كەشە استانادا سالاماتتى ءومىر سالتىن ۇستانۋعا قوعامنىڭ, بۇقارا حالىقتىڭ نازارىن اۋدارۋ ماقساتىندا «دەنساۋلىعىم كەرەمەت – جاتتىعۋعا كوپ راحمەت!» ۇرانىمەن ءداستۇرلى كەڭ اۋقىمدى «دەنساۋلىق فەستيۆالى-2013» شاراسى ءوتتى.
دەنساۋلىق كۇنىندە بارلىق قازاقستاندىقتار ءۇشىن تاڭعى جانە وندىرىستىك گيمناستيكانى ناسيحاتتاۋعا, سالاماتتى ءومىر سالتىن ساقتاۋ مادەنيەتى مەن ونى كەڭىنەن ناسيحاتتاۋعا مۇمكىندىك تۋدى.
ءداستۇرلى جىل سايىنعى اتالمىش شارا جاپپاي جۇگىرۋدەن باستاۋ الىپ, وعان 5 مىڭعا جۋىق ادام قاتىستى. ءىس-شارا اياسىندا ساياباقتا دەنساۋلىق قالاشىقتارى اشىلدى. بۇل جەردە استانالىقتار مەن قالا قوناقتارىنا مەديتسينالىق تەكسەرۋلەردەن وتۋگە جاعداي جاسالدى. ديابەت پەن باسقا دا اۋرۋلارعا ەكسپرەسس تەستتەر وتكىزىلدى. سونداي-اق, وندا كەلۋشىلەر ارتەريالدىق قىسىمدى ولشەپ, اقپاراتتىق-ءبىلىم بەرۋ ماتەريالدارىمەن جانە دەنساۋلىققا ارنالعان كەڭەستەر الدى.
وسى شاراعا الماتى اۋدانىنىڭ اكىمى ساعىم بەكبولوۆ تا قاتىسىپ, جينالعان جۇرتشىلىققا «دەنساۋلىق فەستيۆالى-2013» اكتسياسى تۋرالى ءوز پىكىرىن ءبىلدىردى. ول ءوز سوزىندە قازىرگى كەزدە مەملەكەت جاستار دەنساۋلىعىنا كوپ كوڭىل ءبولگەندىكتەن, قالامىزدا سپورت عيماراتتارى كوپتەپ سالىنىپ جاتقانىن, جەتكىنشەكتەردى سپورتقا بەيىمدەۋ ماقساتىندا قالا اكىمىنىڭ قولداۋىمەن جۇزگە تارتا سپورت كلۋبتارى مەن قىرىققا جۋىق سپورت الاڭدارى اشىلعانىن ايتىپ, مەكتەپتەردىڭ دە سپورت جابدىقتارى جىل سايىن جاڭارتىلىپ كەلە جاتقانىن اتاپ ءوتتى.
وسىدان كەيىن سپورت ۇجىمدارى كاراتە مەن ۇلتتىق كۇرەس ءتۇرلەرىنەن, ال كوركەمونەرپازدىق ۇجىمدار, ۇلتتىق مادەني ورتالىقتاردىڭ وكىلدەرى جۇرتشىلىققا ءان ايتىپ, ءوز ونەرلەرىن كورسەتتى. بيىلعى اكتسياعا مارات وماروۆ, باقىت شاداەۆا, ەركەش حاسەن سىندى قازاقستان ەستراداسىنىڭ وكىلدەرى قاتىستى.
ايجۇلدىز ەربولاتقىزى,
ل.ن.گۋميلەۆ اتىنداعى
ەۇۋ ستۋدەنتى.
