى.
«ەگەمەن-اقپارات».
