وقيعا ماڭعىستاۋ وبلىسىنداعى قاراقيا اۋدانىنا قاراستى جەتىباي كەنتى ماڭىندا ورىن الدى. اۋىل تۇرعىنى داۋلەت تۇيەشيەۆ جۇمىس بابىمەن كەنتتەن ونشاقتى شاقىرىم قاشىقتىقتاعى قاتتى قالدىقتار توگەتىن ورىندى قاداعالاۋعا كەلەدى.
بۇرىن قۇقىق قورعاۋ ورنىندا قىزمەت ەتكەن داۋلەت كەيىنەن اۋىلداعى «تۇرمىسسەرۆيس» كوممۋنالدىق مەملەكەتتىك كاسىپورنىنا شەبەر بوپ قىزمەتكە كىرىسەدى. ءار جۇمىستىڭ ءوز تالابى بار دەگەندەي, كۇندەگىسىن كۇندە كەنتتەن سىرتقارىراق جاتقان قالدىق توگەتىن ورعا كەپ, قاداعالاپ-باقىلاپ تۇرۋ جاۋاپكەرشىلىگى موينىندا بولسا كەرەك. ول الگى ورىنعا كەلىپ, كولىگىنەن تۇسە بەرگەنى سول ەكەن, جىرتقىش قارسى الدىنان ءتىسىن اقسيتا ايبات شەگىپ, ىرىلداپ تۇرا قالادى. جەكىپ, جاسقاعان مۇنىڭ تۋ سىرتىنان ەكپىنمەن كەپ جابىسا كەتەدى دە, جىگىتتىڭ جۋان تۇمسىقتان پەرگىلەگەن جۇدىرىعىن, قولىن, ارقاسىن تىستەلەي باستايدى. ءومىرىنىڭ قىل ۇستىندە قالعانىن اڭعارعان داۋلەت شاپشاڭ قيمىلداپ, ءبىر قولىمەن قاسقىردىڭ اۋىزىنان بۇرە ۇستاپ, جاعالاسا ءجۇرىپ جەرگە جىعادى دا قىلعىندىرىپ ولتىرەدى. جاقىن ماڭدا ورنالاسقان «قايسارسەرۆيس» جشس جۇمىسشىلارى كەلىپ, جاراقاتتانعان ءداۋلەتتى كەنت اۋرۋحاناسىنا جەتكىزەدى.
– داۋلەت جاڭا عانا مەنىڭ قابىلداۋىمدا بولدى. جاعدايى جاقسى. قايراتتى جىگىت بولعاندىقتان امان قالدى. ونىڭ ورنىندا بالا-شاعا نەمەسە قارت كىسى بولعاندا نەگە سوقتىرارى بەلگىسىز ەدى, – دەيدى كەنتتىڭ جاڭا سايلانعان اكىمى ا.نۇعىمانوۆ. اۋىل تۇرعىندارى جىرتقىش ولەكسەسىن ورتەپ جىبەرگەن. قارتتار ول اش قاسقىر بولۋى مۇمكىن دەگەندى ايتادى. ايتپەسە, كۇن جىلى, جەر قارادا قاسقىردىڭ ادامعا شابۋى بۇرىن-سوڭدى كەزدەسپەگەن. قالدىقتار مەن جاقىن ماڭداعى تاس كارەرلەرىنىڭ اسحانالارىنان شىعارىلعان توگىندىلەردى تالعاجۋ ەتەتىن قاسقىر تۋرالى «قاراڭ-قۇراڭ ادامداردان ىعىر بولىپ, اشتىقپەن بىرگە اشۋ قىسقان بولۋى مۇمكىن» دەگەن جورامال دا بار.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
