مىسىر بيلىگى ناۋرىز ايىندا ۇكىمەتتىك ەمەس ۇيىم بولىپ تىركەلگەن «مۇسىلمان باۋىرلار» قاۋىمداستىعىن تاراتۋ جونىندە شەشىم قابىلدادى. بۇل تۋرالى «ال-احبار» گازەتىنىڭ بۇگىنگى بەرگەن مالىمەتىنە سىلتەمە جاساعان يتار-تاسس حابارلادى.
«مينيستر اتالمىش شەشىمدى قابىلداپ قويدى, الايدا, ول تۋرالى رەسمي تۇردە كەلەسى اپتادا وتەتىن ءباسپاسوز كونفەرەنتسياسىندا جاريالانادى», – دەپ مالىمدەدى الەۋمەتتىك ىنتىماقتاستىق مينيسترلىگىنىڭ رەسمي وكىلى حاني ماحانا.
«مۇسىلمان باۋىرلار» قاۋىمداستىعى 1928 جىلى قۇرىلدى. 1954 جىلى مىسىر اسكەري ۇكىمەتى بۇل قوزعالىسقا تيىم سالعان بولاتىن. ال 2011 جىلى حوسني مۇباراك قىزمەتىنەن بوساتىلعان سوڭ, پرەزيدەنتتىك سايلاۋ ناتيجەسىمەن «مۇسىلمان باۋىرلار» تاققا كەلدى. يسلاميستەردىڭ مەملەكەتتى باسقارۋى حالىق اراسىندا ۇلكەن داۋ-داماي تۋعىزىپ, ۇستىمىزدەگى جىلدىڭ شىلدە ايىندا اسكەريلەر مۋحاممەد ءمۋرسيدى قىزمەتىنەن شەتتەتتى.
قاۋىمداستىقتى تاراتۋ جونىندەگى ۇسىنىستى بۇدان بۇرىنىراق مىسىر سوت القاسى بىلدىرگەن بولاتىن. مىسىردىڭ باس پروكۋراتۋراسى مۋحاممەد مۋرسي مەن «مۇسىلمان باۋىرلار» قاۋىمداستىعىنىڭ 14 جەتەكشىسىنە بايلانىستى ءىستى سوتقا وتكىزدى. ولار ادامداردى قانتوگىس پەن زورلىق-زومبىلىققا يتەرمەلەگەندەرى ءۇشىن ايىپتالۋدا. وتكەن جىلدىڭ 5 جەلتوقسانىندا كايردەگى «يتتيحاديا» پرەزيدەنت سارايىنىڭ الدىندا كىسى ولىمىنە سوقتىرعان قاقتىعىس اتالمىش ايىپتىڭ باستى كورىنىسى رەتىندە قاراستىرىلىپ وتىر.
ايدار ورىسباەۆ.
